تحسين بنقص وخيبة ولا الوضع عندك easy

طبعا كلنا عايشنا عدم أهلية الاطفال للتعلم وطلب العلم خصوصا في وقت المنصة ظهر ذلك جليا واضحا
لما تقرين في سير السابقين وكيف حرصهم على الخير ما تحسين بنقص في بيتك واسرتك؟ مثلا عمير بن ابي وقاص رضي الله عنه استشهد في بدر وعمره ١٦ سنة فقط وكان حريصا على ان يشهد المعركة فكان يتخبى من رسول الله صلى الله عليه وسلم حتى لا يرده لصغره حتى رآه واستصغره ثم بكى ثم أذن له بالحضور عليه الصلاة والسلام، لما تقرين كذا ما تتضايقين؟ ولا الوضع عادي عندك؟عيالك ما يبون يحضرون المنصة ولا يبون يداومون ولا شي والسابقين حريصين على الخير ما يؤثر هذا فيك؟
لما تقرين عن الصحابية عفراء بنت عبيد رضي الله عنها كان عندها ٧ اولاد كلهم شهدوا بدرا، عاقل وخالد وعامر وإياس ومعاذ ومعوذ وعوذ رضي الله عنهم، لما تشوفين الخلفة الصالحة العابدة لربها ما يأثر سلبا فيك؟ لما تقارنين بينهم وبين عيالك الي سور صغيرة ما يحفظونها ويبون يغسون فيها ما تحسين بالنقص؟
لما تقرين عن الصحابية اسماء بنت عميس رضي الله عنها كان زوجها جعفر بن ابي طالب رضي الله عنه واستشهد في غزوة مؤتة ثم تزوجها ابو بكر الصديق رضي الله عنه ثم مات ثم تزوجها علي بن ابي طالب رضي الله عنه
ما شاء الله لما تشوفين ان ازواجها الثلاثة امثال هؤلاء الجبال العظام، وتشوفين نفسك وخواتك الي ازواجكم عمرهم ما قالوا لعيالهم تعالوا ندرسكم تعالوا نعلمكم القران تعالوا تعالوا اصلا حتى ما يدرون هم باي صف
ما تشعرين وقتها بالنقص فيك وفي زوجك وفي ازواج خواتك ولا عادي عندك؟