هلا اخواتي الغاليات
والله اني مب نايمه زين من امس احب اشكركم كل من دخلت وعت لي اليوم نفسيتي هدت وانا مرتاحه والحمد لله ...
جلست طوال ليلي امس اتذكر اسلوبه معي طول السنين الماضيه وللعلم انا متزوجه من 15 سنه وقبل هالمولود جلست اربع سنين بدون حمل يعني تفرقت له ولكن هالاربع سنوات وضحة لي شخصيته زين كان يدور اي شغل يشغله عنا واي سبب وكنت اتقرب وايد منه وكان يتهرب حاولت اتقرب وحاولت وحاولت والي لقيته صد
والقرار الي انا اشوفه واحسه صايب الطلاق احسن شئ صدقوني هو يبي اي سبب له وعلى فكره هو طلقني طلقه قبل وكان متردد يرجعني ولا لا حتي يوم رجعني سالني الف مره والحين شو الحل يروح ويرجع وانا اقول هذاك كان سبب علشان نجيب ولدنا الاخير
ام اليوم فـانا مصره على الطلاق ومابيه
اليوم الصبح جا للبيت ومسك يدي واعتذر وحلف انه مافي احد بحياتي واني اهم مخلوق بحياته ولكن عنده ظروف ومشاكل !!! وطلب مني اسامحه وحب يدي وراسي وراح لشغله
لكن والله مب قادره اطالع بوجهه مع احترامي لكل الي تقرأ لكلامي زوجي وللاسف انسان حقير صح احب اعيالي وهم لي اصلن وهو راح يصرف عليهم يبي ولا مايبي الحمد لله في الامارات هو ملزم وغصب عنه يصرف عليهم والحضانه لي ...
الظهر جا وحطيت الغداء وكنت انسخ امتحانات لعيالي وقرب مني وجلس يكلمني مارديت عليه كثير الا بالمواضيع الي فيها العيال قام سالني شو فيك زعلانه ؟ طالعت فيه وقلت شو رايك! قال انا اعتذرت لك وخلاص قلت زين والمطلوب ؟! سكت واستغرب من ردة فعلي قال شكلك تعبانه قلت انت تشوفني تعبانه !! سكت وراح
عيالي قدامه يسالوني امي ليش خدج وارم ولونه ازرق قلت تعورت شويه وجلس يضحك مارديت عليه وجلست احط لحبايب قلبي غداهم واتكلم معهم عن الامتحانات
وراح ينام وانا الحين بعد ماخلصت عيالي جيت ارد عليكم
الي قالوا انتي سبب في الي انتي فيه اقولهم كلامكم صحيح انا كنت احبه وايد وكنت اتغاضى عن كل شئ يسويه لكن والله اسلوبه امس بين لي معدنه وللاسف امس بس عرفت من هو زوجي
زوجي انسان حتى اهله ابتعدوا عنه واتركوه زوجي الي هو يحبهم يحترمهم ويرفعهم فوق الراس وله فئه معينه من الناس هم افضل اصدقائه والمقربين لقلبه ومعتبرني مجرد شئ يستفاد منه
زوجي يحب عياله وايد وايد واذا هو حاطني عنده فانا متاكده بسبب عياله ولا الي شفته امس خلاني اتاكد انا شو عنده بالضبط
والظاهر هو مايعرف انه عيالي عندي انا اغلى منه ومن غيره ولهذا السبب انا اليوم راح اطلب الطلاق وبكون لعيالي بس بكرامتي واحترامي ... والحمد لله على كل حال ...
دعواتكم الطيبه احتاجها
بيطلقني لاني قلت له يازوجي اخاف على نفسي من الفتنه!!!
متابعة النقاش، صفحة 26