المضيفة المصرية *5 اتفضلى اشربى شاى وخديلك &#1

مساء الخير عليكم ...
كل سنة وانتوا كلكواااااااااااا طيبين وفى احسن حال وصحة وسعادة يارب وكل واحد ينول الى يتمناه.
معلش هى جت متأخره شويه بس فعلا اليومين الى قبل العيد التلات والأربع كانوا طحن فى الشغل كأنهم افتكروا ان فيه عيد واجازة فجأة .. وطبعا الخميس كله فلسع بدرى بدرى .. المهم يارب تكونوا كلكم قضيتوا عيد حلو سواء عند الأهل او الحموات :).

قبل كل حااااااااجة ثوانى بس كده .... نورااااااااا حبيبة قلبى منورة يا جميلة .. انتى الى وحشانى كتييييييييييييييييييييييييييييييييييييير اوى يارب تكونى بخير واياكى تختفى من هنا تانى .. انا بقولك اهو !

بصوا بأه انا ححكى لكم عن العيد باستفاضة لأنى طبعا قاعده فاضية وقضيت عيد بجد عمرى ما عدا عليا احلى من كده .. قولولى ليه ... احنا الوقفه سافرنا عالأسكندرية واول يوم دبحنا وكنا معزومين عند عمى هناك...ولقينا بابا بيكلمنا بعد الدبح بيقولنا يلا عشان حنروح عند ناس قرايبنا مع ابن عمى واحنا طبعا استغربنا لأننا مش متعودين على كده .. احنا كل سنه كنا بنكون عند جدى وجدتى فى اسكندريه ( الله يرحمهم ) وماما مش بتحب تروح ولا تيجى عشان نكون معاهم .. المهم نزلنا ورحنا وبجد انبسطت جداااااااااااااااااااااااااااااااااااا تخيلوا ناس بابا ما شفهمش من 25 سنه وما يعرفوناش اصلا ولقينا شباب زينا ولا كنا نعرف عنهم حاجه وماشاء الله عليهم فعلا .. انا انبسطت واتضايقت فى نفس الوقت .. ليه احنا منعرفهمش .. ليه ما بقاش حد بيهتم يسأل عن قرايبه ؟ مش للدرجه دى الانشغال وان كل واحد واره وزارة .. بس فعلا انا عاتبت عليهم عندى اننا طول الوقت قافلين على نفسنا ماحدش يعرفنا ولا نعرف حد .. قولولى هو احنا بس الى كده والى انتوا كمان حد عنده كده؟ فى نفس الوقت انبسطت اننا عملنا كده واول مره احس ببهجة عيد مختلفة عن كل سنه ... وبعد كده كمان اتلمينا عند عمى عالغدا وكان يوم حلو اوى ... ومشينا عالقاهره يومها واخدنا حتة دش مطر على دماغنا .. انما 100/100 وجه فى مصلحتكم انتم .. اه والله لأنى مره واحده وانا قاعده بدعى ( ما هو مطر وسفر بأة وابواب السما مفتوحه ) افتكرتكم .. لحد اخر حد شفته قبل ما امشى من الشغل كانى شايفه صفحة الدعوات ادامى نزلت عليا فجأة بقيت عماله ادعى لكم والله وكل الى افتكره ادعيله .. يارب تكون مستجابه وتكون من نصيبكم يارب .

هبه هبهوبه ... ازيك يا قمر كل سنه وانتى طيبه يا جميل ... بصى يا ستى معلش استحملينى فى رايى وطبعا انا مش حقولك اكتر من الى اتقال ... اولا انا عندى 2 من صحباتى متجوزين اصغر منهم بس واحده ب6 شهور والتانيه سنة ونص .. والحمد لله الاتنين مبسوطين وطبعا حصلت مشاكل فى الأول بس لتمسكهم ببعض كله بيعدى .. يعنى عشان كانوا بيحبوا بعض بيحاربوا .. واظن ان اى اتنين بيحبوا بعض اكيد بيحاربوا .. بس انتى بأه ايه الوضع بالنسبة لك ؟؟ انتى بتقولى على فرق ااقل كده وقومتى الدنيا وما قعدتش .. امال اشمعنا المره دى ؟؟؟؟ طبعا فى الأول والآخر اكيد لازم استخارة وربنا يقدم لك الى فيه خير .. بس انا عندى حاجه محشورة ولازم ااقولها لك بس عالخاص .. ماشى يا جميل .. وربنا يوفقك يارب ويهديكى للقرار الصح.

سمسمه .... ليه بس الزعل ده ؟؟ وبعدين انتى فعلا مش بتحكى لنا يا سماح عشان نخفف عنك وهو احنا فعلا لزومنا ايه ؟؟ ربنا يفك ضيقتك ويهدى سرك.

بنات يا بناااات عايزة ااقولكم معلومه سمعتها دلوقتى فى الطب البديل وحلوه اوى ... التمر .. الدكتور كان بيتكلم عالتمر وبيقول انه فى الآية " وكلى واشربى وقرى عينا" يعنى تهدى وتنامى مرتاحه .. يعنى ان التمر مضااااااد لالاكتئاب وخصوصاااااا اكتئاب الى بعد الولاده .

