احب عيال زوجي وأبغى اتطلق عشانهم !!!
السلام عليكم ورحمة الله وبركاته
حبيباتي بنات حواء
انا جديدة على المنتدى ومحتاجة بعد الله لآرائكم
بقول لكم مشكلتي واتمنى تفكرون معي في حلها
انا متزوجة من واحد أرمل وعنده اولاد هو جامع الزين كله ولله الحمد دين واخلاق وتعامل وروح طيبة
وعياله ماشاء الله تبارك الرحمن على اخلاقهم وانا متعلقة فيهم واحبهم كثييييير
مو لاني طيبة لا..لانهم مؤدبين وحبوبين ويحبوني
وينادوني ماما والله اني ما افرق بينهم وبين بنتي اللي هي اختهم
المشكلة اني ابغى اربيهم على طريقة معينة وابوهم متساهل شوي
يعني ما يهتم كثير في مسالة اللبس ومدلع البنت زيادة وقاسي على الولد حبتين
لدرجة ان البنت صارت تكذب وبشكل واضح وعدة مرات لاحظت الصفة هذي فيها
قلت لابوها مرة وقال لي لاتسالينها كثير علشان ما تضطر للكذب والله انها تكذب حتى من غير
ما أسألها عن شيء ... عمرها تقريبا عشر سنوات حبوبة وحنونة ومحافظة على صغرها على الصلاة
وتحاول ترضي ابوها وترضيني وما تحب تزعلنا في شي الا انها احيانا تطول صوتها على ابوها واحيانا
ماتسمع كلامه الا اذا حست انه بيزعل عليها.
والولد فيه رقة شوي مع انه تقريبا 12 سنة وانا ودي يكون رجال يتعود على الرجولة لكن ابوه نادر ما ياخذه معاه
للمسجد ولا حتى يخليه يجلس مع اصحابه كل جلوسه معي ومع اخواته ولا عماته وخالاته وبناتهم
فأنا أتضايق وتصير بيننا مشاكل بصراحة انا السبب لاني عصبية ولا اتمالك نفسي
واتلفظ بالفاظ مو زينة وازعل من نفسي واعتذر له
ويرجع الامر مرة ثانية مشاكل وخلافات
والله ما يمر علينا يومين من غير مشاكل وغالبا اطلب الطلاق وانا ابغى اتطلق فعلا
لكن انا عارفة نفسي ما اقدر اعيش من غيره لاني أحبه كثير وهو يحبني كثير
من شوي صارت مشكلة بسبب تافه عنده لكنه عندي كبير بخصوص العيال
وطلبت الطلاق وقلت كلام ما ينقال وهو طلع زعلان من البيت
فأيش رايكم ؟؟
أعيش في شقة لحالي وافتك من المشاكل مع اني حاولت لكن ما قدرت استغنى عن العيال ؟
ولا أستمر في الحياة معاهم بهالوضع وكل يوم مشاكل وهواش مع ان زوجي ما يحب المشاكل ؟؟
والله محتارة ما ادري ايش اسوي
انتظر ردودكم الله يسعدكم لا تطنشوني ...