الموضوع مغلق
** ضروري عن رائحة المنطقة الحساسة للمتزوجات ؟؟
السلام عليكم و رحمة الله و بركاته ..
يا بنات الله يسعدكم ردو عليا بكل أمانة و بأسرع وقت ..
أبغا أسألكم أسألة مررررة محرجة بس والله مهمة ..
أنا حأقولكم الموضوع بالتفصيل :
قبل أسبوعين تقريبا كلمتني صاحبتي مرة قريبة مني يعني أختي و أكتر :)
قالتلي عن موضوع مخلي نفسيتها مرة تعبانة ..
هي متجوزة .. و قبل شهر تقريبا سار عندها إفرازات مرة كتيرة ..
و تشتكي من ريحة أكرمكم الله ( عفنة ) ..
هي والله بنت مرة نظيفة و تهتم بنفسها من كل النواحي
والإستحمام بالليفة و السكرب و الغسولات و الشاور جل و الصابون و العطورات
و المسك و كل شي متعلق بالإستحمام و النظافة الشخصية تلاقيه عندها
بدون مبالغة ..
أنا حاولت أساعدها بإللي أعرفه و سألت لها ناس أعرفهم ..
و سويت سيرتش في المنتدى هنا حاولت أفيدها من بعض مواضيع المنتدى
المتعلقة بدا الموضوع بس تقول ماجابت معاها فايدة و الريحة هي هي
و كمان بتزيد ما بتروح :09:
و معليش عالوصف بس حأقول لكم كلامها بالكلمة :
إفرازات كتيرة و شفافة و لزجة و تزيد بشكل غريب و محرج وقت الجماع ..
و ريحة في نفس الفتحة كأنها طالعة من جوة ..
و ريحة مرررة قوية بين الفخود ..
و وصف الريحة ( كأنها أكرمكم الله ريحة براز أو غازات ) يعني لو أحد جالس جنبها
يحسبها بتسوي شي !!
( مو زي ماهو مكتوب هنا في المنتدى إنه يكون ريحتها زي ريحة السمك
و هادا يعني وجود بكتيريا و فطريات أو روايح تانية ) !!
يعني لو كانت جالسة و قامت تمشي الريحة تطلع منها كأنها مسوية شي !!
أكرمكم الله ..
و ماعندها حكة ولا أكلان ولا شي مصاحب لدي الأعراض ..
بس تقول كأنها حاسة زي الإرتخاء في المنطقة زي كأنها سايرة طرية
أو كأنه شي نازل منها ..
و طول الوقت تحس نفسها مبلولة أو فيه شي سائل بيخرج منها ..
* فيه ناس قالولي يمكن ما بنتظف نفسها بعد الجماع و يبقى بقايا المني
جواتها و هو إللي بيعفن و بيعمل بكتيريا تسبب الروايح دي ..
بس تقول لا أبدا تنظف نفسها مزبوط و بالدش و تغسل بالصابون دايما ..
و تقول إنه بالعكس زادت الروايح و الإفرازات بالذات لمن جوزها سار يبعد عنها
وما بيسير بينهم شي إلا كل فين و فين ؟!؟!
( أيش يعني دا الكلام ) ؟!
و في نفس الوقت تقول إنه أول مرة يسير عندها ريحة وحشة
في نفسها .. تقول ريحة في فمها و هي تشمها و حتى تطلع من خشمها !!
و تقول كل شوية تقوم تفرش أسنانها وتتمضمض بالموية و الملح
و غسول الفم وكل شوية تاكل لبانة جديدة من النعناع القوي و برضو
الريحة موجودة !!
و نظفت أسنانها و لسانها و فرشت فمها كله و نظفت بالخيط بس مافي
فايدة !!
و راحت لدكتور أسنان و قالت له عالمشكلة و كشف عليها مزبوط
و قال لها أسنانك و لثتك طيبة مافيها لا إلتهابات ولا تسوس ولا شي
و حشواتك طيبة و إنتي منظفة أسنانك كويس !!
و تقول برضو إنه فيه ريحة في شعرها مع إنها تتحمم كل يوم و تزبط
شعرها و تحط سيروم أو جل أو تسشوره و تزبطه و أحيانا تحط من المسك
الدهن أو العود الدهن في شعرها و جبينها و وراء إدنها و تعطر جسمها كله
و أحيانا مع العطر تحط كريمات معطرة زي كريمات البودي شوب و غيرها ..
و تحط بودرة و تفضل ريحتها حلوة بس لمن تنام و تصحى تلاقي ريحة
راسها و جسمها أكرمكم الله كأنه لها شهر ما أستحمت !!
حتى المخدة و الشرشف و اللحاف يسير فيهم ريحة !!
( يعني لاحظت زيادة الموضوع بعد النوم مهما كان المحل إللي نامت فيه
و غيرت الشراشف لقطن 100% حتى حسبت إنه عرق فسارت تفرش
منشفة عالمخدة و تحتها عشان تغيير وغسيل الشراشف متعب و صعب ) !!
بالنسبة لنظافة المنطقة الحساسة و بالذات بعد المشكلة دي :
هي تقول إنها بتستعمل غسول إسمه فيمي جل مدري فيمي ووش
حتى أعتقد إنه كتبت عنه الأخت توليب قبل كدة و قالت إنه ممتاز و حلو ..
