كيف حالكن يا خواتى وين ما كنتن:27: رانى ديما انخش ونقرا فى آخر التطورات لكن والحمدلله ما انحصلش فى وقت كافى للمشاركه غربه وحوش وعويله صغيرين او نفسيه تعبانه كل هذا ما يعطينيش فرصه للمشاركه :( لكن اليوم قلت يللا توة نشجع ونقعمز والصغيرين ربى يحفظهم
والله ما نقولقمش كيف تنكدت على الاخت ياربى ويشكثر أعانى الله يجعل قبرها روظه من رياض الجنه :( خاصة كل ما تاملت فى اسمها حسيت بالفعل انها كانت تعانى الله ربى يبدلها بدار خير من دارها وجار خير من جارها ، لكن لما قريت الدعاء اللى حصلاته من اخواتنا فى المنتدى بارك الله فيهم ما قصروا والله غبطتها او قلت سبحان الله المنتدى كان باب خير عليها بيش اتحصل كل هذه الدعوات واكيد من بعد فضل الله هى تستاهل الخير غفر الله لها او صبر هلها
خواتى انجو توة للزبدة::time الوقت أغلى من الذهب وساعات العمر فيسع ما تنقظى نبى نستفيدو من بعضنا كيف انثقلوا موازينا يوم القيامه كل وحدة اتقول شن ادير من طاعات ، أعمال خير من باب التشجيع والحث على الخير ومن باب الدال على الخير ، وليس من باب الرياء حبيباتى والله انكلم فيكم بكل جديه اصبحت حاسه انى فى سباق مع الزمن ولازم انحاول انثقل ميزانى باسرع وقت والله ماندرى شنى ايجيب لى الزمان - ان شاء الله ما يجيب الا كل خير - لكن المؤمن كيس فطن ولازم يحسب حساب لكل شى موش هكى ولا شن رايكم ؟؟
بالنسبه ليا انا كنت مواضبه على نوافل الصلوات لكن بعد ما جبت عيالى الثلاثه -ربى يحفظهم- يدوبك نقدر انصلى الفرض فى وقته :(
كنت مواضبه على قيام الليل - ركعتين قبل الفجر - او مرات انزيد شوى لكن توة انحس الدنيا خذتنى ممكن نسهر على النت او مانصليش القيام :( المهم للاسف حتى هالعادة الحسنه تركتها
الحمد لله نحاول نتقى الله فى زوجى ونعامله لوجه الله حتى لما نزعل انحاول انكون فى اطار رضا الله موش تحسابونى عابدة زاهدة لا والله ياريتنى هكى لكن انحاول
اولادى - بنتين وولد ربى يحفظهم وينول كل محروم اللهم آمين- انحاول نزرع فيهم الاخلاق الاسلاميه الطيبه وحب الصلاة وحب القران وحب الحجاب ونحاول نبعدهم عن الاغانى والموسيقى قدر ما نقدر او ربى يعونى على ذلك اكبر بناتى 3 سنوات وشويه يعنى عيالى ما زالو صغار لكن ربى ايعينا جميعا
وقتى ما بين شغل البيت والقيام بشؤؤن عيالى لكن عندى اوقات فراغ انحس فى روحى اتفنن فى تضييعها مع انى فى غربه ووقتى ملكى - فى ليبيا وقتى موش ملكى خشات او طلعات ومناسبات وواجبات اجتماعيه - المهم يا ريتنى اتشجعونى ونشجعوا بعضنا على استثمار اوقات حياتنا راهو العمر فيسع ما يجرى او راهو ما زال قدامنا حساب عسير -نسال الله برحمته ييسره علينا وعليكم جميعا - لكن لازم ناخذو بالاسباب
الحمد لله متحجبه وابتعد قدر الامكان عن الاختلاط بالرجال - كانش فى الاماكن العامه - وربة بيت الان
انحاول انى نبر والديا بويا وامى قدر الامكان بالسؤال عنهم ومتابعة كل شؤونهم قدر ما نقدر والدعاء لهم - مع انى والله انحس فى روحى مقصرة كثيرااااااااااا فى الدعاء- :(
مصيبتى الكبيرة توة ان منتديات عالم حواء انحس فيها فادتنى لكن ضرتنى كثيرااااااا كيف ؟؟؟
انخش على قسم المكيج نلقى البنات حاطين اشكال والوان وعطور و و و و الشى اللى فتحلى عيونى على حاجات واجد ما كانتش على بالى او خلانى انقول انا ناقصنى كذا كذا وكذا مما اثر على علاقتى بزوجى :hahaha: يعنى اصبحت نبى ميزانيه اكبر من الاول
يا حبيباتى حتى قسم الديكور حاطين حاجات والله اتخلى الدنيا اتعشعش فى القلب وتخلينى نزهد فى اللى عندى ولا حول ولا قوة الا بالله
قسم الاكلات لما انشوف صور من عزايم الاخوات انقول تاريتهم مساكين ضيوفى :hahaha:
نلقى فيهم لازم ايقدمو جميع انواع اللحوم اسماك ودواجن ولحوم حمرا راهو فى عزومات عاديه موش حفلات والله انقول سبحان الله هو البنى ادم ايش يقدر ياكل
xxxxxxxxxxxxxxxxxxxxxxxxxxxxxxxxxxxxxxxx المهم ان شاء ألله انكملكم مرة تانيه -العيال معيش صابرين - لكن يا ريت نلقى منكم تفاعل وتشجيع او كل وحدة اتقول - بيش نشجعوا - شن ادير من خير = صلاة ، تلاوة ، صدقات ، صلات ، خطتها فى تربية أبنائها ، كيف تقضو اوقاتكم
افادنى الله وأياكم ( السعيد من وعظ بغيره ) أهى اختنا ويشكثر اعانى كانت تكتب زى مانكتبوا وتقلب فى صفحات المنتدى زينا نحن لكن توة أفضت الى ما قدمت - نسأل الله ان يتقبلها بقبول حسن ويجعل قبرها روضه من رياض الجنه اللهم آمين - المهم بانتظار ردودكم يا غاليات واحتسبوا كلماتكم لوجه الله وا نشاء الله ينول اللى اتشجعنا للخير الاجر والخير فى الدنيا والاخرة :)
يا ريت اللي من ليبيا اتخش
متابعة النقاش، صفحة 511