قعدة الستات فى العشر الاوائل غيرر(عرايس بجد)

الملكه الرومانسيه
طبعا انتى جيتى على الجرح
دراسات عليا
بقالى سنه فى الموضوع ده
وبصراحه مش عايزه اعقدك الموضوع مش سهل اطلاقا وكلمه اماجستير جميله بس علشان توصليلها لازززززم تعب يعنى
اولا اسالى نفسك انتى عاوزه الموضوع ليه
هل هيفيدك فى دينك ودنيتك
ظروفك هتسمح لمواعيد المحاضرات المختلفه واعداد الابحاث والذى منه
امكانياتك الماديه هتسمح انك تصرفى على الدراسه
هل ينفع تاخدى تفرغ من شغلك والمرتب شغال
بالنسبه ليا ياريت حد قالى على الحاجات دى كنت استنيت شويه لما ولادى يكبروا لانهم اتبهدلو والمحاضرات المفروض اسافر القاهره كل اسبوعين طول فتره الصيف فكان الموضوع صعب عاشان مفيش مكان اسيب ولادى فيه كانت النتيجه انى قصرت فى الدراسه وفى البيت وطلعت بملاحق
والان انا واقفه فى نصف الطريق مش عارفه اكمل ولا لاء
1500 جنيه كل سنه دى المصاريف انا صعبان عليا التعب الى انا تعبته انه يروح ولو كملت لازم التزم بالمصاريف
انا صورتلك الموضوع بصوره ماءساويه لكن انتى الى طلبتى تعرفى لو حد عنده فكره عن الموضوع
وجايز تكون الكليه عندكم افضل من النظام عندنا وتكون مريحه بالنسبه للدراسه فيها
وربنا يوفقك وييسر لكى امرك

سجى وملكة مساء الخيرعليكم وحشينى بس كل مدخل على الموضوع يقلى كلمة المرور غير صحيحة
سجى احسن ديب فريزر بقاله 4 سنوات عندى كريازى انا اشتريت 5 درج مفيش ثلج وما شاء الله مفيش منة ولا شكوه
ملكة انا عندى صحبيتى وبنت عمى عملة دراسلت جنب البيت والشغل اعمل بحث وابلغك بالنتائج هروح اشوف جودى والمكرونة على النار وارحع ثانى

السلام عليكم ورحمة الله وبركاته
سجى انا عندى ديب فريزر الكترو ستار لكن عادى مش نو فروست
هو بيعمل طبقة تلج خفيفه جدا ومعاه قطعه بلاستيك
بتشيلى بيها التلج بسهوله وفى دقائق وبقى له 12 سنه
والحمد لله ما فيش شكوى منه
وانا عندى هنا ديب فريزر بس مش ادراج لو عندك مكان فى البيت
نصيحه بياخد كتير جدا ومش صعب انك تنظميه

وحشتووووونى موووت ويا رب تكونو قضيتو عيد جميل .. انا الحمدلله من اول يوم للعيد بالليل وانا فى السرير .. عندى انفلونزا ظيعة جدا.. هى كانت داخله علي قبل الوقفة ويوم الوقفة طبعا طول النهار فى المطبخ قدام النار وبعدين مسحت سلالم البيت والمدخل بالخرطوم والمساحات ورشيت الزرع فى الجنينه لان عندنا البيت نظامه زى الفيلا كده .. المهم تعبت قوى وهدومى اتبلت .. يا دوب طلعت خدت دوش وفطرت .. صحيت اول يوم العيد تعبانه ومصدعة وعلي بالليل بقى كنت خلاااااااص سخونية وكحة والم فظيع فى جسمي والحمد لله امبارح والنهارده نايمة وسط الادوية والحقن .. يا دوب فوقت شوية قلت اسلم عليكو .. اختكو خلااااااص بقت متشركة عالاخر هاهاهااه .

ملكة الرومانسية .. انا مبسوطه قوى بنشاطك ده وعاوزة اشجعك انك تكملي دراسات عليا .. اهو تستغلي وقتك فى حاجة مفيده وعلى فكرة جداول محاضرات الدراسات العليا بتبقى مريحة جدا يعنى مش كل يوم .. وانت لو نظمتى وقتك شوية هاتقدري ان شاء الله .. دى فرصة قبل ماتنشغلي بعد كده .. توكلي على الله وان شاء الله خير .