و غسلت بالمرة .. و بالماء و الملح .. و بالديتول الأخضر .. و بصابون الديتول ..
و دايما تنتف بالحلاوة عشان تطلع طبقة الجلد القديمة إللي في المنطقة ..
و أحيانا تشيل بالموس ..
و ماتطلع من الحمام أكرمكم الله غير تنشف نفسها بالمناديل و تستعمل الكير فري
على طول حتى لمن تخرج تاخد معاها غيارات .. و تحط بودرة بين فخودها بعد ما تلبس ..
و يوميا تغير ملابسها الداخلية كم مرة خصوصا إذا جاء وقت النوم تشطف جسمها
و تغير كل ملابسها ..
يعني زمان كانت تسوي نفس الطريقة و بدون مبالغة تشمي ريحتها بودرة و نظافة
و عطر ماشاء الله كأنها دوبها طالعة من تحت الدوش ..
بس دحين تقول إنه تحط دا كله و برضو ريحتها بتطلع !!
لا تقولو شكاكة و مسوسة .. هي اليوم مرة نقحت عليها كرامتها و جلست تبكي ..
راحت عند أمها .. و هي أمها مرة شديدة معاهم خصوصا من ناحية الإعتناء الزوجي ..
فأخدتها على جنب و قالت لها إنتي أيشبك يا بنت صاحية ومانتي فاطرة ولا مفرشة أسنانك
و خارجة و جالسة كدة ياللي ما تستحي أنا كدة علمتك ؟؟
هي أنصدمت قالت لها إلا أكلت و فرشت و بآكل لبانة نعناع ليش ؟!؟!
قالت لها ريحة نفسك فايحة في الغرفة كلها و في وجه إللي يقرب منك !!
البنت أنفجععععت !!
بعدين قالت لها إنه فيكي ريحة .. شكلها ما حبت تحرجها و تفصل لها من فين مصدر
الريحة .. بس قالت لها فيكي ريحة حتى محل مانتي جالسة سار ريحته زي ريحتك !!
يعني أيش تنفهم هادي !!
وأستحت مررررة من أمها و جلست أعطتها كلمتين و قالتها سوي حمام
( يعني زي المغربي بس هي دايما تسويه ) و هوي نفسك و أتشمسي عشان جلدك
و مدري أيش كلام زي كدة ( حست إنها كسفتها ولمن شافت دموعها نزلت ما قدرت
تشد عليها أكتر و دارت الموقف و سكتو الإتنين ) !!
و رجعت البيت و سارت تشمشم كل شي !!
ملابسها و سريرها و لحافها و كل أغراضها ..
تقول حتى محلها في الكنبة إللي هي تجلس فيها سار فيه زي ريحتها !!
و شالت الشراشف و غسلت كل شي ..
حتى تقول إنها سمعت عن شرب المرة إنه مفعولها زي المضاد الحيوي
و المضمضة بيها إنها كويسة ..
و شربتها عشان قالت لو عندها شي في بطنها إلتهاب ولا بكتيريا أو شي
يتعافى مع المرة ( هل هادا الكلام صحيح ولا المرة ضارة إذا أنشربت ) ؟؟
و برضو ماجابت فايدة ..
و شربت سنامكي كم يوم وراء بعض عشان تنظف بطنها و الوضع زي ماهو !!
المهم هي نفسيتها معدوووومة مررررة تقول لي ألحقيني أيش أسوي ؟؟
و دحين مرة ما تقدر تروح لدكتورة لأنه جوزها مسافر و اليوم راجع في الليل
ومافي أحد حيقدر يوديها .. وماهي قادرة تنام من قهرها و خجلها :44:
و هي مرة مكسووفة من جوزها و مكسوفة من نفسها حتى أول مرة تقول لي
كلام بالتفصيل بدي الطريقة لأنه أول مرة يسير معاها شي زي كدة في حياتها ..
هي لها ماشاء الله 4 سنين متجوزة و ماقد أشتكت من شي زي كدة أبددددا !!
والله مرة بالي مشغوول يارريت تردو عليا من دحين للليل عشان تشوف حل
قبل ما جوزها يوصل الله يسعدكم و يفرج همومكم فرجو عن أختكم في الله :44:
وهي مستحية تروح للدكتورة تبغا تستنيه يسافر تاني لشغله عشان لا يروح
معاها و يسمع وصفها للدكتورة عشان لا يضيق قلبه و يقرف و ينفر منها بزيادة :(
معليش سامحوني عالوصف المفصل و المقرف بس أنا مرة أحترت معاها
و قلبي مشغول عليها لأنها بتقول إنه جوزها ملاحظ الموضوع
بس ما أتكلم بس تحسه مبعد عنها حتى لمن سافر و قبل ما يسافر
مرة ما قرب منها وهي خجلالالالانة وخايفة لا يقرف منها و يكرهها :44:
و أنا كمان مرة مستحية منها و لها و منكم :icon33:
لا تبخلو و لو بأبسط شي تعرفوه و ( جربتوه بنفسكم ) ممكن ينفعها :)
لأنه زي ما إنتو شايفين الموضوع مرة غريب و معقد و محرج
و بصراحة ما ينسكت عليه و إنتو يا متجوزين عارفين الوضع :44:
بــــإنــتــــظــــــــاركــــــــم ..
تحياتي ..
جــــداويــــــــة