واغلب مشاكلك لها حل بس انتي ماتبين حلول فقط تفضفضين وتبكين ومدمره نفسيتك لازم تقوين عشان ولدك لازم


1 - التحف الاشياء الخطره لا تشترينها ارميها كلها في الزباله مو ترفعينها فوق وادراج مليانه حتى اثاثك الي فيه شي خطر ارميه واشتري راحتك

2-فرغي له غرفه بدون دواليب وخليه اغلب وقته فيها

3-ولدك اذا اكل يستفرغ طيب لييييه تاكلونه ليه خليك فقط على الاشياء الي ناسبته ومايستفرغها وخلي الدكتور يكتب لك نظام واكلات او سوائل تناسب حالته او اذا لاحظتي انه بعد خامس لقمه يستفرغ المره الي بعدها خليها 4 لقمات وكذا

4-الحدايق لا تروحين لها دام ماتستفدون شي ترجعون منكدين جربي البر يحفر يناقز يطلع كل طاقته

5-الناس الي تناظركم والله ثم والله مو كلهم معجبين او حاسدين يمكن بس ملفتهم لون شعره فقط يعني مايعرفونك ولا تعرفينهم ليه بيضرونك كلامك كانك تقولي قاصدينك كللل الناس تناظركم كلهم مجرمين ينتظرون تطلعي من بيتك ويلاحقونك
فيه اطفال دبدوبين وشقر وعيونهم وساع محد لاحقهم وامرضهم
ايمانك بقوة عيون الناس اقوى من ايمانك بالله واياته وذكره
ولدك مهما كان معه سحر او عين او مرض عضوي كلها وكليها لله
بس يكفففي تمرضين نفسيتك وزوجك وتراقبون الناس من يطالعكم وتدعون وطلايب ومرض

