شوفي قلبو , جربي هالعجينة وماجاك عندي وهي للأخت همسة الشوق :)

وهذا كلآم الأخت همسة

أول شي ببدأ بمقادير وطريقة العجينة..
2/1-3 ك طحين (طحين رقم 1) { طبعاً انا استخدم الكويتي }
3 م ك حليب بودرة
3 م ك سكر
1 م ص ملح
1 م ك خميرة
1 م ص باكنج باودر
4/3 ك لبن دافئ أو روب
4/3 ك ماء دافئ
4/1 ك زيت

(( ك = كوب ... م ص = ملعقة صغيرة ... م ك = ملعقة كبيرة))

أول شي نخلط المقادير الناشفة والطحين أول شي فقط نضيف 3 ك ونضيف السوائل ونخلط وبعد العجن نشوف اذا العجينة تحتاج طحين زيادة أو لأ .. أنا بعض الأحيان تحتاج أزيد وبعض الأحيان لأ .. بس الأغلب 2/1-3 ك تكون العجينة ممتازة المهم في النهاية تكون عجينة طرية ولينة .. وانا أعجنها في العجانة تقريبا لمدة 10 دقائق أو اقل بشوي ..

وبعدين نترك العجينة تخمر .. ونبدأ في تشكيلها..
___________________________________________________

والله يآأختي عن تجربه كل من ذاقها طلبها مني لانها طريييييه وهشه ومايصير لها شي لثاني يوم
وناس ماكانوا يتقنون الفطائر وضبطت معاهم بهالعجينه
وانا استخدم عجانة كينود أول مره اخليها على رقم 3 لحد ماتتجمع العجينه مع بعض بعدين لـ 5
واخليها 5 دقائق الى 7 بالعجانه ولما أشكلها وأحشيها اخليها ترتاح ربع ساعه او 10 دقائق وادخلها فرن حار وهذا الشي يخلي العجائن تكون منتفخه وهشه وطبعا النار خفيفه ولاتخلينها تتحمر بزياده
وان شاء الله تنحل مشكلتك :)

خمري العجينة بعد العجن حتى ترتفع ( اتقيدي بمقدار الخميرة المطلوب ولا تزيدي فيها لأن كثرة الخميرة تفسد العجين )
حمي الفرن على حرارة 200م وشكلي العجين واخبزيها حتى ترتفع وتنضج خففي الحرارة شوي وحمريها من فوق شوي ( لا تطولي في خبزها 10 - 15 دقيقة تقررررريباَ )
وإن شاء الله موفقه :26:

رفع

شوفي حبيبتي لازم اول ماتدخلينها الفرن يكون الفرن حار تحمرينها من تحت بعدين تقصرين على النار وتحمرينها من فوق واول ماتطلعينها من الفرن تحطينها بحافظه لوقت التقديم وراح تطلع معاكي طريه وتجنن

حبيبتي ... اول شي ... تاكدي من قوام العجينة اثناء العجن ... يعني بعد ما تعجني المقادير في العجانة ....( افضل عجنها على سرعة بطيئة او سط ) بعدين شيليها من العجانة وعجنيها شوي بيدك حتى تتاكدي انها ناعمة وما تتلصق كثير وايضا غير قاسية وحطيها في وعاء التخمير مدهون بشوي زيت وخليها تتخمر حتى يصير حجمها مرتين يعني تتضاعف ... بعدين شكليها وحشيها ...

نقطة لا تنسيها ... بعد ما تصفين القطع بالصينية ... شغلي الفرن على حرارة عالية واتركيه ... وخلي الفطاير ترجع تتخمر مره ثانية ... ممكن تاخذ ربع ساعة او اكثر اذا كان الجو بارد ... خلي القطع تكبر ... في رايي هذي النقطة مهمة جد جدا حتى تكون الفطاير خفيفة وهشة ... بعدين دخليها الفرن الحار ولا تتركيها اكثر من 8 دقائق ...حتى ما تجف وتنشف وتصير قاسية بعد الخبز ... وبس تطلعيها حطيها بين فوطة نظيفة وبعد ما تبرد شوي خليها بحافظة ....

في النهاية ... العجانة او العجن لهم دور بس ايضا التخمير و قوام العجين والخبز كلهم لهم دور كبير ...
يعني باختصار ..

مقادير مضبوطة + عجن كافي لانتاج عجينة ناعمة + قوام مضبوط + تخمير اولي + تخمير ثاني بعد الفرد والحشو + خبز مدة قصيرة في فرن حار مسبقا + تغطية الفطاير بعد الخبز وحفظها عن الهواء = فطائر طرية وخفيفة ...