ملتقي المصريات المغتربات

صباح الخيرات حااخد لفة وراجعة

ايوة يا كلبز فعلا الشارقة ارخص من دبي وابوظبي في المفارش بالذات وبرضو اشياء تانية
المهم يكون الواحد عارف سعر الحاجة
انا اشتريت قطعة جوبلان وبعض الخداديات ومفارش
وطبعا هرينا البايع اسئلة وكان واد يمني زي السكر وبصراحة مابخلش علينا بالردود
وعرفنا منه الجوبلان صناعات ايه,,, وايه الفرق بين النول والماكينة والحاجات دي
لما نزلت ابوظبي روحت المول واكيد المول اغلى ,,,بس حبيت اشوف الفرق قد ايه وبرضو اسأل البياع نفس الاسئلة واشوف هيرد يقول ايه
كان البياع هندي وبرضو افادنا
الفرق ياستي في الدولة اللى جاي منها
لكن الصناعة واحدة ,,,,الدول الاوروبية بيكون فيها مرتب الايدي العاملة اغلى من المرتب في شرق اسيا لو صناعة النول علشان كدة في التسويق بيكون اغلى في السعر (( عقدة الخواجة يا اوختي ))
لكن شغل الماكينات معروف شكله وبيكون ارخص زي الصيني
انا كنت عاوزة انزل بس الظاهر مش هيكون فيه نصب لان الوقت خلاص مفيش الا شهر ونص ويادوب الملم الحاجات اللى باقية من ابوظبي واصلا الحاجات اللى عاوزاها مش هعرف اشتريها الا من ابوظبي
والمفارش والحاجات دي انا اول مرة اشتريها واصلا مش بحب اخزن في مصر اي شئ قماش لانك عارفة من الركنة بيخرب بعد فترة

يا جميل انت تطلب زى ما تحب ولما تجربى تطمنينا على النتيجة وبعدين مرة فى مرة بتظبط ان شاء الله
هاقولك بقى على طرقة كشرى انما ايه طعم اوى ما شاء الله

الكشرى
اساسا بيتكون من ارز وعدس اصفر وعدس بجبة ( لونه بنى) مكرونة وشعرية و حمص و تقلية (بصل محمر) وصلصة

- اول حاجة التقلية تجيبى بصلتين كبار او حسب الكمية بتاعتك تقطعيهم ارباع وبعدين شرايح وتقليهم فى زيت غزير لحد ما يحمروا تشليهم على ورق ماص للزيت ومترميش الزيت هتحتاجيه بعد كده

- تجيبى الحمص وتنقعيه شوية فى الميه وبعدين تسوية على النار لحد ما يستوى وتصفيه

- تغسلى العدس البنى ابو جبه وتنقعيه شوية وتسلقيه كمان لحد ما يستوى وتصفيه

- تسلقى مكرونة عقل ( اصغر مقاس فى المكرونة) فى ميه وملح لحد ما تستوى تصفيها وتشطفيها بميه فاترة ولما تنزل ميتها ترشى عليها معلقتين من زيت تحمير البصل علشان ياخد طعم التقلية

- ممكن تسلقى مكرونة اسباجتى بس تكسريها صغير بتبقى حلوة زى المحلات بالظبط

- تغسلى الارز مع العدس الاصفر وتصفيهم تجيبى حلة وفيها شوية زيت تحمرى فيها شوية شعرية وبعدين تحطى الارز والعدس الاصفر وتقلبى لحد ما ميتهم تنشف تحطى عليهم ماء مغلى كانك بتعملى ارز عادى وملح والقليل من الكمون وتقلبى وتسويه عادى خالص بس لما يشرب ميته تقلبى فيه معلقة او اثنين من زيت تحمير البصل

- نيجى للصلصة تسخنى شوية زيت وتحطى فصين توم صغيرين او فص كبير لحد ما يصفر تضيفى عصير الطماطم وتسبيها لحد ما تتسبك لو حسيتى انها تقيلة زودى شوية ماء وبعد ما تستوى تحطى الملح وشوية كمون بسيط و معلقة خل وتشليها من على النار بتبقى تحفة

- تعملى سلطة خضراء ( طماطم - بصل - خيار- فلفل اخضر- جزر- بقدونس) وليمون وملح وشوية خل بسيط

- تيجى للتقديم تجيبى الاطباق تحطى الاول الارز بالعدس الاصفر والشعرية ثم المكرونة العقل ثم الاسباجتى ثم العدس بجبه والبصل المقلى والحمص وترشى صلصة خفيف على الوش

- تقدمى جنبه الصلصة والسلطة الخضراء وبالهنا والشفا ومتنسيش تدعيلى :26:

ملحوظة: فيه دقة بتتعمل بالثوم والخل بتتاكل مع الكشرى بس مش عندى طريقتها ممكن البنات يفيدونا فى الطريقة
هى الطريقة شكلها طويل بس مش بتاخد وقت خالص لانك بتعملى اكتر من خطوة فى وقت واحد و اى استفسار كلنا فى الخدمة ان شاء الله

اوزا فكرتك جميلة وانا بعمل كدا بس بسرعة اللون الغامق بيرجع زي الاول..

ام عصمت ربنا تخليلك عيالك وتفرحي بيهم..

ام اكرم غاليتي اعملي بااصلك الطيب وبجد حايتكسفوا منك خالص وربنا يهدي سرك..

كلابيزو نجلاء فتحي يعني انتي قمريييية ماشاءالله عليكي..

رنون هانت والايام حاتعدي زي الصاروخ تقومي بالسلامة حبيبتي..

مدام شيري كنت بهزر معاكي والحمد لله انك بخير وحابة اقولك انا واختي جربنا صلصة البيتزا الي كتبتيها تحفة شوية عليها تسلم ايديكي..

سنبسية ان شاءالله ابنك يكون بخير دلوقتي طمنينا..

وردة ماهي اخبار النتيجةاان شاءالله نجحتي واسفة مافهمت سؤالك تبع التسويق..

بداية بارك الله فيكي على المعلومة الي كتبتيها..

اوزا والسعيدة ازيكم صباح الفل عليكم