الله يصبرك قولي آمين
واحنا الحين في شهر فضيل ان شاء الله ربي
ينصرك ويهدي سرك
وانصحك هذا طبع في زوجك ما راح تقدري تغيره
المهم بس تدعين له في ظهر الغيب والله يوفقك قولي آمين :26:

إلى الأخت العزيزة amaatollah هذه ثاني مشاركة لك . والله يا أختي العزيزة كلامك صحيح 100% بس المشكلة إنه صعب تقنعينه بشئ وهو مقتنع بشئ آخر وكلامك عن الخدامة كله صحيح وأنا عارفة إنها تستغل الطيب بس شنو طالع بإيدي إذا بس أنا قلت له مابيها إنها تقعد معاك بهالطريقة لكي لا ترجع المشاكل مرة ثانية خليها بشغلها وبس والله صدقيني ما خلاني أكمل كلامي ومثل ما قلت من قبل صارت خناقة كبيرة بس لأنه سمع صوتي معاها عباله إني أنصحها أو شئ ثاني وحاولت أوضحله بس ماكو فايدة وصارت زعلة وهالكلام من يوم الأربعاء للحين وحاولت إن أصالحة مع إني مو مسوية شي قالي صحيح إنت ما سويتي شي بس أنا عارف راح تدخلين وتتكلمين معاها وبدا بالتجريح والإهانات وصدقيني ما قدرت أتحمل كلامه.
. وعلى ما قالي إني ما أعرف اشلون أنصح ولا أدرس ولا أفهم وكله يصير بالعكس ويقول أنا ما أقدر أعتمد عليك بأي شئ وإنه أنا مو مثل الحريم اللي يعرفون اشلون يتصرفون وإلا كان تركني أتصرف بكل الأمور بس على كلامة إني ما أعرف شئ وأخبص الدنيا فوق تحت . ومثل ما قلت هذا أنا مو مسوية شي وصارت الزعلة فما بالك لو صج شنو كان سوا . مع العلم لما كان ما يحاشيها بسبب اللي عملته بالسفر والإحراج اللي سببته هناك وكانت تبي تسوي نفسها هي المدام وما تبي تبين إنها خدامة فأنا كنت عارفة إنه خلاص بمشيها على حسب ما قالي لأنها طاحت من عينة وصدقيني كنت مستانسة وعلى أساس بعد فترة نييب واحدة غيرها وخصوصا إن إقامتها بتخلص بأول نوفمبر ويبي يمشيها بأسرع وقت حتى قبل ما تنتهي الأقامة وفعلا حاول كم مرة وصار في اتصالات وشافت بيوت وإلى آخرة بس على أخر لحظة عرفت اشلون تلعب بعقله وصار يفهمها على الأخطاء واعتذرت وقالتله أنا ما أوعدك ولا أحلف بس راح أحاول . وشوفي بسبب هالكلمة كبرت في عينة وسامحها وقالي أنا حسيتها فعلا بتتغير وقالي السالفة كلها وخلاني أكون بعيدة عن الموضوع علشان ما أخرب حبل أفكارها لأنها تبي تتعدل ( شوفي التفكير الجهنمي ) ومو بس شذي صار يقولي شفتي اشلون الخدامة طلعت أحسن منك وعندها مخ وتبي تتعدل مو مثلك وصار يفرق بيني وبينها بكل شي هي شذي وإنت شذي ما تتصورين اشكثر جرح مشاعري وشني أنا اللي مسويه كل المشاكل من قبل مع إنه كان يقولي لا تنسي شنو سوتلنا وقلة أدبها وووو ........ وبالآخر شوفي اشلون تصرفه هذا اللي محيرني ليش ما أدري شذي فجأة . وبالآخر تقوليلي أتدخل أو اشلون أسمح بهالوضع صدقيني إني أتعس إنسانة ومو مستانسة أبدا من هالوضع يعني أنا أنام عند البنات وإذا يبي شي يناديها وشني مو موجودة ويخليها ادلكه ساعات بغرفتي وشني مو اهني شنو تتصورين الحين حالي ومو بس شذي بالأمس قاعد وياها علشان يختاروا لون صبغ جديد للصالون والممر وقاعد ياخذ رايها وأنا عند غرفة البنات شنو رايك اشلون تبيني أتصرف . أي تصرف مني مو مقبول عنده وإذا بتكلم راح يقول ليش إنت عندك ذوق باختيار الألوان . علشان شذي ما أتدخل أنا أقدر أسوي مشكلة وأنتهي من هالسالفة بس ليش أزيد النار حطب علشان شذي صابرة ( إن الله مع الصابرين ) . في شي أنا لاحظته وما أدري شنو السبب , لما كان زعلان وياها وبعاد عن بعضهم هي بشغلها وبس وإذا يبي شي يطلبه مني وبس وكنت ألاحظ عليها الضيق والغيرة حتى قالت لأخي شوف اشلون نفسيتها مرتاحة لأننا متزاعلين ولما رجعوا مع بعض عادي بنفس اليوم أو ثاني يوم أنا وزوجي تزاعلنا بسببها وبدون ما أكون خطأت بشي وصار يعاملني مثل ما كان يعاملها بالضبط وهما بعاد عن بعض , هل هي عندها عين أو حسد أو لعنة معينة شنو رايكم بالموضوع هل هالشي هذا من عينها ولا أنا غلطانة .
( سامحوني على الأسلوب بس من الحيرة ).