والله انكم كبرتو همكم بانفسكم اتقوا الله في انفسكم وولدكم

الله يفرحك بشفائه ويحفظه ويبارك فيه

العضوة صدف الوادي اسمحي لي اقولك والله ماقلتي ولاكلمة صحيحة
قاعدة تناقضين نفسك بنفسك وانتي مو حاسة باللي تكتبينه
تقولين عندي بنت من ذوي الاحتياجات الله يشفيها وانك كل مامر من عندك طفل واعجبك تغضين بصرك عنه وتدعين له بالخير
وانا اطالب الناس بنفس الشي
انا كاتبة ماني مانعة الناس تطالع يعني يطالع اللي يبي يطالع نظرة عابرة ويغض بصره ومع الف سلامة بس سالفة اني اوقف اطالع له والا امشي ورقبتي وراي والا اشاور عليه والا اجي اسال هذا ولد والا ؟؟؟؟؟ هذااااا اللي اتكلم عليه ويغث اي ام طفلها طبيعي فما بالك بطفل مثل طفلي
ثانيا انا ماقلت احسدهم انا قلت اللي يسوون هالحركات ويجرحونا بنظراتهم ووقوفهم المفروووض حنا اللي نحسدهم ان اطفالهم متعافين وصحتهم متعافية مو هالبزر اللي وزنه وشكله ابو 9 شهورلاحظتي الكلام ؟؟؟؟؟؟؟؟ لاتألفين من عندك رجااااءا ماني ناقصتك
ثالثا انا ماقلت كل من مر ومعه طفله متعافي حسدته والا قلت ماعانى من مرض اتققققي الله لاتبليني ولاتظلميني ترا دعوة المظلوم مستجابة انا قلت اللي يبحلق ويتنح والا يشاور عليه الومه ليش يطالع لهالمسكين ويشاور عليه مع ان معاه اطفال ومتعافين
رابعا انا ماني سلبية ولااتبلى عالعالم انا اكثر وحدة عانيت من الامراض والتعب وظلم العالم ماني ناقصة اظلم احد احيانا اكون بعيدة امشي وراه وهو مع ابوه والناس جنبي مايحسبوني امه يتكلمون عليه واسمعهم والا يشاورون عليه مثل اللي صار بالملاهي قبل امس
رحت اشحن بطاقة العاب وهو مع ابوه مروا من عند حرمة وزوجها جنبي جالسين وانا واقفة اشحن وهي تطق زوجها مع رجله وتوريه وتشاااااور اسمعهم واشوفهم عسى عيوني للعمى والله لايوفقني ان كذبت عليها او تبليتها ومااااااني مجبورة احلف لك ولالغيرك
خامسا اي طفل سواء زين او شين هذا مايعطي الناس الحق تصرف معانا هالتصرفات الوقحة يحترموا مشاعرنا واحساسنا ويراعون الله قبل كل شي في هالمسكين والله اننا نشوف بزارين حلوين وصحتهم حلوة واني اتحاشى اطالع لهم عشان ماسبب لاهلهم حساسية او احراج واذكر الله
سادسا : راحوا معاي جارات لي وشافوا الوضع بنفسهم ومابي اقول وش قالوا ربي يشهد علي اننا طالعين بالدرج الكهرباء وكذا وحدة وواحد نازلين بالسلم الثاني وطايحين تبحلق فيه من وهم نازلين لما يتعدونا وجاراتي يوروني شوفي تطالع او يطالع اقول اشوفهم الله يعمي عيونهم مع ان فيه غيرنا بالسلم قدامنا وورانا وبالممرات نفس الشي واخس شي في المصاعد الاصانصيرات
الله لاااايوفقني كم مرة نتعرض لمواقف واحد معاه زوجته ماسك يدها قدامنا وانا اسكر الشنطة وهو يشاور لزوجته عليه قداااام عيني بكل وقاحة
اسالك بالله وش ترتجين مني اقول الله ياحظي يطالعون للبزر ومعجبهم وتاركين اللي معانا بالمصعد ويتشاورون عليه ... اهل العقوووول برااااحة والحركات ذي من يسويها غير ناس سفلة وقمة في الوقاحة والا فيه رجال وحرمة عاقلين يسوون هالحركات
وراحوا معاي زميلات من العمل ونفس الشي شافوا وقالوا لاتحرقين دمك لهم رب يحاسبهم
يعني ماني متوهمة
سابعا : الى قبل شوي دهنت رجوله بزيت مقري مليااانة كدمات زرقا وحمرا ومصورتها لو حابة تشوفينها ارسلها بالخاص ماعندي اي مشكلة
وترا من عمره 6 شهور وبدا يقرا عند المشايخ وندهنه بالزيت وهي تظهر لنا ويمتلي جسمه حبوب وكدمات والشيب اللي في شعره والماء اللي ماينقط في حلقه ولاالاكل ولا العصيرات وحرارة جسمه كل ماياخذون عليه حرارة يقولون هو عليه سخونة والا كذا جسمه اقولهم لا من ولادته جسمه حار
لدرجة والله اني اكون نايمة او ابوه ونصحى نحس بحرارة قريبة لنا يوم نتنبه نلاقيه متقلب في نومه وقريب لي ولا لابوه ومعروف حرارة الجسم من العين
سبحان الله اللي يشوفك استغفر الله يقول جاحدة ومنكرة العين
ثامنا تقولين الناس اللي يطالعون له ماهم قاصدين يضرونكم لانهم مايعرفونكم مدري اضحك او ابكي من كلامك
ليش من اللي مفتي لك ان العين ماتجي الا من الاهل والمعارف وان العالم مجرمين انا ماقلت كل الناس قلت الناس اللي تصرف معانا هالتصرفات شسوي لهم مضايقينا وسواء شكيت او طلبت حل او فضفضت هذا من حقي ولاتقدرين تمنعيني
تاسعا اقسم بالله قسم اسأل عنه يوم الدين ان كذا دكتور شافه لاتقولين سعودي من ربعنا وموسوس بالعين والحسد لا وربي مصريين وباكستانيين وعربيين
وممرضين شيعة وسنة كلهم لما يشوفونه ويشوفون كدمات جسمه وحالته يقولون لنا اعرضوه على مشايخ وارقوه
اخرهم باكستاني الاسبوع اللي طاف يكتب العلاج ويقول كتبت له كذا وكذا عشان يده اللي تورمت ويقول بلهجته ماما اقروا ( معوزات ) عليه والله الذي لااله الا هو اني ماظلمته هذا كلامه واللي مجنني انه لاهو زين ولاشين وربي طفل عااااادي جدا مااااافيه زود على باقي الاطفال طفل نحيف عادي مثل باقي الاطفال
هل بعد كل هذا تقولين لنا حنا موسوسين وهل كل هذولا وشهاداتهم وثقافتهم وعلمهم متوهمين
صراحة لااااااااتعلييق
واضح انك متحاملة جدا وتحبين الانتقاد ولوم الناس وانك انتي دايما اللي على حق وكلامك هو الصحيح والناس كلها ماتعرف وتظلم العالم وتتبلى عالناس والدليل ردين كاتبة كلها انتقادات
انا موصغيرة ولازوجي صغير ولاحنا جهلة باللي يمر ويطالع ويمشي مصادفنا ولا اللي يشاور عليه او يوقف في محل ووجهه له وهو في عربيته عند الرجلين ويبحلق فيه ويخلي تسوقه
واذا دعيت دعوة مظلوم ومجروح ومغبون والله اعلم ودعوة المظلوم مستجابة في حق الظالم وان كانوا ظلمونا تصيبهم ان شاء الله دعواتنا وان كانوا مظلومين تاكدي ان الله ليس بظلام للعبيد ولن تضرهم بشئ
وواضح انك ماتعرفين شي عن حالة الطفل مثل باقي زميلاتي او العضوات الله يجزاهم كل خير على دعواتهم ونصايحهم والدليل تقولين عطيه عدد كذا لقمات ووقفي ترى الطفل عمره سنتين ماياكل لاااايشرب الماااااء عايشة عالرضاعة ولايعرف عصيرات او فاكهة او اي نوع اكل واللي يطرشه الحليب
وقبل كم يوم طرش علي بالسيارة وحنا قريب المستشفى وعندنا مراجعات ويشهد علي ربي اني راجعت وسط العالم والناس تفرج والممرضات يبعدون عن عبايتي وقت الكشف ودخلت العيادة وخلصت وحجزت مواعيده ونص عبايتي تطريش حليب ابيض البيت بعيد ولو رجعنا طاف علينا الموعد
والله وحدة يعلم بالحال واللي نواجه ونعاني فيه اشياء مابي اكتبها ولااصرح فيها ولاتنكتب في الانترنت

