تريدين علاقه رسميه مع اهل زوجك وتبادل احترام بينكم تفضلي معي .. اختكم كشكوشه








السلام عليكم

بسم الله والصلاة والسلام على رسول الله.

انا ماابي اعطيك الأسباب لأنها خلاص معروفه لكن انا بعطيك مفتاح نجاح حياتك الزوجيه والشاطره الشاطره اللي تدبر امورها وتثمن كلامها وتتصرف بحكمه.. انا من فضل الله مااقول اني انسانه خبيره لكن اطلاعي على مشاكل الناس وسمعت عايشت مواقف كثيره سواء في حياة اخواتي او اخواتي في هالمنتدى او من اقاربنا ...

واتمنى اذا انتي بنت تكتبين هالكلام في ورقه وتتذكرينها مستقبلا واذا متزوجه من الآن طبقيها ..

يااخواتي كلكم.. اقروا واستوعبوا وترى كلامي هذا كله اللي بكتبه هو مجهودي الشخصي..... اسمعوا.::

الحياه الزوجيه لابد تواجهين ظروف متنوعه من مشاكل الى ضغوط اسريه الى مسؤليات الى هموم الى مشاكل ووو الخ..

سواء هذه الضغوط في بيتك او من زوجك او من اهل زوجك .. اوحتى من اهلك..

نبدأ في بيتك..

انتي في بيتك ملكه كل شئ تحت تصرفك كل الأمور تمشي على حسب تدبيرك وعلى ارادتك .. الملكه ممكن تكون حكيمه وممكن تكون متمرده ..

اذا كانت حكيمه الكل يحبها وتحت شورها وطاعتها وكلمتها مسموعه والكل يبحث عن رضاها ولايمكن يشارك عرشها احد..

اذا كانت متمرده بيضيع عرشها وتنهار بنايتها فوق راسها ولا سمع ولا طاعه لها..

الزوجه في بيتها كذا فأختار انتي وحده منهم .

زوجك ياحبيبتي ... مثل الطفل لابد من رعايه واهتمام ودلع تشاركينه احزانه افراحه مشاكله .. وانتبهي تشتكين من اهله او من خواته لأن هم اهله في النهايه على قول المثل ( خشمك منك ولو هو اعوج) .. ايش ماصار منهم من مشاكل كلام لايوصل لزوجك .. ودائما وابدا ارفعي اهلك فوق قدامه ولاتقولين اسرار اهلك عنده مهما كان زوجك طيب انتبهي.. ودايما خلي الأبتسامه والرضا في وجهك .. مهما كنتي شايله هموم الدينا على راسك...

وامور ثانيه احب اذكرها.. اذا مزح معاك بكلام بذئ يعني مثلا الله يكرمك قال ( ياحماره) .. ابدا لاتسمحين له لأنه اذا بدأت بمزحه بكره يسبك من جد ويقول ( انتي حمار ه ماتفهمين).. ابدا لاتجرأينه عليك ولو بالمزح.. اذا مزح معاك قولي معليش انا مااحب هالمزح .. حتى الضرب بالمزح لاتجرأينه لأنه مع الوقت ممكن تطور المسأله ويصير يضربك من جد .. انتبهي من هذي الأمور اخمدي نارها من وقتها يالغاليه ولاتعطينه على نفسك فرصه...

شئ ثاني.. الغيره الزايده من اهله او يناظر في الحريم في السوق مثلا.. الغيره هذي لابد منها لكن لاتبان قدامه .. يعني مثلا تقولين ليش طولت عند اهلك ؟؟ ليه اختك كل شوي تتصل..؟؟ .. ومن هالكلام.. او في السوق ليه تناظر..؟ .. .. خلي حياتك تمشي بسياسه << صدقيني هذي من الأسباب الرئيسيه لدمار الحياه الزوجيه فأنتبهي.



اهل زوجك يالغاليه... عامليهم برسميه واذكر وحده نزلت موضوع قالت كيف نعامل اهل الزوج برسميه .. بعضهم ردوا عليها لاتزورينهم احقريهم,,,

وانا اقول هذي مو رسميه هذي قلة ادب.. الرسميه مو تقطعينهم وتحقرينهم وتناظرين لهم بأستحقار لااااااااااااا والف لااااااااااااااااااااااااا .. لأنه هذولا مهما كانوا سيئين فلابد من احترام وتقدير لهم.. طيب انتي تقولين كيف نعالمهم برسميه..؟؟

انا اقولك المعالمه الرسميه.. انك تقدريهم وتحترميهم وتحشميهم وتقومي بواجبهم .. ولكن!!!!!!!!!!!!!!!!!!!!!

ولكن انتبهي للي بذكره لك اللحين..

1/ لاتقولين اسرارك مع زوجك لهم ولاتقولين عن خرجاتك وطلعاتك وفين ووين تجين .. .. لاتدخلينهم في حياتك بأي حال من الأحوال مهما كبرت المشاكل بينك وبين زوجك...

2/ لاتطيحين الميانه بينك وبينهم بسوالف الزايده ولاتدخلين في مشاكلهم الأسريه ابدا ابدا خليك دايما كلامك في امور عاديه يعني مثلا( عن الخدم عن المدارس عن السياسه) خليها امور سطحيه .. مشاكلهم حتى لو طلبوا رأيك .. لاتعطينهم رأيك قولي مثلا( الله يعين الله يفرجها الله ييسرها) وبس.. ولاكلمه زايده ..

