زوجي له ٣ اسابيع زعلان

طيب هو عنده وسواس قهري في النظافه .!!؟
لان الصراحه تصرفه غريب

لا ماعنده وسواس بس من بعد المشكلة صار هو يطبخ ويغسل المواعين ويغسل ملابسه ورافض اسوي له شي

قرأت تعليقاتك
واقول انتي ماتعرفين تتصرفين للاسف
لو مكانك اسحب عليه واعيش يومي من بدايته لنهايته سعيده ومرتاحه ولا على بالي شي ولا مسؤليه ولا كأنه موجود
مسوي نفسه زعلان ويكنس ويطبخ وينظف والله احلى شي ريحني ليته من زمان زعلان
واكبر غلط تسوينه انك تستجدين تعاطفه وتتبكبكين قدامه تفكرين انك كذا بتكسرين خاطره بالعكس انتي كسرتي كرامتك وعزة نفسك على ايش ؟على واحد معتل مزعل اهله 3 شهور !
صدق من قال اللي مافيه خير لاهله مافيه خير لك
هذا النوع طاقة الانوثه فيه عاليه يعني تصرفاته تصرفات نسوان يتزيعل ويطنقر لدرجة انه يخدم نفسه يعني يبي يوريك انه مستغني عنك وشايل نفسه بنفسه اخر حبه بالكوكب عشان تترجينه وتنكسرين له ويكسرك ويذلك برفضه لتوسلاتك اللي ماكان لازم تسوينها من البدايه
اتركيه اللي يزعل من كيفه يرضى بكيفه لا تستقتلين في استرضاءه
وخير يا طير مواعين ما انغسلت بوقتها كان غسلها ونشفها وهو ساكت بدون كل هذا الفيلم
بس هو ابو طاقة انوثه عاليه مايقدر يحس انه رجال الا بهذي الحركات الطفوليه الانثويه

كلامك صح ١٠٠٪؜بس مقدر اطبقه لان تجيني نوبات هلع ومقدر اعيش مبسوطة وفرحانة الا اذا كنا كويسين سوا.

والمواعين يوم زعل علق اني مخليه قدر يومين لين تجي الخدامة اللي بالساعة تنظفه 

المشكلة انه هو عنده مشاكل بالنظافة الشخصية ومسكها علي اني مو نظيفة 

اذا شفته يطبخ وينظف لدرجة الفرن ينظفه احس مالي قيمة، 

الله يهديني ويقوي قلبي ويهديه وفعلا هو طاقته انثوية لانه يبي له مدارااااااة

هذا اساس مصايب وتعب اغلب المتزوجات (التعلق )المرضي اللي يخلي الزوجه تعتبر زوجها بمثابة الاكسجين والماء والحياه والراحه والسعاده وبدونه تموت وتذبل وتنتهي وكأنها نكره وكأنها ماكانت عايشه بدونه قبل لا تعرفه !
عزيزتي اللي تسوينه اكبر غلط انك ترفعين هذا العبد الفقير لله فوق مكانته ومنزلته البشريه وتجعلينه هو المصدر والاساس لكيانك ووجودك وقيمتك
وتأكدي كل ما استمرضتي وانكسرتي في سبيل الحصول على رضاه كل ماهو يزيد في طغيانه وعناده لان هذا هدفه انه يحس نفسه قدر يكسرك ويتسلط ويسيطر عليك لانه يعرف ماتعيشين بدونه واستغل هذي النقطه بدم بارد
والشي الثاني انتي قيمتك ومكانتك ما تنقاس بتنظيف قدور وتلميع افران اصحي لنفسك واعرفي وش جالسه تجرمين بحق نفسك
فوق ماهو عنده مشاكل ومصايب نفسيه فكريه تجين انتي بعد تنجرفين وراه وتاخذين قدرك ورضاك من رضاه وتنظيف مواعينه وقدوره ؟ مو حياه هذياللي لازم تسوينه الحين انك تطنشين وتكونين سعيده وغير مهتمه ولا مباليه اتركيه ينظف ويلمع ولا تهتمين ولا تروحين توقفين عنده وتشوفينه وهو ينظف لانه يبيك تشوفين خلي تنظيفه مع نفسه وانتي روحي مكان ثاني اختفي عن وجهه وهو مع الوقت بيشوف ان اللي يسويه راح هباء ويتراجع بس خلي عندك صبر طووويل ولا تلحقين وراه ولا تستعطفين ولا تسوين نفسك مسكينه حزينه وحيده بتموتين بدونه بالعكس فليها واستانسي واهتمي بنفسك وبصحتك وبجمالك بدون مبالغه
واعتبري هذي الفتره نقاهه لك ولمزاجك واسألي الله دايما انه يقويك ويعينك ويرشدك للصواب في جميع امورك