همسه في اذن الناصحات..والمتزوجات بشكل عام

السلام عليكم ورحمة الله وبركاته..

مشكورات وما تقصرون والله يعطيكم العافيه على مساعدتكم لاخواتكم هذا شيء ممتاز وتؤجرن عليه ان شاء الله..
ولكن اين المشكله؟
المشكله هي انكم تشوفون المشكله من زاويه واحده..زاوية اللي تحكي المشكله فقط..وتبنون عليها اراؤكم..
على سبيل المثال (مشكله كل يوم القاها هنا) انا مو مقصره في حق زوجي واكتشفت انه يخونني..

بابدا بالزوجه..

انتي وش دراك انك مو مقصره؟؟يمكن من وجهة نظرك كذا بس هو يشوف العكس..
يمكن له احتياجات انتي ما تلبينها مو تكبر وعناد بس لانك مو متمكنه من سيكولوجية زوجك..وما تعرفين وش ناقصه بالضبط وتشوفين وشهي الاشياء اللي ممكن تسعدك او تكونين محتاجتها وتسوينها له..وهذا غير صحيح لان اللي يسعدك او اللي تحتاجينه مو بالضروره يكون نفس الشي اللي هو محتاجه منك او يبغاك تسوينه او تتبعينه..
افهمي زوجك وشخصيته وتكوينه النفسي وشوفي وش يحتاج واعطيه..وشهو الجو المناسب له ووفريه..مثلا تشوفين منه كلمة حب بالدنيا وما فيها..على بالك هو زيك؟؟هو بالمقابل يحتاج تحسسينه بانك واثقه فيه على سبيل المثال..
ما اقول ما بينبسط اذا قلتي له احبك..لكن فيه اولويه في الاحتياجات..
احتياجاتك انتي ورغباتك تختلف عنه هو..
انتي انثى وهو رجل..
يمكن اعتقد انه بيلقى اللي محتاجه عند غيرك..لانك ما وفرتي له اللي يبيه..
اساليه بطريقه غير مباشره عن رغباته واسشعري احتياجاته واقرئي كتب علم نفس تفيدك والله..
دامه طلع برى يعني اكيد فيه خلل..مو شرط يكون منه لانه طلع برى عينه زايغه
(انا ما ابرئ ساحة الرجال فيهم اللي عيونهم زايغه وما يرضيهم شي ولكنهم القله)
يمكن الخلل منك وانتي مو حاسه زي ما سبق وقلت..
وكذلك قولي له انتي وش تحتاجين وجيبي له كتب..لا تعتقدين انه اذا يحبك بيعرف من نفسه وش تبين هو غيرك هو غير عنك شخصيته غير سيكولوجيته غير..لا تقولين ما يعرف لي يعني ما يحبني..بالعكس هو يكون يحبك بس مو عارف شلون يوصل لك..او يشبع احتياجاتك ورغباتك..
يعني الكلام السابق ينطبق عليك وعليه..

نجي للناصحات الان..

غالبية الردود اللي اقراها تكون ادعي ربك وصلي وهذي الردود الزينه ما قلنا شي..
بس يجيك بنات يقولون البسي وتمكيجي وغيري تسريحة شعرك..

كذا انتم خذتم قشور المشكله وما دخلتم لبها..اللبس والتكشخ مو كل شي..بعد 20 سنه او 30 سنه ما بينفع هالتسنع بيكون الجمال الخارجي راح..ما بيبقى غير التفاهم..

او تجي وحده تقول رجال زي كذا ما ينقعد معاه..طيب ليه الشعلله بدل ما نهدي الوضع؟؟

او تجي وحده تقول اصبري عشان العيال؟؟ طيب اللي بيصبرها اليوم ما بيصبرها بكره واللي يصبرها بكره ما بيصبرها عقبه بتوصل للحد اللي تنفجر فيه..لانها طول هالوقت هي كاتمه بنفسها وهو يتمادى..

وانا ما اقول انها هي غلطانه..بس انا قاعده اتكلم معها هي..حاولي تناقشينه وتتكلمين معاه باسلوب بعيد كل البعد عن الهواش والتعصيب..صفوا القلوب وليتعامل كل واحد منكم مع الاخر بناء على شخصية الاخر وتكوينها وليس على شخصية المخَـاطَـب..

ومو قاعده اقول ان الرجال كلهم عسل في عسل..او كل البنات غلطانات..
لا ابدا..
زي ما فيه الزين فيه الشين..


وانصحكم بكتاب سيكولوجية الرجل والمراه بيفيدكم كثير في معرفة الطرف الاخر..


وفيه نقطه ثانيه حبيت اتطرق لها..
فيه بنات يتضايقون من امهات ازواجهم او اخواته..بدون سبب..
اللي ما تبغى ام زوجها تزورها كثير لمجرد احساسها بانها لزقه..او اللي تتضايق من اخوات زوجها لان زوجها يخدمهم..
انا اقول لكم خافوا الله بكره بتنحطون مكان هالام او هالاخت..ويمكن يُــتصرف معكم بنفس الطريقه اللي تتصرفون فيها..
لا تغارين من ام زوجك او اخواته..وخدمته لهم المفروض تبسطك..لان اللي ما فيه خير في اهله ما فيه خير في الناس..والعكس صحيح..
المفروض تتضايقين اذا ما سوى معهم كذا..لانك بتقولين بنفسك اذا امه واخواته كذا يعاملهم اجل انا وشلون بيتصرف معاي؟؟
عاملوهم بالتي هي احسن وهالدنيا دار فناء..واللي بتسوينه الحين من خير او شر بينحسب لك او عليك في الاخره..

في النهايه ما ابغى اي وحده تزعل مني او تتضايق من اللي قلته..
والسموحه منكم..


اختكم..
سبائك العسجد..