اللي رضعت اطفالها طبيعي سنتين تجي، ابغا انام 😩

ماشاء الله اللي ترضع طبيعي سوبر ماما بعد تجربتي الاخيره..

الرضاعه الطبيعيه متعبه الله يكتب الاجر مع ذلك هي متعه وحب ومشاعر جميله للام والطفل، غير فوائدها للطفل..

الزبده انا اول مره استمر في الرضاعه الطبيعيه واطول، عيالي السابقين كنت ارضعهم سته شهور وبعدها مايشبعهم صدري ويميلون للصناعي وافطمهم..

الا هذا طفلي حب الرضاعه ومستمره فيها، وعمره الان ٩ شهور..

المشكله اللي اعاني منها حالياً هي النوم،

سابقا اطفالي ماابالغ من خمس شهور ينتظم نومهم ماشاءالله يصير الواحد فيهم ياخذ رضاعه وحده قبل النوم ومايقوم الا الفجر..

لكن ولدي هذا مع انه ياكل خلاص لكن مازال كل ساعتين يصحى او كل ساعه..
كنت اظن في الشهر الخامس انه كل هذا بسبب التسنين وسنن فعلا الولد وطلعتله سنتين تحت لكن مازال نومه ماتغير من عمره خمس شهور للان..

يتعشى ويشبع الحمدالله، رافض للاعشاب والرضاعه الصناعيه تماماً..
حاولت فيه ياخذ مصاصه رافض..

مرتاح متروش كل اموره كويسه مع كذا يقوم كل شويه وانا لي اربع شهور نادر انام ثلاث ساعات على بعض مرا صرت مرهقه وبشرتي تغيرت من قلة النوم والتعب 😟..



كلمت مدربة رضاعه طبيعيه وباخذ استشاره عندها، بس ابغا اشوف تجارب،



في كثير يقولون خليه يبكي الين ينام وبصراحه قلبي مايعطيني اسوي معاه كذا ابدا..



نومه في النهار طبيعي من ساعه لساعتين واحرص ماينام بعد المغرب يعني الموضوع مو لخبطه في النوم فقط انه تعود كل ساعتين يصحى ويرضع..



الله يكتب اجر اللي تفيدني وتساعدني..