
اولا احب اهنيكم خواتي العزيزات بمناسبة شهر رمضان الكريم اعاده الله علينا
وعلى الأمة الإسلاميه بالخير واليمن والبركات..

خواتي العزيزات صار لي كمن يووم افكر اكتب موضوع عن الصدقه..
وتميت محتااره مب عارفه من وين ابدأ << السالفه بسيطه بس اختكم مكبرتنها..
واليوم صار لي موقف حمسني اكتب لكم هالموضوع و ابيكم تشاركوني انتو بعد
بقصص واقعيه لكم مع الصدقه...
وانا يوم بقول مواقفي ... ابي اشجع غيري يتصدقون
لاني لاااحظت ان فيه ناس يبخلون على المحتاجين ظناً منهم ان فلوسهم بتخلص
متناسين كلام الرسول عليه الصلاة والسلام "ما نقص مال من صدقه"
بالنسبة للموقف الأول...
هذا الموقف صار لي قبل زواجي بعد ما انخطبت..كلمتني صديقتي وهي صديقة الطفوله..
وكانت محتاااجه لمبلغ معين من المال وهو خمسة آلآف درهم..
وكانت جدا تعبانه نفسيا من هالموضوع..
وصديقتي هااذي عمرها ما طلبت مني مبلغ.. يعني ما طلبته الا وهي محتااجتنه..
المووهيم هذيك الفتره ما كان معاااي الا فلوس المهر .. وكان باقي منهم شي بسيط..
وانا كنت محتاجتنهم لتجهيزات العرس...
بس تذكرت كلام الرسول عليه الصلاة والسلام "ما نقص مال من صدقه"
وتذكرت بعد حديث الرسول صلى الله عليه وسلم:" من فرج على مؤمن كربة من كرب الدنيا
..فرج الله عنه كربة من كرب يوم القيامه".
عطيتها المبلغ وانا متيقنه ان رب العالمين ما بيضيع اجري..
تخيلوا شو صار ...بعد هالسالفه باسبوع انصرفت لي مكافأة من جهة عملي بنفس المبلغ الي انا عطيته صديقتي..
والله يوم سلموني الشيك بغيت اصيح...لانه كان نفس المبلغ بالضبط الي تبرعت فيه...
يتبع الموقف الثاني ,,,,,