السلام عليكم
موضوع المهر يختلف من وحدة لوحدة
هذا يرجع لحالتها المادية وحالة المتقدم لها
فأذا الحالة المادية للعريس ضعيفة اكيد الاشياء بتكون بسيطة
والعكس صحيح
وممكن لو كان ابو العروس حالته كويسه يساعد بنته بأضعاف المهر
وحتى لو كان العريس حالته المادية كويسة ومهرهم كويس
نجي هنا لحالتهم الاجتماعية...هل هم راعين عزايم ومناسبات وعروس؟؟؟
اذا كان ايه لازم العروس تجتهد في التفصيل واللبس والمكياج وغيره لانه ماعطاها المهر عشان توزيه
مع انها حرة اذا تبي توزيه وتحتفظ فيه
بس كثير ناس اعرفهم يتفآجأون بعروسهم ماجهزت شي وهم معطينهم مهر كويس (أعتبر المهر كويس من 50 وفوق) ويتفشلون عند اقاربهم وبصراحة معاهم حق
و كثير يجي الحكي من الحمولة بسبب هالشيء
احترم طبعا حق العروس بالاحتفاظ بمهرها او بعمل مشروع او توزيعة او التصدق فيه بس زي ماقلت لكم لازم تنتبه لمقدار المهر اللي يبين حالة العريس +وضعهم الاجتماعي
والله يكون في عون البنات اللي لازم يشترون ذهب...وعوايلهم تهتم بهالشي لانه من جد يصرف من الميزانية
احنا في عائلتنا مانقرب جمب الطقوم
بس ماشاء الله تجيك طقوم من عمانك وخوالك وعماتك وخالاتك كل طقم احسن من الثاني
يعتمد على حالة المادية للمرسل
فماشاء الله اقاربي هداياهم راقية وروعة فكل تجهيزي راح على لبس ومكياج وغيره
ووزعت فلوس لجداتي وخالاتي وعماتي وامي وابوي واخواني وابوي ماقصر معي ابد زاد على المهر
والحمد الله تصدقت وهذا اهم شي
واحنا اللي سوينا العرس لان اهل المعرس مايبون بس احنا كنا نبي
وغالبا عند اقاربنا العرس على اهل العروس
مساكين اهل العروس عندنا كل شي عليهم العرس والشبكة حتى عزيمة النفاس مايروح فيها الا الضعوف
ولما جيت اجهز كنت عارفة حمولتي وطبعهم كل يوم عرس وعزايم ومناسبات وفصلت اربع فساتين عروس راقيه وكلهم استهلكتهم مليون مرة +اشتريت اثنين جاهزة وبرضوه لبستها
اما اللي اهل زوجها مب راعين عروس فستانين عرس وكثيرة بعد
انا سلفتي مسكينة ابوها بخيل واخذ نص مهرها فصلت فستان عرس واحد والله لايوريك على كلام الحمولة ذب في ذب وما ألومها مالها ذنب
انا الوم اللي ابوها كويس ومو محتاج وهي مو محتاجة ومع ذلك توزي مهرها وتشتري خرابيط
فمن وجهة نظري الشخصية اللي حالتها المادية كويسة وحالة زوجها كويسة مايعتبر ابدا اسراف او تبذير اذا تنعمت بمهرها وشرت اشياء تفيدها ولاتحرجها عند حمولتها
بالنسبة للي بيسافرون على طول لاتفصلون اي فستان زواج لانكم بتروحون وممكن تروح موضته او يتغير مقاس جسمك واذا رجعتي يمديك في يوم تشترينه جاهز ومن ارقى المحلات
حتى الذهب نفس الشي وخصوصا انه غالي
لذلك انصحهم يحطون مبلغ صغير على جنب عند امهاتهم واذا رجعو ياخذونها ويشترون لبس وطقم
هذا رأيي الشخصي واحترم أراء الجميع
00>>(( المهــــر من / وإلــــى ! كم مهرك وكيف قسمتيه))<<00
متابعة النقاش، صفحة 10