يلا انا رغيت كتير اوى بس بعوض اسبوع اهو .. وكل سنة وانتوا طيبين

:hahaha: :hahaha: :hahaha: :hahaha:

احم احم
انا جييييييييييييييت ياهبه
واحب اقولك انى من الفئه المقاتله بتاعة كهرمانه ونودى وان شاء الله تنضم لينا سماح قريبا
بس هيا تطول نفسها كده ع ااااااااااااااااااااااااااخر وتحارب بكل قوتها

فى الزمن ده ياهبه صدقينى مش زى الاول مبقتش تفرق زى الاول
صحيح بتحصل زوابع فى الاول ومشاكل لكن لو ارتحتى ليه وحستيى ان فيه احساس مختلف
يبقى اتحملى واصمدى الدنيا مش سهله ابدا
احنا لسه فى البدايه اهو وشايفين الويلات لا حب بس كفايه ولا فلوس ولا علم ولا اى شئ بقى كفايه لوحده الحياه ليها تفاصيل كتيره جدا وحتى يعنى لما الراجل المفروض يبقى اكبر عشان ال ايه يحتويها

بقى بذمتك ياميروا مين بيحتوىمين
دحنا اللى بنعد نحتوى ونهدى ونسايس ونضحى وتنازل ونطبطب ونوافق ونعيط بس هو ده اللى بنعمله

مين بجد حتى لو جوزها اكبر منها عشرين سنه مش هيا اللى بتحتويه وبعدين هما كده كده بيشموا كلامهم
انتى تقولى عوزاه راجل ملو هدومه يشخط ويتحكم ولو مكنش كده تقولى يييييييييع ايه ده اتجوزواحد
حيبقى شخشيخه فى ايدى فين شخصيته ورجولته؟؟؟؟؟؟
مش عاجبنا العجب
وديما يقولك اتجوزى واحد اكبر منك كتيرعشان يدلعك ودى مش قاااااااااااااااااااعد نهائيا
نهائيا اثبتت فشلها يعنى السن مش حكم فى اى حاجه
وحده معرفة خالتى من بلد فلاحين كمان يعنى مش تفتح ولا اى حاجه تخيلى بقى اللى حصل لما ابنهم حب واحده اكبر بسبع سنين اييييييييييييوه ع اللى حصل واتقال
وياعينى ياخويا ومصمصة شفايف
لاحظى بقولك ( اريااااااااااااااف ) حطى تحتها ميت خط ودلوقتى خلفوا ونسوا المشاكل وسعداء ولا فيه اىحاجه والمشكله انه كان عيل خالص وهيا شكلها قد مامته

استخيرى وادرسى الشخص كويس وادرسى احساسك وربنا معاكى يارب
بدعيلك فى كل خلوه عباده خاصه جدا والله من يوم ماتقبلنا ع المسنجر

انتى احسن حاجه بجد استفدتها منك دلوقت انى حعرف شغلى مع اختى الكبيره اللى واللهالعظيم الشهر ده اتنين رفضتهم عشان هيا اكبر بسنتين اتنين ومكنوش يترفضوا بجد قربنا يجلينا انهيار عصبى منها
لو شهر واحد ترفض
انا بقى سنه لها سنانى على الاخر من اللحظه دى وحقوم عليها حرب بعد كده

السلام عليكم يا بنات انتم وحشنى جدا وكنت عايزه اشاركم فى العيد بس الكمبيوتر بتاعى عايز بياع الروبابيكيا ومش عارفه اظبته بس انا بدخل اطمئن عليكم وحبيت اقول للجميع كل سنه وانتم طيبين ويارب دايما متجمعين على خير احبكم فى الله:)

صباح الخير يا بنات
نسيتينى يا سندريلا من الفئة المحاربة بس انا حربى مكنش عشان سن .. كان عشان جنسية
طبعا دلوقتى كل الاقلام والوجوه هتدور على ويقولولى يعنى ولاد بلدك خلصو رايحه تاخديلنا من بره؟؟؟؟؟؟؟؟؟؟؟؟ وهينسو هبة وسماح والدنيا كلها
بس الحمد لله عايشة مبسوطة معاه ومرتاحه 24 قيراط اللى تاعبنى بس انى فى غربة وده كتير بيعانو منه وهم متجوزيزن مصريين يعنى مختلفتش كتير عنهم خصوصا انى والحمد لله على تواصل مع كل اهلى وقرايبى واصحابى كأنى لسه معاهم يعنى مقطعنيش عنهم بالعكس هو اللى دخل فى العيلة وبقى واحد مننا وعلى فاكرة عارف عنكو وبقعد احكيلو عنكو

شيرى: مش عايزة اقولك وحشتينى قد ايه من هنا للسنة الجاية وشوفيلك حل فى المسنجر بتاعك ده يا تبيعيه لنفس بتاع الروبابيكيا اللى هياخد جهاز بوتا
كهرمانه على قد ما فرحت من ردك وانك لسه فاكرانى لان انتى بالذات ليكى معزة خاصة مع انى مشوفتكيش بس عشان كنا بنجهز فى وقت واحد وكان فرحنا قريب من بعضه فى التوقيت على قد ما زعلتنى كلمة ان جوزك اتخانق معاكى لما عرف انك كلمتى واحده عرفتيها من النت... يعنى هو رافض وجودك معانا على الصفة دى ولا ايه؟
هبة عبد العظيم: بلا رغى كتير صلى استخارة وبعدين نتكلم
كل البنات صباح الفل