رز مشخول..
رز بسمتي معمول بماء سلق اللحم و2 مكعب ماجي وزينيه بصنوبر مقلي بشوية زيت وزبدة..





فطاير سبانخ وبيتزا..
هذي عجينة خالتي طرية ومقرمشة بنفس الوقت ولذيذة..

مقادير العجينة:
كيلو او كيس طحين "انخليه مرة او اكثر <<< لازم"
1\2 ك زيت
3-4 م ك حليب بودرة
1 م ك سكر
1\2 م ص بكن بودر
1\2 م ص بكربونات الصوديوم
م ص خميرة
ملح
ماء دافيء للعجن

الطريقة:
ذوبي الخميرة بماء دافيء وسكر وخليها لحد ما تصير مثل الاسفنج ، اخلطي كل المكونات الجافة ثم اعجني الخميرة والزيت معاها وابدي ضيفي بالماء لحد ما تتكون عندج عجينة طرية وماتلصق ياليد ، وخليها تتخمر نص ساعة او اكثر ، ثم كوريها وخليها ربع الى نص ساعة تتخمر مرة ثانية ثم احشيها وشكليها وخليها ربع ساعة تتخمر وادهنيها اما حليب سائل او بيض مخفوق مع خل ورشي الوجه بالسمسم قبل ماتدخلينها الفرن "حمي الفرن مسبقا 180 لمدة 10-15 دقايق على حسب سمك العجينة وبالعافية..


حشوة السبانخ الحامضة اللذيذة جدا ..

المقادير:
4 ك سبانخ مفروم
1 ك بصل مفروم
1\2 عصير ليمون
1\4 ك سماق
م ك فلفل اسود
م ك بابريكا
ملح
زيت

الطريقة:
احمسي البصل بالزيت ثم السبانخ وقلبي ثم ضيفي البهارات وخليه لحد ما يبدا ينزل مايه وقبل لا ترفعينه من على النار ضيفي الليمون وخليه 5 دقايق واخلطي وابدي احشي فيها بدون السائل :) ..










ديك رومي بالفرن وخضار سوتيه لذيذ جدا جدا جدا خصوصا اني من عشاق الرومي..

المقادير:
ديك رومي "النوع اللي استخدمته بتربول ويعتبر من ألذ الأنواع اللي جربتها ، أما الحجم 5 كجم من مركز سلطان "
التتبيلة الليلية:
2 حبة ليمون كبيرة مقطعة ارباع صغيرة
راس ثوم كبير مقطع بالقشر

التتبيلة النهائية:
ك صويا صوص
4 م ك كمون
4 م ك فلفل أسود
2 م ك دارسين
ملح و2-4 مكعب ماجي

3\4 اصبع زبدة صغير
ماء

الخضار:
كوسا قطع كبيرة ، بطاطس قطع كبيرة ، جزر قطع كبيرة ، فلفل بارد ، "طماطم <<< مانضيفها الا باخر ربع ساعة"

الطريقة:
ذوبي الثلج من الرومي ثم اغسليه عدل وافركيه بشرائح الليمون والثوم بالقشر من داخل وبره حاولي وانت تفركينه تضغطين على الليمون والثوم عشان العصارة وخصوصا من داخل ، ثم لفيه بكيس ودخليه الثلاجة مو الفريزر طوال الليل..
طلعيه من الثلاجة ثم شيلي كل الثوم والقشور والليمون من الديك الرومي..
ثم تبليه بالتتبيلة الثانية من داخل وبرة وخليه ساعة او اكثر قبل مادخلينه الفرن ثم ضيفي 3-4 ك ماء بصينية الفرن وحطي الديك عليه وضيفي البطاطس والكوسا والجزر على جوانب الديك وغلفيه بالقصدير عدل واخرميه بالشوكة مرة وحدة عشان يتنفس ودخليه الفرن على درجو الحرارة المكتوبة عندج "انا دخلته على 180 لمدة 3 ساعات" ، بعد هالوقت طلعي الصينية وشيلي القصدير ثم ضيفي الطماطم والفليفلة وادهنيه ب1\2 الزبدة من كل صوب حتى من داخل ودخليه الفرن يتحمر وقبل التقديم ادهني الديك المحمر بربع الزبدة الباقي من داخل وبره وقدميه بالعافية..

اهنيه صورته مع الفطاير :21: ..

الحلويات:
كريم كراميل وجلي
تمر وبلح
فواكه

سلطة فواكه خفيفة ولذيذة ..

المقادير:
علبة فواكه الحجم الكبير بس صفي العصير من العلبة
كل أنواع الفواكه اللي تحبونها "احنا استخدمنا : شمام ، موز، تفاح احمر واخضر ، برتقال ، رمان ، مانجو وعنب احمر"
عصير مانجو

الطريقة:
اخلطي الفواكه بعد تقطيعها الحجم اللي انتو حابينه "احنا نستخدم ملعقة تفريغ البطيخ الصغيرة لانها تسوي دوائر شكل وحجم واحد " ثم صبي عليهم العصير وخليهم لحين التقديم ..





المشروبات:
عصيربرتقال
عصير ورد
فيمتو
قهوة عربية
شاي



هذي كانت سفرة اليوم ان شاء الله تعجبكم يالغلا وانتظر رايكم فيها :) ، انتظروني باجر في سفرة مختلفة وجديدة بإذن الرحمن..

دعواتكم لأبوي الغالي ان الله يشفيه وطولنا بعمره وعمر أمي الغالية..
وان الله يرزقني الــزوج الصالح الغني بدينه وماله وأخلاقه اللي يفرح قلب امي وابوي..
والله يكتب لنا المغفرة والجنة بهالايام المباركة..
اللهم أميــــــــــــــــــــــــــن..

سفره رهيييبه ما شاء الله عليكم ...



بس عندي سؤال عن الديك الرومي... لما شويتيه قطع لحم الدجاج اللي داخل طلعت مستويه وإلا شويه فيها ماي.. لأنه ما شاء الله حجمه كبير .. وإنتوا بس شويتوه.. وإلا قطعتيه شويه بالسجين قبل ما ادخلينه الفرن؟؟؟

والله يعينكم على ريحة الصبغ ونعيماً عالصبغه اليديده

ماشاء الله تبارك الرحمن روووووووووووووووووووووعه

ومتابعتك من اول رمضان

والله يوفقك ويزوجك الزوج الصالح ويعافي ابوك

ويخليلك اهلك ولا يحرمك منهم..

وعلى فكره ترى عندي اخو..هههههههههههههههههههه

يعطيك الف عافيه :)