صديقتي وطبعها

قبل أبدا بكلامي
صديقتي جدا جدا طيبببببببه
وملتزمة مافيها لا حسد ولا غيره وخدوووومه
ولا تنساني بالأعياد حتى لما جتنا كورونا ارسلت كيك
وورد ودايم دايم بيتهم مفتوح دايم تعزم وعشاء وقهوه وكل شي على حساب أهلها يعني البنت
تحب الجمعه واعرفها من عشر سنين من لما كان عمري عشرين والحين عمري ثلاثين
وتقريبا صرت اروح لها ببجامهه من شدة مانا
امون عليها وتعودت على بيتهم
لكن فيها طبعين شينات
الاول
الله يهديها شوي شوي تدخل يعني هي ملتزمه
دايم تقولي وش تبين ب امكان فيها اغاني
وش تبين بالكوفي هذا سمعته شينه
يعني كذا كلامها
قولو هذا هين ممكن انها تخاف
لكن
زي ماقلت لكم
البنت طيبه بس فيها طبع هو العصبية
يعني هي موب وقحه معنا
لكن عاذي تنفس عليك وتهاوش وكانها وحده من اهلك !!
يعني مثلا مره صديقه لنا تأخرت
تسجل لها صوت بالواتس وهي تلعنها
كأنها وحده أهلها يعني حنا موب فاضين لك
إذن العشاء وحنا ننتظرك وراح الوقت اخلصي بسرعه
يعني بهواش تتكلم
حتى مع اختها بس اختها عادي دايم تنفخ عليها
لكن خير الأسلوب هذا مع صديقات
انا جدا جدا حساسه
وأكثر من مره اوضح لها
انا ماجي بالهواش تبين كلميني بأسلوب
بس ماتفهم سبحان اللله للخالق طبع فيها
الحراره بكل شي وعلى ابسط شي
زي مره كنا بشاليهم
حاطين حفله
وكان المكان حوسه
تجي تنافخ قومو ساعدو وأنتم بس جلسات!!
يعني انا مسالمه وموب حقت رفع صوت لكن هي
لا عندها عادي
لان حتى هذا اسلوبها مع خواتها الكبار المتزوجات
بالنهايه ارجع وأقول البنت طيبه طيبه
حتى مره انزنقت احتجت ٨٠٠ وكلمتها
اشوف اذا معها سلف وحلفت ان رصيدها صفر
مادريت الا يجيني على حسابي منها ٨٠٠
كلمتها قلت من وين لك قالت والله تسلفت من اختي
المتزوجة لك وترا حلال عليك والله ماترجعين ولا ريال
وحلفت وانا حلقت ورفضت بس قلت ترجعهم لك بعد
شهرين عشان أموري تصير زينه قالت مابي شي بس
أرسلتهم لها لما زان وضعي
البنت ماتقصرررررر ابد ابد
لكن فيها طبع الجلافه دايم اطنش اطنش بس خلاص
احيانا اتحسس يعني خير ابوي وامي مارفعو كذا
ولا هاوشو تجين انتي وانا ادري انه بدون قصد ذا اسلوبها
لكن لين متى

10 تعليق 1,523 مشاهدة

شاركي في النقاش

سجلي الدخول لإضافة تعليق.

التعليقات

10
  1. @ddd_5

    ما فيها شي انها تنصحكم اكيد تخاف عليكم والاغاني حارام وتخاف على سمعتكم.
    والشي الثاني ينرفز الصراحه كلنا جاين على والوقت ونبقى ننتظر الاخيره لين ما توصل، حاولو تكونو ملتزمات بالوقت.
    وبالشاليه اكيد انها تعبت من الحوسه وتنرفزت وطلعت الحره فيكم عادي طوفو مهما يكون صديقتكم من سنين واذا الوضع ما عجبك خلي علاقتك فيها سطحيه وانتهاء الموضوع لان الطبع مستحيل يتغير عند بعض الناس.
  2. @26_1

    لا ضروري تتأدب .. خير تنفخ لازم تضبط نفسها


    قولي لها تعالي عطيني كفين أحسن ؟


    أو قولي لها تحتاجين دورات إدارة الغضب ترى إذا أنا تحملت غيري ما بيتحملك
  3. @ork_shay_1

    شوفي الجميل عندها و ركزي عليه
    و انصحيها بلطف تترك السيء من طبعها
    كلنا فينا عيوب
    بس حسناتها اكتر من سيئاتها
  4. @ghryb_dnya

    انا اقول صديقتك ذي ذهبه حافظي عليها ماشاءالله عليها ..ويوم عصبت عليك فالشاليه هي صادقه قومن تلحلحن واشتغلن مو تجي الوحده وتكي تستنى اللي يخدمها .

تابعي تجارب أخرى من هذا القسم.