المرأة والسيارة ....مواقف لا تنسى
مسيكم او صبحكم بالخير حسب وقت قرايتكم للموضوع تراها تحيتي
والمشرفات تراني ما ادري وين اسدح موضوعي فيه
قلت مالي الا الاسرة اسدحه فيذا وهم يشوفون صرفه معه
بس علموني تراني جديده عندكم
ولا اعرف نظامكم
موضوعي عن السيارة وقيادة السيارة
وألي صدعوا روسنا بها
مع اني بصراحه ما افكر اسوق هههه
لسبب بسيط أني يستاسع صدري وانا منجطه ورى ههههه
وفاقه كشرتي في اللوحات والناس في الشارع
طيب وشلون بروح واجي بدون ما اسوق اكيد مالنا ألا هم عيال الفلوس
مدري اخاف يجي يوم ويحل محل الرجل هالسواق مهيب بعيده عن رجالنا العجازين:22:
فمالتس الا ابو هنود والا ابو فلبين للي يبون يكشخون
او تكروني يعني اني مريشه وبنت عز
انا على قدي رضيت بالهندي المهم ما احتاج لأحد
طبعا كل وحده منا مع هالسواويق تطلع لك مواقف مضحكه وعجيبه بنفس الوقت
تطق بأصبع لطاش ماطاش
منها هذا المواقف وألي مستحيل أنساه ولا بقى احدن ما قلته له
بيوم مرت اخوي برا الرياض حول ساعه قالت تعالي خذيني
طقيت صدري مسويه فيها سنافيه واخذ ولدي معي ونروح
ويوم طلعت برى الرياض وقفت هالقرمبع حقتي قالت معصي مالتس لوا
مسويه فيها اني افهم بالسيارات قلت اكيد حروه انها البطاريه
ويوقف واحد ويشحنها نتعت شوي ثم وقفت
وادق على امن الطرق وما قصروا عطوني ارقام سطحات
يعني سواقين سطحات وادق على واحد قال وينتس فيه قلت بأقصى الشمال
قال اوه فاضي لتس انا بأقصى الجنوب والساعه 10 بالليل
واصك الخط وادق مره ثانيه على امن الطرق ويعطيني واحد رقم ثاني
وما امداني ابي ادق عليه الا وربي مرسلن لي واحد
وقف جنبنا هاه وشفيكم قلت السيارة متعطله
من امن الطرق عرفت انه الدينموا
قال اجل لازم سحب سيارتكم <<يتفلسف اخينا هههههههههه
قلت له ايه بكم قال 150 قلت ماعليه انهج
ويطق صدرة ولا يهمتس يا خاله لا تخافين ولدتس <<وجعه شايفني عجوز والله توني صغيره على اني اخلف شحط مثله هههههههههه
قلت له مشكور
ويركب السياره فوق السطحه وانا فوقها كني راكبه هودج حق الاولين :hahaha:
لين وصلنا اول ورشه ويوقف ويشوفها ميكانيكي قال الدينموا محترق يحتاج تغير
ونرجع لرياض وعند اقرب اشاره
وقف ونزلت تشوفوني نازله من سيارتي واوقف على حافة السطحه هم اطب على الرصيف
وواحد بسيارته وراي يطل يطالع وشذي
وانزل انا وولدي واخذ ليموزين وارجع لبيتنا
تبت اطق مشوار برا الرياض حتى لو معي ولدي
وعرفت بعض اعطال ومشاكل السيارات عسى ما افتح ورشه بس
والموقف الثاني بقوله لكم مره ثانيه
ذالسيارة مواقفي معها كثيرة
مهبوله اجيب سيارة كشخه مع ابو هنود هذا وهي ماعليه صدم بها وقربعها
برجع لكم بعد ما اشوف مواقفكم ولا هو انا بس اللي حصل لها مواقف مع السيارة والسواقين