اهلين بجميع اخواتي حبيباتي في الله
انا اليوم ماقدرت ادخل النت مشغوله جدا لكن والله افكر فيكم
الله يثبتنا جميعا
اعتذر لعدم ردي على كل وحده على حده لاني لاريد ان تكثر الصفحات بلا فائده .
الاخت ابيسه ( افضل عدم دمج المواضيع ) اما بالنسبه للتخصص فباذن الله مع الوقت سنتعود على ان كل موضوع يناقش في موضوعه .
يابنات الاوراد لاتحطونها هنا ضعوها في موضوع الاوراد والسنه في موضوع السنه وهكذا
هنا الفوائد والتجارب والفضفضه يعني اي شئ بتقولينه تفضلي قولي كل الي بصدرك
والي عندها مشكله او استفسار عن اي شئ
لاتستحون يابنات اي شئ اسألو فيه مش عيب انا مانعرف العيب انا نبقى مانعرف طول حياتنا
اختي عين الوحش تأثرت كثيرا بمشاركتك
غاليتي حنا راح نحاول نساعدك ونأخذ بايدك بس انتي بعد ساعدينا
لازم يكون عندك قناعه ان السعاده في الدين والقرب الى الله
غدا باذن الله راح ارسلك على الخاص وباذن الله تنصلح احوالك للأفضل .
بنات بقولكم شئ غريب صار لي اليوم
انا اليوم مثل ماقلتلكم مادخلت النت لاني مشغوله جدا عندي مشكله بعملي وتاعبتني
وراح اقولكم الي صار لي اليوم .
بنات انا ابغى انقل لمكان معين ولي سنتين اطالب بنقل ولاصار لي شئ ولاحد عطاني وجه
وهذه الايام من بعد التزامي والحمد لله حركت الموضوع من جديد
طلبت نقلي مره اخرى الكلام هذا من اسبوعين تقريبا او اقل بشئ بسيط
كالعاده ذهبت لموجهاتي وماعطوني وجه بالعكس وجهوا لي نقل لمكان بعيد لاريده
وهذه المره غير كل المره هذه المره اتجهت لله سبحانه وتعالى
كنت في الماضي مادعي الى اذا كنت راح اقابل الموجهه
لكن هذه المره انا اصلي كل ليله سواء عندي مقابله مع الموجهه او لا
كل ليله اقوم الليل اتهجد كل يوم اصلي ركعتي الضحى طول اليوم استغفر واسبح
والله يابنات الاستغفار والتسبيح له طعم غريب تحسين انك متجدد ونشيطه
لما تذكرين الله دائما في البدايه كنت ازهق بس بعدين خلاص
الان من غير ماحس القى نفسي استغفر واسبح .
المهم البارح كالعاده دخلت هنا شوي واذكر اني في مشاركتي قلت لكم ادعوا لي
وارسلت لغاليتي نعم احبكم وقلت لها ادعيلي المهم دعيت ودعيت ودعيت
وتذللت لله في دعائي والي صار اليوم
رحت من الصباح للموجهه الي فوق موجهتي وبصراحه هي استقبلتني كويس
لكنها رفضت تعطيني طلبي حولتني لموجهتي العاديه ورحت لهم وانا يائسه .
دخلت لقيتهم موجهتين وجلست احاول فيهم ولاعطوني وجه ولكن بصراحه حتى لاظلمهم
كانوا ذوق معي يعني يحاولون يقنعوني .
المهم اخر شئ قالوا روحي لمديرة القسم الي اعلى منهم واذا وافقت على نقلك خلاص
مالنا شغل قلت طيب
ولكن يابنات لما جيت اطلع سويت شئ يمكن ساعدني كثير قلت لهم واذا رحت لها ووافقت
انتوا ترفضون قالوا لا اذا وافقت خلاص قلت طيب وسلمت عليهم قبل اطلع وابتسمت لهم
يعني كأني اخذت بخاطرهم قبل اطلع المهم رحت لمديره القسم الي اعلى منهم
ورفضت رفض باتا لانهم طبعا الله يهديهم مالين راسها قبل اجي .
المهم رفضت يابنات وانا احاول فيها ومافيه فايده قالت مستحيل تنقلين للمكان الفلاني .
وهنا حصلت المفاجأه يابنات ماتتخيلون ايش الي صار
انا لما رفضت تنقلني بصراحه سكت خلاص ماعندي كلام اقوله كل محاولاتي فشلت
سكت لحظه اقسم بالله ماكملت ثانيتين .
تتوقعون ايش الي صار
انا جالسه على كرسي مقابله لكرسي المديره يابنات فجأه وانا ساكته شفتها رفعت نظرها للسقف
وبعدين ناظرت بالسقف لثواني ثم ناظرت فيني قالت ممكن تنتظرين شوي برى المكتب
قلت طيب انتظرت برى المكتب وبعد دقيقتين تقريبا
جتني برى المكتب وجلست معي على الكنب الي برى
وقالت لي انا بنقلك للمكان الفلاني هم بحاجه لك هناك .
