التجمع الـ١٩٤ للمقبلات على الحقن المجهري وأطفال الأنابيب🌺👶🏻

و الله مااعرف انا زوجي مرتين حلل فسمير عباس

هم قالوا على حسب قراءه دكتور المختبر عشان كذا دايم يفضل ينعمل فنفس المختبر


بس اعتقد ذريه افضل من سمير عباس

ايه قريت الخبر من وزارة الصحه انه عادي المستشفيات ماتمنع دخول غير المحصنين بكن الخاصه و العسكريه اعتقد كل مستشفى له نظامه
بس الحكومي لا عادي الدخول الحمدلله

انا سويت كذا قبل احمل اول حمل شريت لبس وردي والثاني بيج حق ولد اسم لان صراحه ما احب السماوي

وكان عندي دب هديه من زوجي لبسته لبس البنت الوردي وكنت انيمه جنبي وحملت في بنت سبحانه الله وطول حملي وهو جنبي لين ولدت اخذت اللبس ولبسته بنتي
وبنتي متعلقه في هالدب الى يومك بتصير ١٠ سنوات
طاح خشمه والصوت اللي فيه ماعاد يشتغل من كثر انغسل
قلت بصلح خشمه لها اذا ينفع شكله غلط جيت ارميه مره ولا رضت قالت خليه ابيه احبه😅
الباقي ابد ماسويت لهم حركات ولا شي مع ان حملي الثاني جاني بعد سنوات انتظار فرحت فيه فرحه لاتوصف لانه جا بعد فشل متكرر الا اني ماسويت شي ولا شريت شي لتفائل💔 يمكن عشان كبرت وعجزت على هالحركات

اسفه تحمست كاني قصيت لكم قصه حياتي 😂

الله يعوض كل وحده فشلت عمليتها لكل وحده فشلت
لاتيأسين ياقلبي تأكدي بيجي يوم ربي يعوضك كلنا مرينا نفسك وتوقعنا انه حلم بعيد او مستحيل بس الحقيقه لا ربي كاتب لنا وقت نحمل فيه
انا وصلت مرحله اني اجيب لي دمى وانيمهم جنبي كانهم عيالي واجلس اضمهم وابكي واناظر المرايه واقول ليش ياربي حرمتني من اكثر شي احبه الاطفال ليش مستحيل يصير عندي طفل ابي اجرب الشعور زي الباقي يارب لاتعيشني ناقصه شي احبه وقلت لزوجي يشتري لي العروسه اللي نغير لها حفاضه والله باقي شعرتين وادخل مرحله الجنون واخر شي طلبت منه نتبنى طفله ولا رضى طبعا
انا وحده كنت احب الاطفال من اول تزوجت كنت ابي احمل من اول شهر 😂 ومن ثالث شهر جالسه اراجع المستشفى ليش ماحملت والكل يقول مافي شي بس بعد سنه كامله من العذاب قالو لي خل زوجك يحلل حسبي الله عليهم طول هالسنه يلعبون فيني من البدايه قلتو زوجك يحلل وطلع المشكله منه والحل الانابيب ومنها بدأت المشوار المتعب الجميل
وحملت بعدين فكرت خلاص دام حملت مره يعني سهل بحمل ثانيه بس للأسف رجعت على نفس المعاناه بس الحمدلله ربي ماينسى احد صح تعبت وفشلت كثير عمليات بس ربي عوضني
ومتأكده كلكم ربي بيعوضكم بالاحسن مستحيل ربي ماسمع دعائك بس يمكن خيره في شي مانعلمه قدامنا انه سيئ الفشل بس لو كشف الغطاء يمكن نحمد ونشكر ربي ملايين المرات لانه اختاره لنا
ويمكن كانت فرصه انا نكفر عن سيئاتنا ونتقرب الى الله
وترى كل الناس ربي يبتلاهم ويمتحنهم مو بس احنا في ناس في صحتهم وناس في اطفالهم مرضى وناس اطفالهم تموت قدامهم وناس في اهلهم وناس في شغلهم في ازواجهم كل واحد فينا في ابتلاء وامتحان
وكل واحد فينا يشوف انه يعاني وغيره مرتاح بس الحقيقه احنا مو عايشين عيشه احد لنا الظاهر
اسفه طولت عليكم بالرد هذا بعد بس والله ابي اوصل لكم ان فتره وتعدي لاتيأسي اهم شي واستمري فشلت عادي مو اخر الدنيا اعيدها مره وعشر لين ربي يكتب لي

يقولون سمير ادق
بس حلل في نفس الفتره ولا ؟

الله يشفيه
التكسر له اسباب يمكن دوالي يمكن صديد