بحبك كثير :

هلا و هلا و هلا و الف هلا بكل الغلا بام فيصل و الله فقدتك من غير شر بس قلت اكيد امتحانات و مشاغل ان شاء الله امورك تمام الحين شوفي يا ستي ما اكذب عليك شخصيا انا مليت من رجيم كلي كذا و اشربي كذا و لاني متحدية نفسي اني لازم باذن الله اكسر حاجز الثلاث ارقام عالميزان قبل الاجازه لجأت لرجيمات الصنف الواحد لاني وزني كان في مرحلة سبات في الثبوت :) بالنسبه لك اولا انت قريبه من الوزن المثالي الصحي و ركزي على كلمه صحي ما شاء الله تبارك الله فعلشان يكون في نزول بالوزن و تحافظي على اللي نزلتيه لفتره طويله لازم يكون التغيير مو بس باكلك بل تغيير بكل اكل البيت بما انك تحبي تاكلي منه اولا حولي لزيت الزيتون و الطبخة ما يكون عليها اكثر من ملعقتين للبيت كله اقلك مثلا لما اسوي الكبسه مثلا اللحم او الدجاج طبعا اشيل الجلد و الدهون و اغليه غلوه لاطلع كل الدهن و بعدها اغير الماء علشان كل الدسم راح بالمي اي خضار احطها بالطبخ احمرها بالفرن بمسحة زيت صغيره او بخاخ زيت الدجاج و اللحم احمره بالفرن و ادهنه بشويه صلصه طماطم بدل الزيت ليتحمر و اذا بستخدم مكعبات ماجي او شبيهاتها استخدم مكعبات الخضار مو الدجاج احتمال تكوني انت تستخدمي هذي الطرق او وحده منها بس تخيلي لما نستخدم هالطريقة الصحيه بالطبخ كم عدد السعرات اللي نشيلها و نرحم اجسامنا منها كل نوع اكل نحبه في طريقة نسويه بطريقة صحيه حتى البروستد و هالاشياء و علشان كذا حطيت مسابقة شاركينا ابداعاتك لنشجع بعض عالاكل الصحي و نتعلم من بعض طرق جديده الحين نجي لنظامك ما تقدري تمشي على كلي كذا و سوي كذا اوكي اول حل عندك رجيم اللقيمات و بصراحة شخصيا عاجبني مره و باذن الله ناويه اتبعه بالاجازه ثاني حل امشي على نظريه الصحن المقسم و هي نظرية معروفة للمدرب المشهور جورج كروز و طبعا في اكثر من شخص تبنى هالنظريه بس انا قراتها اول مره في كتابه ٨ دقائق في الصباح المهم طريقة الصحن تعتمد على انك تستخدمي صحن وسط الحجم العادي نص الصحن يكون سلطه او خضار او حبه فاكهه النص الثاني تقسميه ربعين ربع تحطي فيه بروتين لحوم او اجبان او اي بروتين نباتي و الربع الثاني نشويات و الصحن كله يكون الدهون فيه ما تتعدى م ص سواء زيت او زبده و انت حره تحطيها عالخضار او عاللحوم او النشويات و بالهطريقة تقدري تاكلي من اكل البيت الصحي مع شويه تعديل و ممكن تستغني عن ملعقة الدهون في الاكل و تستخدمي هالطريقه قبل كل وجبة بربع ساعة انك تحطي م زيت زيتون ببيالة ماء دافي و تشربيها انا استخدمها لما اكون جوعانه جدااا و بصراحة تسد النفس بقوه و تخفف الشهيه و تنظف الامعاء و انتو بكرامة طريقة ثانيه مجربه مني و من غيري لسد الشهيه النسكافيه كوب نسكافيه بدون سكر قبل الاكل او بعد ما تاكلي كميه قليله يسد النفس و يساعد في حرق السعرات و تنزيل الوزن بنظام الصحن كمان تقدري تاخذي سناك مرتين باليوم و قطعة صغيره جدا بحجم عليه الكبريت حلا دايت او صحي السناك يكون نوع من : حبه فاكهه حبه خضار كوب جزر صغير زبادي قليل الدسم ١٠ حبات لوز ني نيجي لنظامك يا ام فيصل كنت الاحظ انك مثلا تلغي العشاء و تاخذي قطعه حلا و هذا خطا الحين ممكن يكون عشاك في نفس عدد السعرات اللي في قطعة الحلا لكن الجسم يتعامل مع هالسعرات بطريقة مختلفة ليش لانه في شي اسمه السعرات السالبه يعني لما تاكلي خضار الجسم يستهلك سعرات اكثر لهضمها و حرقها من السعرات الموجوده فيها يعني اذا كوب الخضار في ٨٠ سعر حراري الجسم يستهلك ١٢٠ سعر حراري ليفكك الالياف