بنات تكفون ساعدوني اقول الصدق والا اكـــــــذب ؟؟خاصه لوكان على اغلى الناس عندك؟؟
السلام عليكم ورحمه الله وبركاته يابنات والله اني محتاره حيل اقول الصدق لـ أبوي واهلي والا امشي الكذبه عليهم
قسم بالله اكتب لكم والدموع تنزل حتى وان كان موضوعي بنظر بعضكم عادي الا انه مأثر علي بشكل كبير
انا اللي اضحك وافرح صايره حزينه ومكتئبه المشكله هي بابنات اني بالجامعه ونتائج طلعت
وانا حاسه اني بـ 3 مواد مانجحت فيهن مع اني ماخذت نتيجتي ولا وحده من صديقاتي
بتقولون طيب وين المشكله انا اتمنى اني ماخيب امل ابوي فيني لاني لوبقوله بيعاتبني وبحطمه
تخيلوا يابنات لما اغلى شخص عليكم بالدنيا يشوفك شئ ويفتخر فيه ابوي يفرح لنجاحي بشكل ماتتصورونه
احس اني ارد شئ بسيط من اللي يعطوني اياه وامي اللي كل مناها اخذ شهادتي واعوضها لو شئ قليل
من اللي تسويه معي كان حلمي بهالدنيا اعوضها عن اصعب اللحظات اللي مرت عليها اخليها تفتخر ان بنتها رفعت
راسها اساعدها باللي اقدر عليه احقق لها كل شئ ماقدرت تسويه اعوضهاعن الحرمان اللي صار لها خاصه اني بنتها
الوحيده قلت بنفسي بكذب وبمشي عليهم لقيته مو حل بكسب ذنب من رب العالمين ثم راح اخسر ثقة اهلي فيني
وراح اصير بنظرهم كذابه ومصيرهم بيعرفون واذا قلت بخسر املهم فيني حاسه بطيح من عينهم انا مابغى هالشئ لا
والله يابنات انه الرسوب مو اهمال مني من الدكاتره وصعوبه المواد مع اني قسم بالله اذاكر واروح وانا مواصله
بس الظلم عيني عينك عندنا بالجامعه ولااحد يسمع لك ولاشكوتك تعبت حيل وتوقعت انه فيه امل بالنهائي
دخلت النهائي وانا محطمه جدا جدا عارفه النتيجه والله يابنات اني ادعي ربي كل لحظه وربي مايكتب
الا كل خير وعارفه انه شئ مكتوب بس مابي اغلى الناس على قلبي يزعلون مني وانا وربي مالي ذنب
تكفون لاتستهينون بالموضوع وربي اكتب ودموعي بعيوني تنزل ادري فيه مواضيع اكثر الم وحسره ومو نهاية
الدنيا ولازم الانسان يقابله فشل عشان يتعلم عارفه كل هذا خاصه اني لسه باول سنوات الجامعه خايفه بعد اتعود على هالشئ
خائفه هالامر يحطمني من داخل اخسر مستقبلي سلاحي بهالدنيا خائفه تتكرر مع اني بحاول باأذن الله ماتتكرر بس
وشلون والاهم قولوا لي اقول الصدق والا اكذب الله يجزاكم الف خير ويوفق ويسعد من ترد على دنيا واخره
يارب ياكريم فرجها علي دعواتكم لي يابنات والله محتاجتهاا اتوفق واكون سعيده طول حياتي وارفع راس اهلي واحقق اللي في بالي
يارب اللي تدعي لي وتساعدني تفرج عليها كربها وتيسر كل امورها وكل من تحب