صباح الخير على احلى ليبيات
سلفية صحيتى على الرد والله يبارك فيك حبيبتى وانى جبت وليد
امواج ما شاء الله عليك نورتينا الله ينور عليك وانت شكلك بالك واسع
لا وضحكتنى عبارتك اه يا ريتنى نرضع <<<<<<<<<خخخخخخخ
جيبى ورضعى وافتكى من الريجيم
امواج انى نحب اللهجة الشرقاوية مووووووووت ونحب نقرا اللى تكتبى فيه
لأن عندى ناس نعرفهم من الشرق عزاز على وااااااااااااجد
المهم تسلمولى كلكم
وانى اخر اخبارى توة توة كيف فقت من النوم وفتحت النت وفتحت الموضوع هذا
وسلامى لجميع

السلام عليكن يا احلى ليبيات
شكرا يا امواج وصحيتي على تعبك نردوهولك في الفرح انشاءالله
كريمة الاقدام كيف انحصلها هادي ما فيش في ليبيا المشكلة عندى قشور مش شقوق ودرت علي كريمة باهية ما لقيتش الدرج مليان لكن بدون فائدة وعندنا الموجود بس ماركات تجارية وما نفعتش للاسف هيا بالسلامه توا بنعدى اندير الغدى كان صار شكلهم اليوم بيتعشوا بيه

زوبة اهلين حبيبتى انت فى ليبيا مرحبتين بك
بالنسبة للاقدام انى نحس ان الكريمة بروحها ما تنفعش انى مرة قريت طريقة حسيت بها تجيب نتيجة
وانى ما نتفكرش فيها مزبزط بس اللى فهمته انك تحطى فازلين وتلبسى شخشير <<<< كلمة مشفرة
اتحدى غير ليبية تفهمها خخخخخخخخخخخخ
المهم تقعدى به طول اليل وبعدين فى الصبح تنقعى رجليك فى مية دافية وبعدين تحكى قدامك بالرشادة الخاصة متاع الرجلين ولو تستمرى على هذه ديمة تمشى التشققات والرجلين ينعموا
طولت عليك المهم شن درتى غداك معليش التقصقيص لازم منه
وصحتين مقدما
وين باقى الليبيات

مشاالله مشاالله علي بنات بلادي
منورات ديما ان شاءالله
مشاالله عليك يامواج شكلك موسوعه خبره في كل شئ يعطيك الصحه على المجهود
ومراااااام مبروك الوليد ان شاءالله من حفظه القران
وكيف حالكن عيوني سهاره وسلفيه وزوبه وحياه حلوه
وبنسئلكم علي رجيم الملفوف كيف؟؟؟؟
وبارك فيكن مقدما

السلام عليكم

مساء الخير كيف حالكم اليوم

وان شاء الله يا ربي اللي بيديرن ريجيم ينقص وزنهن
بالنسبة لي انا نبي تسمين مش ريجيم
......... انا وزني عاجبني ولكن الناس اللي نعرفهم يقولوا لي ضعيفة
حتى خطيبي قال لي ضعيفة ولازم وزنك يزيد !!!

**************
اما بالنسبة للبشرة والشعر
هذا يا غاليات انا شعري يتساقط و ومتقصف وويتكسر صغير صغير وعندي قشرة ومرات تطلع لي حبوب صغيرة في راسي
مشيت لدكتورة جلدية عطتني فيتامينات خديتها شهر وبعدها زادتني ثاني فيتامينات شهر المرة الثانية ماكملتهمش شهر ... ودرت تحاليل وقالت لي القشرة سببها الفطريات وعطتني حبوب 10 ايام , وشامبو للقشرة
وعطتني Hair tonic ندهن به فروة الراس مرة في اليوم , ولوشن حتى هو ندهن به الحبوب لما يطلعن

ولكن انا مع حاجات الدكتورة هذي جربت خلطة شفتها في المنتدى متاع حنة وبصل وسدر وانا زدت عليهم محلب تنقعيهم بمية ليلة وتغسلي بيهم شعرك الحق عجبتني مع اني مادرتهاش الا 4 مرات نقص التساقط هلباااااااااا وبعدها ماعاد درتها لاني كنت الايام اللي فاتت مش فاضية ولكن ان شاء الله بنرجع انديرها
اما لوجهي انا بشرتي دهنية عطتني الدكتورة غسول بس
ولكن انا نستخدم في دواء ينحي الرؤوس السوداء نزلت صورته قبل في المنتدى ومعاه واقي شمس

اما البنات اللي يشكوا من التشققات في الرجلين احسن شئ كريمة الجليسوليد الحمراء
هذي فظيعة تهبل ..... تدهني بيها رجليك في الليل والصبح تستعملي الحجر متاع الرجلين

بالنسبة لي انا ماعنديش تشققات في رجليا ولكن ندهن بيها في ايديا للمرفق تخلي لي ايديا ناعمات


********
زوبة الحبوبة تسألي عالعبمبر بجوز الهند
انا نعرف طريقة ولكن ماجربتهاش
نكتبها لك ولكن مش على مسئوليتي

جرام سكر ( 1.5 الى 2 كوب )
200 جرام جوز هند ( 2.5 الى 3 كوب )
8 بياض بيض
فانيليا

يخلط السكر وبياض البيض والفانيليا حتى يذوب السكر يصبح المزيج ثقيلا ( يبدأ كيف الميرنج )
يضاف جوز الهند

وتشكل بطريقتين
1: يوضع الخليط في كيس ثم يصب دوائر متباعدة ويزين باللوز ويخبز

2: يضاف كمية اخرى من جوز الهند حتى تسمك العجينة وتوضع في الثلاجة حتى تتماسك ثم تصب في قوالب الورق الى المنتصف وتخبز

وصحتين


وكان جربتيها قولي لي

يا بنات انا بنسألكم على موقع نرفع عليه الصور لان الموقع اللي كنت نرفع عليه وصلتني منه رسالة ان انا استخدمت كل التبادل المسموح بيه في الشهر
وفي موقع ثاني نستخدم فيه حجم الصورة لازم يكون صغير هلبا وانا اغلب الصور اللي عندي حجمهم كبير


سامحوني طولت عليكم

سلامات