اللي في الخضار و يحللها و يحولها لسكريات احاديه يستطيع يمتصها بينما قطعة الحلا لنفترض فيها ٨٠ سعر حراري مع انه اقل قطعة حلا ٢٠٠ سعر لكن على سبيل المثال لنفرض انه فيها ٨٠ سعر حراري تمضغيها و تنزليها عالمعده اولا جزء كبير من السكر الاحادي اللي فيها الجاهز اللي الجسم مو محتاج يحرق سعرات ليطوله هذا السكر جزء كبير منه امتصه الجسم من خلال الفم و المريء لا تستغربوا اغلب الناس تعتقد انه الامتصاص فقط بالامعاء علشان كذا يشربوا الشاي و الاعشاب المسهله اللي ما منها الا الضرر لكن الامتصاص يبدأ من الفم و اللعاب و هو اسرع شي يوصل للدم و الدليل انه مرضى القلب الله يكافينا و يشافينا و يعافينا جميعا مرضى القلب في الحالات الطارئة ياخذوا الدواء بسرعه حبة تحت اللسان لانها اقوى ممر للامتصاص نحو الدم نرجع للحلا السكر امتص بالفم و الباقي وصل المعده مشبع بالدهون و السكريات الجاهزه اللي ما تبي شغل فتروح مباشره عالامعاء بدون هضم و هذي نقطه مهمه لان هالشي يسبب انتفاخ و عسر هضم و امساك يحاول الجسم يتخلص منه فيدفع بالسوائل باتجاه الامعاء اللي ممكن في بعض الاوقات يتحول اسهال و انتو بكرامه ما تلاحظوا انه مرات بعد الحلا تحسوا بعطش شديد المهم وصلت قطعة الحلا للامعاء و امتص كل السكر اللي فيها بدون مجهود و راح مباشره لمناطق التخزين في الجسم لانه اخذ كفايته من السكريات فبالتالي قطعة حلا فيها ٢٠٠ سعر حراري بالمعدل لا تعادل ٢٠٠ سعر حراري وجبة عشا او غدا و هذي النقطه اكثر الناس ما ينتبهوا لها و قيسي على هالشي السكر اللي في المشروبات الغازية ايش الحل الحل بسيط و هو الحلويات الصحيه اللي اساسها الفاكهه و المكونات البسيطه و بكميات قليله انا بدايت او غير دايت دائما هي خياري في البيت و للعيله كلها لانه الاستمتاع بدرجه الحلا في الطعام هي مساله تعود مش اساس بالحياة و عدا عن ذلك طريقة اكل الحلا ترى احنا نحس بالطعم من اول ملعقة او الثانيه و بعد كذا يتلاشى الطعم او الاستمتاع و نكمل القطعة او الصحن باللاوعي و من باب الواجب و علشان ما ينكب طريقة اكل الحلا تاخذي قطعه صغيره او ملعقة و تمضغيها كثير كثير كثير و تلفيها بفمك لحد ما تحسي انها ملأت الفم و سوت اشباع بطعمها و بعديها ابلعيها و لا تكملي انتظري شوي حسيتي بعد لك خاطر بالحلا خذي كمان ملعقة او قطعه صغيره و كليها بنفس الطريقة السابقة و بعدها انتظري صار جسمك يغريك تاكلي كمان اشربي كوب ماء كبير و سكري على كذا عندي وصفات حلا صحي كثيره لكن للاسف الوقت لا يسعفني لانه ضل اسبوع على سفري لكن ان شاء الله بحاول اول ما اقدر انزل لكم مشاركات فيها وصفات صحيه نقطه ثانيه ام فيصل و الكلام للجميع النشاط البدني اغلبنا يجد صعوبه بالالتزام بنظام رياضي و انا اولهم بسبب مشاغل الحياه و المسؤوليات لكن من تجربه برامج ٨ دقائق بالصباح روووعة و تعطي نتيجة فتاكه المشي لو ايش ما اقول ما يكفي لو حاولتي تلتزمي بس بهالاثنين ان شاء الله بتلاقي نتيجة ترضيك و ممكن تبدلي المشي بنظام ال٥ ميل هذا حاليا اللي بجعبتي و ان شاء الله اكون افدتك يا ام فيصل و افدت الجميع و ان شاء الله راح يستمر تجمعنا بنشاط و حيويه و بعد في افكااار كثيره و جديده لكن للاسف الوقت حاليا مو مساعدني بسبب تحضيرات السفر و الامتحانات لكن باذن الله بحاول قصارى جهدي افيدكم و استفيد منكم بالتزامكم مع انفسكم و معي و اي استفسار انا حاضره :)

هلا و هلا و هلا و الف هلا بكل الغلا بام فيصل و الله فقدتك من غير شر بس قلت اكيد امتحانات و مشاغل...