3/ غلطوا عليك بكلام ولا يقصدونك بالكلام ولا شئ.. لاتردين عليهم الزمي الصمت وبأبتسامه هادئه جدا.. وببرود اعصاب .. لأنك لو رديتي عليهم يمسكون كلامك بعدين .. ( وبكره يقولون ايوه فلانه قالت فلانه تكلمت علينا اللي هي انتي) .. الكلمه تنمسك عليك فأنتبهي لا تفتحين هالباب عليك( قالت .. وقلنا..).. فهمتي؟!!؟ وهذي للأسف كثير من النساء ماتضبط اعصابها رغم انها الخاسره الوحيده في النهايه..

4/ اسمعيهم اكثر من تعطينهم كلام ترى قلة الكلام راحه لك ..



بنسبه لأهلك..

لاتدخلينهم في حياتك وحتى اسرارك الخاصه المفروض ماتطلع لهم مهما امك او اختك اعطوك نصايح انتي اوزني نصايحهم اول شئ بالعقل ان تقبلتيها وشفتيها لصالحك سويها ان شفتيها تضر حياتك ابتعدي عنها لأنه مو من الضروري تكون نصايحهم في محلها .. ندري ان الأهل مايبون لك الا الخير لكن انتبهي تسوين نصايحهم الا بعد ماتفكري فيها لأنك انتي ادري بحياتك.


اسأل الله العظيم ان يجعل ماكتبته فئده لكم ومن اخت محبه لكم وان يوفقكم ويسعدكم في حياتكم وان يجعلها سعاده في سعاده .. يارب ياكريم.. ولاتنسوني من دعواتكم يالغاليات..

84 تعليق 12,046 مشاهدة

شاركي في النقاش

سجلي الدخول لإضافة تعليق.

التعليقات

79
  1. @kshkoshh_hanm

    صاحبة الموضوع
    من تريد النقاش معي المجال لها مفتوح .. وفضلا اذا اردتي نقل الموضوع .. اكتبي منقول .. وشكرا
  2. آآآآآآآآآآآآآآآآآآه والف آآآآآآآآآآآآآآآآآآه كل هالكلام نصحوني فيه ولكن غرتني طيبه اهل زوجي ومادريت انو الأيام مخبيتلي اشياء

    والحين متحسفه ولكن ايش الفايده

    بس انا طيبه زيااااااااااااااااده عن اللزوم وعلى نياتي

    كنت كل شي اعلمهم ايش اكلنا فين رحنا ايش اشترينا

    اقلهم مشاكلي مع زوجي


    الحمد لله مو مشاكل يمكن سوء تفاهم

    وكنت بالعكس مع اهلي مااقلهم ولاشي عن مشاكلي اخاف يقلقو عليا ويحسبوني مو مرتاحه في حياتي.


    وتوني وبعد سنه اصحى على نفسي واصير رسميه.
  3. @kshkoshh_hanm

    صاحبة الموضوع
    زوجه الغالــي
    آآآآآآآآآآآآآآآآآآه والف آآآآآآآآآآآآآآآآآآه كل هالكلام نصحوني فيه ولكن غرتني طيبه اهل زوجي ومادريت انو الأيام مخبيتلي اشياء والحين متحسفه ولكن ايش الفايده بس انا طيبه زيااااااااااااااااده عن اللزوم وعلى نياتي كنت كل شي اعلمهم ايش اكل…
    اختي انثى مشكوره على مرورك...


    اخت زوجة الغالي...

    اهم شئ انك اخذتيها درس واذا فتحوا معك مره ثانيه المواضيع الخاصه اللي تصير مع زوجك لاتعطيهم مجال.. وخرجاتك ودخلاتك لاتقوليها لهم...

    انتي امشي باللي كتبته لك وان شاءالله راح تعيشين حياتك مرتاحه شاكره لك مرورك.
  4. @am_krshh


    لكن الا توافقيني الرأي

    ان اهل الزوج مش كلهم بنفس الطبع ومش كلهم يستحقون هالمعامله ؟

    انا اشوف ان اللي ذكرتيه اعلاه ممكن يمشي ويتنفذ عند ناس معينيين لهم اطباع معينه:)

    فالذي ذكر تطبقه الزوجه تفادي للمشاكل وسوء اللبس اللي يحصل

    لكن فيه اهل زوجك ماتستحق هالمعامله بل بالعكس يكونون احن وارحم والطف من اهل الزوجه نفسهم :heart:


    لكن الله يهديهم بعض الزوجات تدخل الزواج وهي حاطه في بالها انها ترفع نفسها عن اهل زوجها وبالتدريج زوجها

    يتطبع طبعها وتبعده تدريجيا عن اهله وهذا في النهايه ينقلب عليها ويكرهونها وبدل مايحترمونها

    يشيلون عليها وينقدون فيها:icon19:

    فالافضل ان الزوجه تعرف بالاول وش الاسلوب الازين لمعامله اهل لزوج الللي يناسبهم ويستاهلونه :icon31:

تابعي تجارب أخرى من هذا القسم.