ودي اصير بدويه والااتحول شيهانه..... وشلوووووون؟؟؟

بسم الله الرحمن الرحيم
في البدايه احب انضم الى مجموعتكم الرائعه واتمنى يكون تواجدي
مقبول بينكم واللي شجعني على التسجيل مشكلتي اللي تقول:
انا متزوجه من 11 شهر يعني الشهر الجاي بكمل سنه (ياسرع الدنيا)
المهم زوجي الله يصلحه ويهديه صقار راعي بر وكشتات مقطوع سره بالبر
يعني من اول مادخل الشتا وهو رايح جاي للبر لاوبعد يحب الصقور ويدربهن
على الصيد ويدخل مزادات للصقور ويشتري طيور تصل اسعارهن
من 2000-40000ريال وماخذ الاول بالرمايه على المنطقه ولو الدنيا على كيفه
كان انا وياه طاقين بيت شعر بالصمان والا الحره هو يقنص وانا اشخب له
العنز يعني زوجي متولع بالمقناص وبالبر ويقول انا ماني قاضين منه الا
لاحطو فوقي التراب وبعد بزوجي طبايع من اول يعني مواجيب وضيوف وعزايم
على الفاضي والمليان جلسات رجال صباحيه وسهرات يوميا يعني مااشوفه الاوقت
الاكل والنوم المهم زوجي العزيز مدرس وانا حامل بالشهر الثامن باقي اسبوع ويدخل شهري التاسع
المشكله ان زوجي اخذ اجازه استثنائيه من بعد عيد الفطر الى مالانهايه
علشان الكشته والمقناص وتركني عند اهلي (صار لي شهرين)
حاولت اقنعه يخلي الكشته بعد ولادتي مافيه فايده بكيت وصرخت وتكلمت وعصبت
وبالاخير طقيت راسي بالجدار
الحين انا خايفه تجيني الولاده وهو ماهو عندي علما بأن اهلي ساكنين بمدينه
بعيده عن الرياض ولاعندهم مستشفيات سنعه وتخبرون الوحده تحب تولد بالمستشفى
اللي تراجع به وتخبرون بعد ان المره ماتبي الا زوجها يوقف جنبها
يكفي ان هالطفل يولد بين ابوه وامه وبعد انا هذا اول طفل لي
وين الطفه اللي يقولون عنه؟؟؟؟
تكفوووووووووووون ابي احل
ابببببببببببببببببببببببي حللللللللللللل
واللي عنده مشكله نفس مشكلتي (مع اني ماظنيت)
تدخل وتقول رأيها
وآسفه جدا جدا جدا على القرق الواجد :23:

20 تعليق 5,477 مشاهدة

شاركي في النقاش

سجلي الدخول لإضافة تعليق.

التعليقات

20
  1. @mrh_1_1

    مرحبا بك بين اخواتك يالحبيبه

    الله يكون بعونك اختي لحن الشوق

    اصبري هيه فتره وتعدي حاولي تتصلين عليه وقولي له كلمتين حلوين وقولي له انا ما استغني عنك خاصتا
    في هذا الوقت اتمنى تكون جنبي وقت ولادتي على شان اول فرحه لنا
    وقولي له ان مافيه مستشفى زين عند اهلك واخاف على البيبي يسير له شي لا سمح الله
    ومن هذا الكلام يمكن يحزن لحالتك وصلي وادعي الله يحنن قلبه عليك
    وبس هذا الي عندي
    الله يقومك بالسلامه
    اختك مرح
  2. @lhn_alshrok

    صاحبة الموضوع
    مشكوره اختي mrh1
    والله يجزاك خير على الرد

    لكن بقولك مشكلتي مالها حل لاني كلمته وقلت له مشتاقه لك ومحتاجه لك
    وماراح اسامحك لو جتني الولاده عند اهلي تدرين وش رد



    والله ماهو صاير الا اللي تبين بس تصدقين.....(احسب بيقول اشتقت لك)
    تدرين وش قال
    والله طيري ممدوح صقعهم اليوم وصاد حبارى من فوق رأس الجبل
    جابه يلولح

    قلت بقلبي لا والله انا شكلي بلولح عند اهلي

    مشكوره الف مره اختي mrh1
    ودوري لي حل ثاني تكفين
  3. @mrh_1_1

    هههههههههههه
    ضحكني طيري ممدوح صقعهم وصاد حباري من فوق راس الجبل

    يالله اذا جاك ولد سميه ممدوح على اسم طيره ههههههه
    الكلام الحلو مايطلع من فم الواحدالا بالغصب بعد محاولات عديده يطلع لك كلمه حلوه
    الله يعينك ان شاء الله يجيك قبل الولاده وتفرحون سوا
    اذا حسيتي بألام اتصلي عليه وقولي له تعال ودني المستشفى
    اكيد بياجي ماراح يخليك وقت الولاده
    وسلامتك شكل ماحد صاحي وفاضي غير انا وانتي في هذا الوقت
    مشغولين
    البنات بالاختبارات الله يوفق الجميع
  4. @hrof_alhgaaa

    حبيبتي ما اقول الا الله يعينك

    وعليك باالصبر ان شاء الله اذا شاف

    ولده والا بنته بينسى صقره ممدوح

    وسا محيني يا الغاليه ضحكت على سالفت ممدوح

    صدق ( كل على همه سرى )

    ويا شيخه هونيها وتهون الحمد لله انه في هالبران

    بين الجبال والصقور ورجال شهبان
    ولا هو في في الخارج وبين ها الحمران العطران



  5. الحمران العطران هههههههههههههه ايه والله صادقه

    تحمدي ربك مافيه احلى من الرجال البدوي الي مايشغله الا اشياء فيها رمز للرجوله والمفروض صراحه تشاركينه هوايته وتفرحين اذ فرح بفوز ممدوح وتقرين كتب عن الصقور وتاخذين معلومات تناقشينه فيها ويحسك انك حاسه فيه

    < احس بيجيني بوكس منك يوديني لروضة خريم :D

    المهم ياقمر وسعي صدرك وحاولي تلينين قلبه وتتفقين معه على انه يرجع اذ حسيتي بقرب الولاده او على اخر شهرك بتفاهم والاسلوب الحلو ^_*

    والله يسهل عليك ان شاء الله ويسخر لك قلب زوجك :26:
    ..

    .




تابعي تجارب أخرى من هذا القسم.