أيتها الزوجة هل تستطعين فعل هذا ؟؟!

بسم الله الرحمن الرحيم
هل انتم معي أم ضدي برأيي في هذا الموضوع ؟؟؟
هل تستطيع المرأة فعل كل ما يقع عليها من مسؤوليات ومتطلبات في هذا الزمان
أنا سوف أكتب عن رأيي في هذا الموضوع وهو نابع عن قناعة مني وربما ردودكم تغير من قناعاتي وربما أكون على صواب
الزوجة ربة المنزل
مطلوب منها .... العمل في المنزل من تنظيف وتمسيح وغسيل وكوي وغيره و غيره ..... وهو واجبها
مطلوب منها .... الطبخ والتنويع في الأكلات والتقديم وأتكيت وغيره . وهو واجبها
مطلوب منها .... رعاية أطفالها من مأكل وملبس ومرض ونظافة وتربيه وغيره وهو واجبها مطلوب منها ....الحمل وهو واجبها
مطلوب منها .... الاهتمام بنفسها تغيير لوك من فتره لفترة حمامات بخار تتجمل كل يوم لزوجها وما تستقبله إلا بذا وذاك من الكشخة و الميكياج وغيره وهو واجبها
مطلوب منها .... الاهتمام بزوجها من راحت باله وتوفير الأجواء الهادئة و الرومنسيه والحفلات والدلع والدلال وغيره من المتطلبات الزايده وهو واجبها
أنا أرى أن المرأة لا تستطيع فعل هذا كله وأن سوت فتره ترجع تنتكس مرة ثانيه لأن هذي ضغوط فوق طاقة الإنسان ....
سيقول الكثير والأغلب منهم الرجال ( طيب كيف أمهاتنا وحريم زمان كانوا يسون كل شئ ولا يشتكون ...... أنتم والله بنات الزمن هذا مدلعين )
أنا رأيي بالرد على هذا الكلام انو البيوت تغيرت من غرفه وغرفتين بأثاث جدا بسيط إلى 5 أو أكثر من الغرف والرجال زمان مالهم متطلبات زي رجال اليوم المرأة طول الوقت بالعبايه أو ثوب ولآفه الطرحه على رأسها والطبخ كل يوم كبسه والرجال بالمقابل راضي ومبسوط .
طيب أيش الحل معظم الرجال في حل هذه المشكلة يقول للزوجة خلاص طيب سوي اللي تقدرين عليه والباقي لاحقين عليه ............
طبعا مراح تعيش في بيت وسخ غصبن عنها راح تنظف:angry: ..... مراح تقدر تهمل أولادها لأنهم صغار وأكبر مسؤولية عليها:04: فتلقائيا حتلاقي نفسها في البيت الملابس يارب لك الحمد والشكل الله يعلم بحاله والريحه كلوركس على كبسه على عطر:09:
والرجال عادي وراضي وما يلومها ويقول مسكينة تعبانه في البيت والعيال الله يعينها ويصبرها
وتمضي السنوات برضا وتفاهم على الحياة وإذا بالرجال يقول في نفسه أنا ليه (10 -15 ) سنه متزوج وأنا ماني متهني لا دلع ولا دلال ولا حرمه ينقبل عليها وماشاء الله فلان وفلان كأنهم عرسان وأنا قاعد كذا أنا والله لازم أشوف حل لازم أتهنا باقي عمري:arb:
( أنا لازم أتزوج عليها ):icon28:
أنا من رأيي في هذا الحل ما ألومه مسكين يبغى يتهنى بالباقي من عمره .
طبعا مراح أتكلم عن مأساة المرأة في ذلك الوقت والمشاكل اللي تصير في الحياة الجديدة :icon33::(.
خلاصة الموضوع انه هذا الزمان غير مو أحنا الحريم غير
والحل اللي أشوفه انو الرجال اللي يبغى زوجته تتفرغ له ولحياتها وتجددها لازم من شغالة في البيت تعين الزوجة على البيت والأولاد وتكون لها اليد الثانية اللي تقدر الزوجة أنها تصفق فيها لأن يد وحده ما تصفق
أنا هذا رأيي وتجادلت مع كثير طبعاً وحبيت أحط الموضوع في المنتدى علشان أشوف أكثر من رأي وأهم شئ يكون نابع من قناعة وتفكير في الموضوع وكمان نشوف أكثر من حل لهذا الموضوع علما بأني حاولت وحاولت إني انظم جدول في التنسيق بين الأمور ولكن لقيت إني ماني قادرة لازم أنقص جانب ولا بتروح صحتي وعافيتي وبطيح
انتظر ردودكم على فارغ من الصبر سواء رجال أو نساء
وشكراً