عطيني رقمك وانا باتصل فيك .
والقسم الي بتنقلني له افضل من القسم الي انا كنت ابغاه
سبحان الله شفتوا كيف رحمة ربي شفتوا فائدة الاستغفار والله اني خرجت من عندها
وانا مش مصدقه الي صار لي يابنات موضوعي له اكثر من سنتين
وانا ابغى انقل مش راضين ينقلوني كيف تبدل الحال في دقيقه .
واتبدل الحال للأحسن يعني راح تنقلني لقسم افضل من الي كنت ابغاه .
احس ان ربي كأفأني على التزامي يابنات اكثروا من الاستغفار هو السبب باذن الله طبعا .
الله يخليكم لاتلهيكم الدنيا عن ذكر الله خلوا السنتكم دائما تلهج بذكر الله .
المهم موضوعي لسى ماخلص لانها واعدتني اليوم راح تكلمني
وابيكم تدعون لي يابنات ان الله يتمم موضوعي على خير وانا الله يسخرها لي .
انا دعيت كثير ولن انقطع عن الدعاء حتى لو لم يتم الموضوع
وحتى لو توقف موضوعي مره اخرى لن اتوقف عن الدعاء
يابنات انا عرفت الطريق ومستحيل اسمح لنفسي الاماره بالسوء ان تضلني مره اخرى
الحقوا انفسكم يابنات انقذوا انفسكم من الضياع اكملوا التقصير الي عندكم
والله اني وجدت السعاده والراحه اقسم بالله حتى وجهي نور وصار احلى
حتى الاكل صار له طعم حتى نفسيتي انقلبت 180درجه
بنات انتوا ماراح تعرفون قيمة كلامي هذا الى لما تجربوه
واتمنى من الاخوات الي جربوا انهم يعطونا تجربتهم هل صحيح كلامي ام لا .
ايش حسيتوا فيه لما التزمتوا على فكره انا مش ملتزمه كثير
يعني انا مثلا حتى الان اشاهد التلفزيون
والاغاني ماشتقت لها ابدا حتى الان من يوم التزمت تركتها تلقائيا
واذا شفت اغنيه اغير القناه وهذا الي ابغاه
يعني ابغى نصل لمرحله نترك المعصيه بطيب خاطر يعني مابي اترك المعصيه وانا مشتاقه لها لا ابغى اكرهها وهذا الطريق السليم لانك اذا تركتيها وانتي تحبينها راح ترجعين لها لذلك اقولكم لاتضغطون على انفسكم وابدأو بالتدريج في البدايه اصلحوا امر صلاتكم وبعدين نتدرج حتى نصل نبتغانا باذن الله .
اقراء الشعر حتى الان اقراء شعر الغزل .
فيه اشياء كثيره حتى الان لم اتركها ولكن بالمقابل اتجهت لله
اخلصت بصلاتي كل اليوم استغفر واسبح اصلي ركعتي الضحى الشفع والوتر كل ليله
اقراء القران يوميا بس الحفظ لسى ماحفظت وهذا الشئ الوحيد الي مضايقني
لكن راح اتغلب على نفسي باذن الله وراح اجاهد نفسي
وعلى فكره انا امل بسرعه لذلك اتفرج على قناة المجد
علشان مامل واسمع اناشيد علشان مامل .
عيون الوحش بصراحه متعبتني حالتك لاني حاسه فيك
انت ماتطعمين للدنيا طعم وتقولين ادعوا لي علشان يتحقق حاجه هي الي راح تخليك ترجعين تضحكين والله العظيم يتهياء لك ياقلبي صدقيني الي بيرجعك تضحيك وتطعمين للدنيا طعم هو الرجوع لله واقسم بالله ماتحسين بالسعاده حتى تحسي بطعم الصلاه وذكر الله .
انا حاسه فيك لاني في يوم من الايام كنت مثلك لكن الحمد لله الي خلصني من حياة الظلام
ظهرت للنور ولن ارجع باذن الله .
سأرسل لكي على الخاص عندي كلام كثير بقوله لك لكن الي اتمنى من البنات ان تدعوا لاختنا عيون الوحش ان يهديها الله الى الحياه الافضل .
ولاتنسون يابنات ادعوا لي ان موضوعي يتم على خير .
وعلى فكره حتى لو لم يتم موضوعي فلن أيأس وبقول الخيره فيما اختاره الله
وبستمر بدعائي وذكري لله عز وجل .
لي عوده يابنات بس مضطره اطلع الآن
فمان الله
يامثبت القلوب ثبت قلبي على دينك
اللهم اعني على ذكرك وشكرك وحسن عبادتك .
][][§¤°^°¤§][ فضفضي معنا في ((الصحبة الصالحه)) ][§¤°^°¤§][][
متابعة النقاش، صفحة 22