قلتيلي أخليه ينشغل برة صدقيني اشكثر حاولت نفسي يطلع برة على الأقل المشاكل تخف بس وين يروح ما عنده أصدقاء وما يحب يطلع عند أحد وأحيانا يعزمونه بس يعتذر وما يروح وأنا بدوري أقوله ما يصير لازم تروح تستانس ومن هالكلام بس ما كو فايدة دائما يقولي ليش أضيع وقتي بحشي فاضي عندي كمبيوتر أستفاد منه أحسن . حتى أهلة بالحسرة نروح عندهم ( يا أختي ما يحب أهلة لا أمه ولا أبوه ولا أخوانه ) مخلي الكل بعيد عنه ( من عصبيته وانتقاداته ) . يحب قعدة البيت وما يطلع . الله سبحانه وتعالى ابتلاه بأشياء كثيرة سيئة وفي شغلات ما أحب أقولها وأوضحها أكثر وفوق كل هذا متحملة وماكو فايدة .
وبالنسبة للشرائط الدينية هو من النوع ما يقتنع بأي واحد وإذا يبي يسمع يسمع بالخفية بدون ما أحد يشوفه وعلى ما عرفت إنه يسمع قرآن كريم في السيارة لما يكون لوحده وصدقيني ما يقولي . لا تأخذي فكرة عنه إنه بعيد عن الدين فهو يحب مساعدة الفقراء والمحتاجين وكريم جدا معاهم وخصوصا كافل اليتيم وهالأشياء بس تعالي قوليله إقرأ قرآن يقولك ما أقدر ما أدري ليش ونفس الشي حق الصلاه يمكن بالسنة أربع خمس مرات اللي يصلي فيهم . صدقيني حاولت معاه وعلمت ابنتي الصلاه علشان يحس ويشوف ابنته الصغيرة ويمكن من الخجل يصلي بس ماكو فايدة وصدقيني ما يشجعني إني أخليها تصلي ويقولي خليها على راحتها لا تعقديها .
( لأنه متعقد من أبوه من ناحية الصلاه والدراسة كله كان بالضرب والصراخ ) .
بس أنا ما أسمع كلامه وأحاول أفهمها من وراه لما أكون معاها لوحدنا والله يساعدني .

زوجي عنده قناعه إن الأعمال بالنيات ودائما يقولي شنو الفايدة أصلي وأتعبد الله وبالآخر أرتكب معصية أو خطأ ودائما يقولي هذيلي الناس اللي يروحون المساجد وما يتركون فرضا كلهم سرسريه ويغطوا عيوبهم بهالطريقة ( هذه فلسفته وأنا ما أقدر أغيرها وخصوصا لما يشوف بعينة ويسمع قصص عنهم ) .
اعذريني أيتها الحبيبة وأشكرك للمرة الثانية على مشاركتك لي وإن شاء الله سأعمل بالنصائح وخصوصا الأدعية .
وكل عام وأنت بألف خير وينعاد عليك إن شاء الله .

