أنا وزوجي <ومشكلة البيت>

السلام عليكم يا أخوات .....

بدخل في الموضوع على طووووووول

أنا متزوجة من 3 سنين وعندي ولد... وبعد الزواج بــ 6 شهور توظفت ... واتفقت أنا وزوجي نتعاون على بناء البيت ... يعني نوفر من راتبنا الشهري مبلغ جيد في حساب التوفير ... لانا ساكنين في ملحق صغير من غرفة نوم صغيرة جداً وصالة صغيرة ومطبخ وحمام.

المهم حاولت أوفر قد ما أقدر يعني ما أسرف على نفسي واشتري بالمعقول كله علشان عيالي يرتاحون ويكون عندنا بيت يضمنا.

وأنا من النوع اللي أساعده في بعض المصاريف وليس كل المصاريف ... مثلاً في الأعياد والأعراس أنا اشتري لنفسي اللبس والشنط والعطور ... وهو يصرف على البيت وبعض الأحيان يصرف على لبسي ...

كان قصدي إني أساعده ... مش ابعد عنه المسؤولية ...

المشكلة اللي صارت أنه على شهر 3 الماضي اشترى سيارة لأنه سيارته قديمة.. وأنا ساعدته ..سلفته 70 ألف مع أنه عنده وديعة 45 ألف في البنك ..بس أنا ما رضيت يفكها علشان نوفرها للبيت ... المهم هو حالياً اشترى سيارة ثانية فورويل موديل قديم شوي علشان يقضي أشغاله مع أنه سيارته الأولى تؤدي الغرض ...بس هو عاندي واشترى هالسيارة ...وهالسيارة كلفته 22 ألف ... مع أنه نحن محتاجين هالفلوس للبيت لأنه راح نبني بعد شهرين .. وحالياً عنده بس 23 ألف فقط!

والحين هو بدال ما يوفر ..قام يصرف .. يوم أكلمه يقول لي 22 ألف ما تسوي شي للبيت ... مع أنها تسوي وايد ..
وهو على فكرة مسرف وايد وما أحسه يتحمل المسؤولية ... يعني معتمد على فلوسي في بناء البيت ...

وبصراحة قررت إني ما اعطيه ولا شي ... علشان يتأدب ويحس بالمسؤولية .. مع أنه قاللي بيرد الفلوس ... بس ما اعتقد يردهم لأنه البيت بيكلف فوق المليون وهو مستحيل يوفر هالمبلغ ويعطيني في المستقبل...

ويقوللي إذا ماساعدتيني بتسلف من البنك الإسلامي ... والمشكلة إنه البنك ياخذ وايد فوائد ... وأنا ما أبغي تزيد تكلفة البيت ...

بصراحة أنا محتارة ؟؟؟ أريد أأدبه علشان يحس بالمسؤولية وفي نفس الوقت إذا ما ساعدته راح تزيد الفوائد علينا ؟؟

شو أسوي ؟؟؟
ساعدوني الله يخليكم ...

26 تعليق 1,978 مشاهدة

شاركي في النقاش

سجلي الدخول لإضافة تعليق.

التعليقات

25
  1. حبيبتي
    خلي قرشك لك لا تعطينه
    يبي يتسلف خليه يورط حاله بكيفه
    و البيت اذا انتي اللي بتبنينه سجليه باسمك ترى الدنيا ما بها أمان
  2. @albdoyh

    نصيحتي لك اولا خليه يرجع لك فلوسك

    وانسي مووضووع انك تبني بيت معاه

    لانه واضح انه زوجك زي زوجي هذا اخر اهتماماته

    وانا لاني مو موظفه شلت الفكر ة من راسي

    بس انتي ماشاء الله عليك موظفه وعاقله ووممكن تبني بيت لوحدك من راتبك وتخليه هو يصرف عليك

    بتقولي راتبي ما يكفي على الاقل اشتري ارض وحبه حبه ابنيها لو تجلسي 10 سنين المهم بتكون حقتك لوحدك لانه ما يستاهل يكون له بيت من فلوسك

    اتمنى تكون وضحت الفكره
  3. @bnt_alnor2007

    والله ياقلبي ماودي اعصيك عليه

    انا اقول لو تبي تدفعي فلس واحد

    خلي كل شيء بإسمك

    غير كده قولي له يفتح الله


    ترى الرجال مالهم امان

    وحده قريبتنا مديرة ثانويه

    وبنت مع زوجها ودفعت دم قلبها

    بالنهايه بعد ماخلصوا الفله

    قالها بجيب حرمه فوق وانتي تسكني بالدور الارضي

    طبعا انصدمت فيه

    شوفي فين كمان بيحطها


    قالت له ابيك تطلقني

    قال لها بطلقك بس بشرط تتنازلي عن الفله

    قالت بتنازل لك عنها وانت تتنازل عن اطفالي

    ووافق

    طبعا اخذ شقى عمرها بالدنيا وعند الله مافي شي يضيع

    اللحين بنتها وولدها كبار مشاء الله حتى بنتها تزوجت


    ولعلمك

    ترى زوجها مو بس كان يحبها

    لا وكمان حارب كل شيء عشان ياخذها

    يعني كان بينهم قصة حب ماتتخيليها

    لكن الفلوس تغير النفوس


    وبالنهايه استخيري

    والله يوفقك

تابعي تجارب أخرى من هذا القسم.