عدنا من جديد :)
حبيبة قلبي.. الولد حسب ما تعودينه .. وصحيح ولدي في الأول كان يقوم في الليل .. لكن لما تعود ان ما في غير الينسون في الليل ما صار يقوم ابد وكان يواصل لين الفجر .. مع العلم اني كنت انومه الساعة تسع .. يعني ينام ثمان أو تسع ساعات متواصلة.
شي ثاني يمكن يكون فيه فايدة .. انا كنت منظمة رضعات ولدي من وقت ما خلص الأربعين .. يعني الحليب مب كل وقت عمال على بطال .. ولا كل ما قال الواء نطيت وعطيته صدري أو المرضاعة.
لا ...
في أول شهرين كنت اعطيه رضعة كل ساعتين .. ومثل ما قالت poce الكمية حسب الوزن مب حسب العمر .. وفي الشهر الثالث والرابع كنت اعطيه الحليب كل ثلاث ساعات .. وبعدين صار كل أربع ساعات .. وهكذا .... (شكلها صارت محاضرة :)) .. لين صار ياكل أكلنا العادي .. وبعد الرضعة ما في حليب لين موعد الرضعة اللي عقبها .. والحمدلله فديته كان متجاوب وياي وايد في سالفة تنظيم الرضعات لدرجة انه ما كان يصيح الا يوم يقرب وقت الرضعة .. وبعد فترة بسيطة ما صار يصيح أساسا لأني ما كنت افوت وقت الرضعة واسويها في موعدها بالضبط.
والحين يوم أسترجع ذكرياتي مع ولدي في شهوره الأولى ما أتذكر متى كان يصيح بالضبط :)
صحيح الاطباء ما يحبون سالفة تنظيم الرضعات هذه بس بصراحة التنظيم كان وايد مريحني ومريح ولدي وكان الطبيب دوم يقول ان صحة ولدي زينة ووزنه مناسب لطوله وما عنده اي مشاكل صحية أو نقص تغذية ولله الحمد.
الخلاصة .. مشكلة معظم الأمهات انهن ماشيات على البركة وقلوبهن رهيفة وينكسر خاطرهن بسرعة وما يتحملن صياح عيالهن .. بس لو كل وحدة قوّت قلبها شوي بترتاح وبعد بيرتاح ولدها .. وهذا عن تجربة شخصية مع ولدي الله يحفظه.
لا حد يزعل مني .. بس دلع الأم هو اللي يؤدي إلى دلع الياهل.
ابني عمرة شهرين ونص جنني نفسي انام 3 ساعات متوااااااااااااصله
متابعة النقاش، صفحة 6