شلونكم بنات ..
بصراحة مدري إذا كنت بفيدكم بقصتي ولا لا..
بس سبحان الله يمكن لأن في وحده كان كلامها بعد الله سبب بسعادتي
حبيت أن هالكلام يوصلكم يمكن يسعد ويريح وحده فيكم..
أنا بحاول أختصر قدر الأمكان لأن أهم شي من الموضوع توصلكم الفكرة..:27:
بدأت القصة عند صديقتي هي طالبة جميلة خلوقة ملتزمة ومتفوقة دراسياً
يعني ينقال عنها كاملة والكامل الله..
تقدم لها ولد عمتها متخرج وظيفته على قد حالة وساكن بشقة صغيره غرفتين وصاله
وغير مؤثثة بالكامل عند أهله..
يعني مافيه ذاك الشي اللي يجذب بس أنه ملتزم وخلوق..
كانت مترددة وكل يوم تكلمني وأخيراً قررت الرفض ..
بعدها بيوم أتصلت وقالت لي باركليي
قلت لها على مين ؟؟
قالت على ولد عمتي..
قلت شلون مو قررتي خلاص..
قالت لي يوم بلغت أبوي قالي يابنتي أن كنتي رفضتية عشان
وضعه ترى حرام عليكي يابنتي (( إإِن يَكُونُوا فُقَرَاء يُغْنِهِمُ اللَّهُ مِن فَضْلِهِ ))
تقول كلام أبوي غيرني 180 درجة وماصحيت الا أنا موافقة بفرحة وراح مني القلق والتوتر..
تزوجت وكم شهر صار معيد ماشاء الله ..
وهي تخرجت وكم شهر توظفت وتحسن وضعهم مره ..
والأن هي وزوجها بامريكا هو يحضر دكتوراة وهي تحضر ماجستير
والله رزقهم من فضلة بولد وبنت ياخذون العقل..:)
أما أنا كنت في مشروع خطبة من ضابط ويعمل أيضا بالتجارة
يعني بالعربي متررررريش .. وكل للي خطبوني قبلة نفس الشي
وأهل أبوي كلهم وضعهم المادي فوق القمة ماشاء الله
إلا أهلي يعني أحنا الوحدين اللي وضعنا متوسط لاسفر ولا تمشيات ولاشي
يعني بالنسبة لي شي لقطة وفارس الأحلام..
والكل متوقع أنه الأمر بيتم.. بس سبحان الله ربي ما أراد..
دق علي أخوي بنفس ذيك الليلة وقالي هل عندك إستعداد تتزوجين من شخص
وضعه المادي بسيط..
بدون تردد قلت بشرط ما ياخذ مساعدات من أهلة ويكون طموح..
قال هذي منهية أنا أعرفه زين..
وتزوجته لأني كنت حافظة الأية (( إِن يَكُونُوا فُقَرَاء يُغْنِهِمُ اللَّهُ مِن فَضْلِهِ )) ومقتنعه ومؤمنه فيها جداً..
أهلي الكل أستنكر ..
وش حادك .. وليش ماليش..
وأنا والله ما أكذب عليكم تضايقت منهم وخنوقوا فرحتي وترددت
بس ثبت على كلمتي ليش مدرررري..
بس في شي كان مره جاذبني له..
أني سمعت أن وحده من خواته حلمت أنه بيصير شيخ وكذا مره تحلم بهالشي...
قلت بقلبي لو صارت وصدق الحلم أكيد بأظمن سعادتي وأستبشرت خير :)
ويكون هذا عوضي عن أموال الدنيا..
تزوجته ...
وصرت بفضل الله من أسعد الناس..
ماسفرت شهر عسل .. والكل أنجن كيف ماتسافر
كأن السفر فرض علينا ولازم نقوم به واللي مايسوية كافر ويصير حديث المجلس :09:
حملت وتعبت بحملي مره وترقدت أكثر من شهر عجز يدخلني مستشفى خاااص
وأعمامي ثارت ثورتهم ليش ماعلمتونا بنتنا نقوووم فيها..
بس أنا رفضت أحد يتدخل .. لأن زوجي ماقصر معي لو بكلمة
تدرون وش بغى يسوي بغى يبيع سيارته عشان يعالجني ..
والله يابنات دمعته وهو يقول لي هالشي بالدنيا ومافيها..
برغم أن أهله كلهم قادرين يعالجوني بس محد فزع لنا ..
وماهمني لأني عارفة أن ربي بيفرجها..
وجتني واسطات الدنيا غرفة خاصة وأكل خاص
وأهتمام خااااص كني بأقوى مستشفى خاااصه
وعدت بفضل الله وولدت ..
طبعا الكل مصدوم أني ولدت بحكومي كنه حرام ولا بدعه خخخخخ
كل طلباتي وفرها لي على قد مايقدر ولا قد حسيت أنه قصر بشي
ولبسي بنفس مستواي يوم كنت ببيت أهلي,,:)
وقبل أمس دق علي قالي أبشرك جانا تأمين طبي
وراتبي تضاعف 3 مرات وصار فوق العشرة :icon28:
قفلت الخط ودمعتي نزلت وتذكرت صوت صديقتي وهي تقولي
(( إِن يَكُونُوا فُقَرَاء يُغْنِهِمُ اللَّهُ مِن فَضْلِهِ )) :)
كل هذا من فضل ربي :)
شاركي في النقاش
سجلي الدخول لإضافة تعليق.
التعليقات
98- الله يوفقك اختي ويرزقك من اوسع ابوابه
اللهم امين يارب - تسلمين حبيبة قلبي
شرفني مرورك وفرحني أن أول مشاركاتك كانت
من نصيبي :) - سبحانك يارب
الله يهنيك ويسعدك اكثر واكثر - ماش شاء الله.الله يهنيك حبيبتي.ويزيدك من فضله.أهم شيئ يجبك ويبغى راحتك ويتقي الله فيك.حافظي عليه وماعليك من كلام الناس.الناس عمرهم ما يرضون.أهم شيئ حياتك وسعادتكم.الله يحفظكم لبعض...دمتي بود
- الله يرزقك ويوفقك ويسعدك دنيا واخره يارب
مواضيع مشابهة
تابعي تجارب أخرى من هذا القسم.