قولي الحمدلله
بعد قولي الحمدلله
وبعد قولي الحمدلله

هذا من فضل ربج انه يزعل منج ويهجرج .........اختي انتِ تعرفين حكم اللي مايصلي ؟؟شو ؟
اصلا مايصير انج تعشين معاه
البارحة كتبت لج رد بس صار خلل في السيرفر وماوصل الرد
بس ردج الاخير اللي شفته اليوم قلت الحمدلله ان ماوصل
=================
اختي انتِ اسلوبج مافي شي وراييل وايد يتمنون حرمة مثلج
الخلل في هو مش فيج انتِ
وفي راييل اذا كانوا يشوفون الحرمة احسن منهم
يقللون من قدرها
بس عشان ماتكون افضل منهم
بس الظلم ظلمات
وربي دايما مع المظلوم

============
بس بقول لج ولاي وحدة تعاني من نفس مشكلتج
اختي في حريم يتمنون ان ازواجهم يقعدون في البيت او انهم يشوفونهم
مايرجعون الا انصاف الليالي والحرمة والعيال يكونون نايمين

مايتلاقون الا نادرا
فقولوا الحمدلله
==========
وفي حريم يتمنون انهم يطلعون مع ازواجهم مشوار واحد
على طول ...هذا الكلام ...انا مشغول شوفي الدريول ...اتصلي حق اخوانج روحي مع رفيجاتج
تتمنى طلعة معاه وماتحصل
فقولوا
الحمدلله
=====================
واللي تتمنى انها تكون في بيت منفصل مع زوجها ومش لاقية
وقاعدة مع اهل زوجها وزحمتهم
فقولوا الحمدلله
=============
واللي تتمنى طفل بين احضانها
واحمدوا الله على نعمة العيال
=========
واللي زوجها بخيل مايعطيها شي
ويحاسبها حتى على راتبها

واللي تتمنى انه يتحرك من مكانه عشان يشرب كاس ماي
ويعاملها كخادمة

الحمدلله على نعمه التي لاتعد ولا تحصى
============
مافي انسان كامل وهذي الدنيا دار ابتلاء
والصبر له اجر عظيم عند الله وهو مفتاح الفرج

========
واذا الريال مايصلي مايجوز انج تقعدين معاه
وسبحان الله اللي مايصلي يكون بعيد عن رحمة الله
ويكون قريب من المعاصي
========
واللي يقول انما الاعمال بالنيات
الاعمال بالنيات حق اللي يصلون ويعبدون ربهم
والايمان ماوقر في القلب وصدقه العمل
===============
عيل في كثير من اهل الكتاب نوايهم سليمة واعمالهم كلها خير ..بس لايصلون ولا شي
==========
انا ما ابي اخرب بيتج
ولا ابي احرضج على زوجج

اتمنى ان الله يهديه ويرزقه الصلاح والفلاح
ويجعله قرة عين لج ولا بنائج

===============
زوجي فيه بعض طباع زوجج الالانتقادات التي لاتعد ولا تحصى
اول كنت اصيح واتكلم وتصير مشكلة
بس احين ارد عليه ردود تسكته
اذا كان يعيب على خلق
اقوله هذي خلقة ربك شو اسوي تقدر تراجع ربك يسكت
وبعد مرات يكون معصب وانا مبتسمة واقوله حلاتك وانت معصب يسكت
ردودي كلها تكون ببرود
لا اعور قلبي
والحمدلله احين هو مايعطيني مجال اني ازعل
اذا صارت مشكلة
يكلمني نفس الوقت ولا كأن صار شي مثل قومي ايبيلي ماي (( وانا اوني زعلانة وهو غلطان علي ))
وما اجري الا على الله

اختي
في كل شي احتسبي الاجر من الله سبحانه
وكل الم وكل اذى نتلقاه في ها الدنيا تراه من جراء ايدينا ... وتكفير للذنوب والحمدلله

=========================
قولي معاي
اللهم اجرني في مصيبتي واخلفني خيرا منها
اللهم لا اله الا انت سبحانك اني كنت من الظالمين

==============
اذا كنتِ تقدرين تكلمينه الليلة عن الصلاة فكلميه
يزعل مايزعل قوليله مايصير ان تقعدين معاه وهو مايصلي
========
وعلى طول روحي وصلي استخارة
انج تسالين ربج انج تعيشين معاه ولا لا

وربي يوفقج دنيا واخرة ويهدينا واياج الى الطريق الصحيح

والسمووووووووووووووحة


واللي تتمنى ان ي

معذرة

عين العقل