قصتي

اللي بحاول أوصله أنا مو هدفي الناس تصير مثلي ولا أبغا أشكك أحد في دينه. لكني حالياً وصلت لذي المرحلة. وما أبغا إني أخفي ذا الأمر بمعنى أقدر أكون منافق وأخبي شي مثل كذا وبعد الزواج هي بتعرف أكيد لكني مو من هذا النوع. لابد أني أكون صادق معها من البداية. وتراني مو من النوع أعوذ بالله اللي يستهزأ بأحد أو بالأديان ولكني لما أعرض أفكاري أعرضها بشكل علمي (شرعي وبحثت عنها ومتأكد من اللي أقوله بخصوص المهر واللي مو مصدق يبحث ويوجهني إذا كنت مخطأ بعترف وبحذف).حالياً: عمري 26 قربت على 27 وأبغا أتزوج ما الحل؟ كيف وش أسوي؟وتراني ولله الحمد مافيني إلا العافية لا يجي أحد يقولي أنت مريض نفسي. ترا المرض النفسي ما يعرف مسلم أو غير مسلم صغير أو كبير ولو كنت مريض نفسي بعترف ترا ما راح أتفشل تراه مرض مثل أي مرض. لكني ولله الحمد مافيني إلا العافية. وإذا أحد أقنعني بالحجة والبرهان أغير على طول تفكيري.

تراني بحثت كثير وبطرق كثيرة وللآن ما لقيت. يا جماعة الخير تراني عادي من هذا المجتمع أخلاقي ولله الحمد ما تغيرت وأغار على أخواتي ولا أرضى عليهن بس أنه مثل ما شرحت لكم أنه هذا اللي أنا عليه حالياً. ويشهد علي ربي ما عمري غازلت ولا قربت من وحدة ولا لي في الأمور هذي. العمر يمشي وأنا أبغى أتزوج وحدة أكمل معها حياتي نتشارك كل شي ونتساعد في كل شي. فرح حزن كل الأمور هذي. وتراني متعلم ولله الحمد ومتخرج من جامعة الملك فهد للبترول والمعادن - هندسة كهربائية. أنا مؤمن إننا نتساعد في كل شي أصلا عشت بعد الثانوي بعيد عن الأهل وكل شي أنا أسويه (غسيل كوي تكنيس) ما عدا الطبخ (حالياً جالس أتطور). وقناعتي إننا نتساعد في البيت وأموره كلها من طبخ وغسيل الخ. أنا أبغا وحدة تكون رفيقة درب تكون لي الأخت والأم والصديقة والحبيبة والزوجة. وأنا أكون لها الأخ والأب والصديق والحبيب والزوج. هذا كل ما أحتاجه. يعني هل ضريبة إني صادق ما ألقى وحدة أتزوجها !؟

الله يرزقك بما تتمنى قريبا ياارب

آمين آمين آمين. الله يجزاك خير على ذا الكلام.

الله يرزقك باالزوجه الصالحه