واخيرا
اكشني اللي مافيه اكشن 😜
اول شي نصيحة لا تفوتوا اي مراجعة لكم انا تأخرت عن مراجعتي شهر ونص ورحت بداية الثامن ووقتها عرفت انه جنيني جالس الحمدلله هذا قضاء الله لحكمة اجهلها ويعلمها هو لكن الحرص واجب لان الجنين كل ما كان صغير فيه مجال انه يقلب وانا رحت بوقت متأخر وكان صعب على حبيبي يقلب وماشاء الله كان وزنه حلو وهذا الشي صعب الموضوع اكثر عليه رغم اني كل فترة وفترة كنت احس فيه يقلب لين الجنب بس مايقدر يكمل ويرجع 😢
عملت بالأسباب حبيت وطولت في السجود رفع الحوض حطيت كيس ثلج على بطني كل اللي تتخيلوه جربته عشان ما الوم نفسي بعدين والحمدلله على كل حال
قبل العمليه بيوم قبل الفجر قمت ابكي واشاهق غصب عني حاولت اتقوى طول الفترة اللي راحت بس انهرت يومها صحى زوجي مفجوع مني وقام يهديني ويحكيني عن فلانة وفلانة شوفيهم ولدوا عمليه والحمدلله صارت سهله وبسيطة ما يحتاج تشيلي همها ومن ذا الكلام 😄
بعد المغرب رحت تنومت
جابوا لي العشاء على الساعة ١٠ تقريبا عشان من بعدها اصوم وطبعا ماجاني نوم الا غفوات مع ايات السكينة وسورة البقرة كنت مشغلتها طول الوقت وجات دكتورة في الليل تسوي لي سونار قالت لاوم نتاكد ممكن الجنين يكون قلب وطبعا انا كنت حاسة براسه واقولها ما قلب بس قالت لازم نتاكد وسوينا وطلع نفس ماقلت وطبعا كل فترة يجون يسوون تخطيط ويقيسون الضغط
عالساعه ٧ الصباح جابوا لي ملابس العمليه وقالوا خليك جاهزة بأي وقت راح ننزلك الا اذا جات حالات مستعجلة وطبعا جلست على اعصابي وكل شوي اناديهم تعالوا خذوني تعبت نفسيتي من الانتظار وهم يقولون ما تقدر ننزلك الا لما يجينا خبر من قسم العمليات ⏳
الساعه ٢ الظهر تقريبا قالوا يالله ع العملية وبديت اتنافض وجابوا القسطرة قلت لهم ابغاها بعد البنج وجلسوا يقنعوني يركبونه قبل البنج عشان مااتأخر لما انزل للعمليات ووافقت على أمل اخلص بسرعة😖
واول ما دخلت غرفة العمليات وجلسوني عشان التخدير اول مره دخلوها لي غلط ونفضت رجلي اليمين لوحدها 😭
وبعدين الحمدلله دخلوها بسلام وبدأت رجولي تتنمل وجننتهم اقول انا حاسة برجلي لسه ما تخدرت😂
الا يعطوني كمام خلاني ما عاد ادري عن الدنيا اسمع أصوات بس مدري وش يقولون احس اني بعالم ثاني وهذه كانت احلى فقرة ماعاد دريت وش يسوون تحتي الين طلعوا ولدي حتى مادريت عنه جلست الممرضة تدقني اكثر من مره عشان افوق واشوفه ويوم شالوا الكمام احس اني صحيت 😅
وتوريني ولدي وتطلع واقولهم ما شفته زي الناس جيبوه الدكتور جلس يضحك علي يقول انتي الظاهر كنتي نايمة ما شفتي شي😂
والحمدلله خلصت عمليتي على خير وطلعوني على غرف التنويم وجابوا لي حبيبي بتال وخلصت احلى واجمل رحلة في حياة كل أم 😢💘
اسأل الله ان لا يحرم اي زوجة من هذه النعمه الجميلة ويتمم على كل حامل حملها ويرزقها الذرية الصالحة السليمة تامة الخلق والخلقه
التباشير " ٢٤ " لمواليد يناير فبراير ٢٠٢١ 🦦🤍
متابعة النقاش، صفحة 85