عزيزتى المحبه انا ما ابغا كل وحده تاخد بنصيحتي ؟!! لان كل مشكله لها ظروفها الخاصه
وترا والله بالعكس ابدا ما زعلت من كلامك وعلى فكره رأيك عجبني جدا وكان ممكن تنفذه لو انها ما فتحت الموضوع مع زوجها ... بس خلاص قد حصل الي حصل و واجهتو ونكر انه يعرفها
صدقيني كلامك اكتر من روعه وعين العقل بس كل مشكله ولها ظروفها
راي في مشكله الاخت وبالظروف هادى هو الي خلاني اقولها ما تسكت
اسلوب تأنيب الضمير الي قلتي عليه كان ممكن ينفع لو ما صارحت زوجها بانها كلمت صديقته
انا حسيت انهم هم الاتنين بيتمهزئو بيها ومش عاملين لها اي اعتبار ولا خايفين منها
يبدولي لانها انسانه راقيه وطيبه جدا وعارف زوجها انه ما يجي منها شر ولا رده فعل قويه و قاسيه
واكيد صديقته حست ده الشي وعرفته من الزوج (من خلال كلام الزوج عن زوجته ) عشان كده اتجرأت عليها .. فهمتى قصدي ؟
عشان كده انا اشوف ان الموقف ده يستدعي فيه الشده لانهم هم الاتنين وقحين جدا بصراحه ارجو ما تزعل مني عشان باقول ان زوجها وقح ارجو المعذره
مو الفكره اني متعاطفه لا بالعكس ...
بس حبيت اوضح نقطه تانيه ...انا كنت باقترح انها تقول لاهلها او لاهله المهم واحد ثقه ... ما قلت لازم تطلبي الطلاق ولا عاد تعيشي لحظه معاه!!!! بالعكس ابدا ما انصح بالطلاق .. بس لو لا سمح الله ... الله لا يقدر ابدا وينفصلو
بس لو حصل وطلق ؟ فلا تزعل ولا تضايق لانه هو الي خرب بيته مو هي
ابغاها تجمد قلبها ولا يهمها لانها هيا على حق ولو تركت حقها؟ راح يدوس عليها بعد كده صديقيني
بعدين ليش احنا ما بنطبق الكلام الي بنقراه في القران يا اختي الكريمه
مش في ايه في القران بتتكلم عن نشوز الزوج ؟ يعني المراه لو ناشز ؟ اول شي يسوووه الضرب
مع ان في كذا طريقه تأديب مثل الهجر في المضاجع واخر شي الضرب غير المبرح
ده بالنسبه للزوجه ... طيب ولما الراجل يكون ناشز ؟ نسكت ؟
يعني ربنا العادل الكريم بيقولنا كيف نتصرف لما الراجل يتعدى حدوده
فأتوا بحكم من اهله وحكم من اهلها ... هادا الي انا باقولو نطبق كلام رب العالمين
بصراحه زوجها خائن وصديقته جريئه ووقحه ولو هيا خانته كان فضحها وضربها وبعدين يطلقها طيب الين متى تظل المرأه ضعيفه ومهضوم حقها ؟ الرجل من حقه يغلط ويخون ؟ والمراه تعاقب اشد العقاب بالرغم من ان العقاب واحد عند رب العالمين ,, انا عن نفسي ما احب فكره "لهم رؤوف رحيم , ولنا .. شديد العقاب " سبحان الله العادل الجبار .. وانا اوافقك الراي انه لازم تقرأ مش بس سوره البقره .. تحاول تختم القران كمان ولا تترك الدعاء وربنا حينصرها باذن الله لانها طيبه ومظلومه ولكن انا ضد اني اعتمد على الدعاء واسيب حقي المهضوم واسيب الناس تظلمني !! لا الدين ولا الرسول عليه الصلاه والسلام امروا بكده ... الدعاء يمدنا بالقوه والطمأنينه مش بالضعف والسكوت وعدم المطالبه بحقوقنا ده الي انا مقتنعه بيه .. المهم
لازملهم رادع قوي ,, لكن في ظروف تانيه مثلا لو ما كانت كلمت صديقته ولو ما اتواجهوا ؟ ولو ما صارحته بالي اكتشفته ؟ ساعتها تطبق كلامك ونعم الرأي يا اختي المحبه
اتمنى تكوني فهمتي قصدي ؟ وانا ما اتمنى اي وحده تطبق رأي مجرد ما تكتشف ان زوجها على علاقه بوحده لان زي ما قلتي كلهم حيطلقو وحاكون انا السبب ههههههههه
تحياتي لك والله يوفقها ويخليلها زوجها ويهديه
زوجي خانني مرتين....!!! وش اسوي.....!!
متابعة النقاش، صفحة 8