السلام عليكم ورحمة الله وبركاته
هذي قصة واحد مصرقع حاط دوبه ودوب هالديك المسكين....بنزل لكم كل يوم حلقه
وهذي الحلقه الاولى
كان عندنا ديك ماهوب صاحي متى ماخمت براسه اذن مزعجنا ومزعج جيرانا واللي مصبرنا ومسكت الجيران على ازعاجه هي جدتي ام الوالد تغلي الديك بالحيل تقول انه من ريحة المرحوم جدي الله يبيح منا ومنه
الجيران يتمنون يجي اليوم اللي يتباشرون فيه بموت الديك وياكثر ماحرشوني على الديك يبوني اذبحه اذكر منهم قصيرتنا العجيز شتره قالت لي :ان ابعدت الديك عن بيتكم او ذبحته ولاعلمت جدتك اني انا ياشتره اللي قايله لك بشتري لك موتر
قلت في بالي والله من العياره يا عجيز ام الهجرس بيتها في اقصى الحاره تقول انها بتشتري لي موتر اذا ذبحت الديك وجبت لها راسه ملفوف في وسط خرقه مع ان ام الهجرس اصلا ماتسمع لا اذان الديك ولا اذان المذن صمخه يالله حسن الخاتمه والله من النجاسه يا ام الهجرس كله لانها ماتواطن جدتي
بصراحه انا اللي قاهرني زود على ازعاجه انه ديك على عشر من الدجاج وشايف نفسه ونافخ ريشه على الدجاج يابغضي له
انا ودي بذبحته و ارتاح من ازعاجه بس مايحصل لان عشة الدجاج فوق السطح وباب السطح قبل مقفول ومفتاحه مع جدتي ان نزلت صكت الباب وان رقت على الدجاج صكت الباب دونها
اذكر مره هذا يوم كانت جدتي تخليني انام معها فوق السطح كانت جدتي نايمه وانا استغليت الموقف ودخلت العشه وزنطت الديك وحطيته وسط كرتون وذبيته وسط الديره واجي راجع للبيت وانا مبسوط ومتشقق من الوناسه وش عليك بتنام الليله من دون ازعاج واول مافتحت باب الشارع نزل فوق راسي شي زي المويه و انا اناظر وارفع راسي واشوف الديك فوق جدار السطح يناظرني ويهز كتوفه
وتويق جدتي من فوق السطح وتاخذ الديك وتذب علي مرقدي ومن عقبها ماعاد تخليني جدتي انام فوق السطح
ومره من المرات عطاني ابوي مفتاح موتره يبيني انزل له غرض من شنطةالسياره وانا طالع شفت <<<<<<<<يتبع في الحلقه القادمه
شاركي في النقاش
سجلي الدخول لإضافة تعليق.
التعليقات
11مواضيع مشابهة
تابعي تجارب أخرى من هذا القسم.