ياقلبي ماتصدقين قد ايش تاثرت عليه الله يشفيه ويخليه لك وتشوفينه عريس وهوبصحه وعاافيه

لكن ي اختي انتي وولدك كلكم محتاجين رقيه انتِ شكلك مصابه بعين قويه واثرت عليه ياعمري
اذا رحتي شيخ ارقي نفسك وولدك وشغلي سورة البقرة ‏في بيتك

انا اختي عندها ولدها تعبان عمره قريب الثلاث سنوات ولاينقلب ولايتحرك والحمدلله ع كل حال كل فتره يتعب
ودايم تشوف احلام غريبه وتخوف وقالوا لها انك انتِ مصابه بعين قويه وانتقلت لولدك والحين مع الرقيه تتعب هي ولدها

الله يشفيهم ويشفي ولدك وتفرحين بسلامته

شموس يابعد عمري الله لايحزن قلبك ويسعدك ويحفظ لك ماعطاك انتي وكل من ردت علي وراسلتني
وساعدتني بارقام مشايخ ومعالجين سواء عالعام او الخاص والله انكم خففتوا عني الكثير وريحتوا نفسيتي
اسأل الله انه يستجيب دعواتكم في هذه الامطار ويكفينا شر ماأهمنا
والله انك صادقة وكثير راسلوني ونبهوني على هالنقطة وانا كنت ناسيتها
حتى صديقاتي كانوا يقولون لي ولااهتم ولااصدق
الظاهر والله اعلم انها صحيحة مع اني ادعي واتمنى ياااارب انها مو صحيحة
بس اخر مرة قبل يومين كنا عند الشيخ ويوم بدا يقرا قبل يغمى علي واستفرغ قطع فجأة القراءة وقال لزوجي خذ البزر مابيه يتأثر
قلت لاخلصنا بسأله ويوم خلص كنت تعبانة واستفرغ بقوة قلت لاجيته مرة ثانية بسأله هل صحيح تنتقل العوارض من الوالدين لاسمح الله للاطفال
بديت اهتم من كم يوم بالموضوع مو عشان نفسي لاوالله انا ماهميت نفسي ولافكرت من سنين
بس مابي اطفالي لاسمح الله يعانون ماعانيت
كنت استفرغ طحالب خضرا ونشارة خشب ودم وورق شجر مثل الملوخية وكل استفراغي ريحة بحر
حتى المشايخ قالوا يمكن مرمي في بحر وللآن استفرغ مرات قطع خضرا والله يكفينا الشر ويشفينا واياكم والمسلمين
اسأل الله باسمائه وصفاته ان يشفي اختك وولدها وكل مسلم ومسلمة ويكفينا شر خلقه