تعالى نظمى حياتك من الأول معانا فى قعدة الستات!!

السلام عليكم
انا والله العظيم ما قلت نفصل الموضوعين عشان الدين حاجه والدنيا حاجه
انا بقول ان فى ناس داخله عشان موضوع التنظيم ده وبس وبتزهق من الكلام فى اى حاجه تانيه وبتشتكى ومنعا للاحرااج قلت نخلى الموضوع مخصص لكده لو مدام وائل هتضيف جديد
ميصحش يا جماعه هههههه
دا انا متربيه على معنى الحلال والحرام ومحستش بالمعنى ده الا من كلامكم والله
ايمان
ونشيل الالقاب باه دا احنا بقينا اخوات
مبروك على الديب فريزر ربنا يبارك لك فيه
هو احسن من التوشيبا ؟؟؟اخر مرة اسال هههههه
وايه اليوميات دى هو باب النجار مخلع ولا ايه؟؟؟؟ ههههه
ربنا يهدى لك بودى ان شاء الله
بس موضوع التربيه ده بجد نفسى نصول ونجول فيه
رانيا
ازيك سلميلى على البنات واديهم الرابط ده من طنط مادو ههههه
ولبودى ويوسف ويمنى واهداء لكل الصغار هههههههhttp://www.babloo.com/


متزهقوش من رغى يا بنات
انا اخواتى مسافرين ومش غاويين كلام على النت خالص
وقاطعه علاقتى باصحابى كلهم من يوم ما اتجوزت
ومفيش حد من اهلى كلهم من سنى عشان اتكلم معاه
يعنى انتو بتعوضونى عن كل دول ومش برغى غير معاكم والله

كل كلامكم جميل جدا وقصص تعتبر عبر وبستفيد منها جزاكم الله خير جميعا

روشانا
المقاله مفيده جداااااا جزاكى الله خير
بس عندى استفسار للى يعرف
احنا بنحط الفراخ واللحمه فى اكياس بلاستيك يعنى دة يعتبر غلط؟؟؟؟
والطماطم فى علب بلاستيك بتاعه الحلاوة مثلا
ولا قصدهم اننا منسخنهمش فى بلاستيك ؟؟؟؟
مين شاطر يوضح لى
بجد ده موضوع مهم جدااااا المعروف نفهمه كويس

عروس
حبيبتى جت مجت هو انضرب بالجزمه وخلاص متفرقش والله
على فكرة انا حفظت 16 ايه من البقرة هما ماشين صفحه صفحه انا حاسه لنه كتييير بس التشجيع حلو فى البيت برده

انا حاسه انى بدات الم الموضوع تانى شويه اصلى اجدع واحده اتوه فى الزحمه

بما انى وضعت نفسى مكان الواعظ انبارح واتكلمت عن حرمانيه تاخير الصلاه
النهارده كل ما اسمع الادان اجرى اتوضا علطول
من غير تاخير دقيقه عشان منحرجش من نفسى
اصل الشيطان دة مش بيسيب حد مهما اتعودنا

ملكه
من اول ما دخلتى وعايزه اسجل اعجابى بوضوح شخصيتك بجد
ما شاء الله عليكى ربنا يديم عليكى الاخلاص فى القول والعمل ويسهل عليكى وعلينا عبادته وذكرة وشكرة

منى وهمسه وهايا وميرو والجميع منورييييييييييين
يومياتى
اكلت فسيخ النهارده لاول مرة فى شقتى هههه
حسيت ان البيت بقلى بيت اسرة بجد والريحه يااااا سلاااام
سلام

ازيك يا منى اهلا بيكى معانا نورتينا
تعرفى انك من الشخصيات المؤثرة فيا جدا وبحبك فى الله
ربنا يرزقك بالفردوس الاعلى دون سابقة عذاب او منا قشة حساب
انا اتعلمت الدعوة دى منك وبقيت بدعى بيها على طول
انتى عارفة رباعية حسين الجاسمى دى بحبها قوى وهى النغمة بتاعة موبايلى بحس بصدق فيها فى كل كلمة

