
السلام عليكم والرحمة
أنا اتفاءلت وايد يوم حصلت هالباب في هالمنتدى الطيب, و يا ريت لو انكن تقترحن عليه حلول لمشكلتيه.. و أجركن عند رب العالمين ان شا الله
باختصار أنا معرسة من ثلاث سنين تقريباً و عنديه ولدين.. مشكلتيه هي في ثلاث نقاط:
1*إنه زوجي متزوجني غصبن عن هله.. و أنا كانت عنديه ظروف و وافقت عليه و أنا ادري إنه هله ما يبوني.. لكن هو وعدني بانه رح يتغير موقفهم بعد فترة.. لكن للأسف موقفهم يزيد صلابة يوم عن يوم.. تصوروا الين الحين أنا ما زرتهم.. و مرة سرت عندهم لكنهم رفضوا يستقبلوني.. فشوا ممكن اسوي حتى أكسب حبهم و مودتهم خصوصاً إني صرت اتفادى الناس من كثر ما يسئلوني عن هل ريليه..
2* المشكلة الكبيرة انهم شلوا عني ولديه الاول و هو عمره سنة و شهرين بحجة انهم يبون يربونه.. و كانوا يمنعوني اني أتصل و اسأل عنه.. و ريلي يسوي مشاااااكل اذا قلتله أبا أشوف ولديه.. و انا للآن أحاول اني أخلي ولديه عندي.. حتى الولد صارت شخصيته مهتزة و غير مستقرة.. و يصارخ وايد و يضرب و عصبي عموماً.. و انا قلبيه متقطع عليه.
3*زوجي ابداً ما ييلس في البيت, أول ما ينش يطلع و يسير دوامه و بعدين يتغدا عند هله او ربعه, و يسير ميلس الشباب و يتم يالس هناك الين بعد نص الليل أو الفجر.. و هذي حالته.. و ان تكلمت معاه في هالموضوع عصب و سكتني.. مع اني متعلمه لكنه يرفض اني أشتغل.. حتى ما يخليني اطلع بره البيت ابداً.. و انا أستغرب ليش يطلع هالكثر.. مع انه البيت دوم مرتب و نظيف, و أنا ما امدح في نفسي لكن الحمد لله ربي عطاني جمال رائع, و صغيرة في السن وايد.
فأرجو منكن انكن تساعدني بمقترحاتكن و حلولكن..
و الله يخليكن سبب في فرج كربتيه..
خصوصاً اني مليت من يلسة البيت, و الوحدة تظيق الصدر مثل ما تعرفون
اسمحن لي طولت عليكن
تحيـــــــــــــــــاتي
