غرفة نومك

بنات لاتفوتكم الزيوت العطريه من بودي شوب هاديه جدااااااا ومريحه للبيت مو لغرفة النوم انا احط منها على دخلة زوجي من دوامه تهدي الاعصاب مرررره ومع ريحة القهوه اخر روقان..😍جربوها ..

غريبة مرة فكرتك بغرفة النوم أكل وقهوة وتلفزيون؟ ماعندكم مكان جلسة مثلا زي الصالة؟ أنا غرفتي كبيرة الحمدلله ومو حاطة فيها أي شيء غير أثاث الغرفة وكنبات حلووو شكلها لكن بدون فايدة جلستنا بالصالة
مرررة حابة إن الغرفة وسيعة تشرح الصدر الحمدلله
حللو بأغش منكم معطرات 😋 أنا أحب معطرات الجسم من باث اند بدي أعطر فيها جو الغرفة وأعطر السرير
التسريحة كل مرة أرتب فيها العطور بشكل غير وبس

الا الحمدلله عندي مجلسين وصاله ..ولكن غرفتنا افضل مكان نرتاح فيه ونعيش فيها اجواءنا الخاصه وبعدين وش حاطه انا حسستيني حاطه مفطح ولا بوفيه مفتوح 😂..كلها سناكات بسيطه ترا مكسرات وقهوه وشاهي كيك فواكه معجنات ومو كلهم مره وحده لا كل جلسه احط شي معين مره بس قهوه وحلا مره بس شاهي ومكسرات وصحن فواكه مره كيك وعصير يعني اشيا بعد العشاء اجهزها مع فلم بغرفتنا نسهر واسوي جو بغرفتنا والبس الي ابي لاني عندي ولد كبير مااقدر البس برا الغرفه اي شي مكشوف ..🥰وبعدين ماعمرك رحتي فندق ؟ ماتاكلون بنفس الغرفه بالفندق؟ نفس الشي ترا وانا زوجي اجازه يوم واحد بالاسبوع كل الايام روتين مكرر ناكل نشرب بالمجلس وينام بدري ماعندنا غير هاليوم نسوي شي مميز ونغير عن باقي الايام 👍👍

جربو يابنات لو مره بالشهر تخصصين جلسة مساج لزوجك والله انها شي حلو وبيدعيلك وبينبسط منك مرررره رتبي غرفتك ونظفيها تمام التمام وجهزي بجنب كمدينة زوجك شمعه وزيت مساج او كريم ومنشفه كبيره ملفوفه بشكل اسطواني وانثري شوية ورد مجفف على الكمدينه وشغلي بجوالك صوت امواج البحر وقصري الصوت وحطي زيت فواحه بغرفتك بريحة الافندر او الفانيليا قبل المساج بساعه وطفيها علشان لاتصير الغرفه مكتومه ..والله بيستانس وبيكون هاليوم يوم راحه له ويحس انه مدلع ❤👌💆..