مادو يا وحشه تاكلى فسيخ من غيرى الريحه واصله لعندى
ربنا يثبتك يا مادو على الطاعه انتى وزوجك وفعلا احفظى معاه لان حا تشجعو بعض ويكون فى حماس
شوفى بقى يا مادو انتى حطيتى أول خطوه لعلاج السرحان فى الصلاه اننا اول ما نسمع الاذان على طول نصلى
فعلا بيكون للصلاه طعم مختلف وتحسى بعدها بارتياح انك انهيتى مهمه واركى
وكمان نقطه تانيه لعلاج السرحان برده مادو بتعملها انك تصلى بالصور ال حفظتيها جديد حا يكون فى تركيز
وكلنا نتشجع نحفظ لك يوم سطر ويبقى حققنا حاجتين حفظنا وعالجنا السرحان فى الصلاه
يالا يا بنات ده الواجب بتاعنا وال مش حا تسمع الكلام ماما بقى تتصرف معاها
وافتن عليها عند ماما زوزو
مادو انا برمى علب الحلاوه بخاف استخدمها لكن فعلا الاكياس ايه حلها
وكمان بغطى الاطباق فى التلاجه بالبلاستيك الشفاف أضم صوتى لمادو كده صح ولا غلط
عطر فين وصفات الجمال مش تتابعينا ماشين صح ولا كسلانين وبرده نشتكى منهم لماما زوزو
لان ماما زوزو ما شاء الله نموذج يقتدى بيه فى كل شىء ربنا يرزقها الجنه يارب
كل البنات منورين

السلام عليكم ورحمة الله وبركاته
مدام وائل كالمعتاد بتتحفينا بأفكارك وكلامك المرتب والجميل ودايما بتجمعينا مع بعض بمواضعك الجميله اللى بتمس كل وحده فينا جزاكى الله كل الخير و ربنا يجعله فى ميزان حسناتك ويا رب دايما متجمعين فى الخير وعلى الخير ومبروك الفريزر وياريت تقولينا ملاحظاتك عليه علشان نتشجع
منى مبسوطه اوى انك بقيتى معانا هنا بجد ها نستفيد منك كتير ووجودك معانا هنا بيقوينا كتير واوعى تحرمينا من مشكاركتك ونصايحك الجميله منى يا بنات اخت بجد رائعه وكتير يعرفو ده ويمكن انا مش شاطره اوى فى الكلام بس من قلبى بحبك فى الله يا منى
ملكه بتعجبنى اوى صراحتك خصوصا مع نفسك وده بيبين اد ايه انتى انساننه جميله بس محتاجه دفعه صغننه بجد يا سها اوعى تقسى على نفسك وتحرميها من لذة التقرب الى الله اللى كلنا بنسعى ليها واكيد الصحبه الحلوه هيا اللى ها تشجعك على كده وتقويكى خلي عندك امل دايما وثقه فى الله وربنا يكرمنا اجمعين
يمكن انا يا بنات مش بقدر اشارك معاكم كتير بس موضوع الوقت ده مشكله كبيره والسؤال اللى بيفرض نفسه دايما ازااااااااااااى ازاى اقدر انظم وقتى ويبقى يومى شامل على كل حاجه ترضينى و لما اجى احط راسى على المخده وارجع شريط الاحداث اليومى ابقى راضيه بنفسى فمثلا بالنسبه ليا وقتى بحس انه بعدى هوا وبحاول انظمه ما بين شغلى وبيتى والعيال والمذاكره ليهم ومتابعتهم والذى منه بس يا بنات الواحد فعلا بيحس انه مقصر فى عبادة ربنا وكتير بسأل اذا كان الملائكه اللى طول وقتها بتعبد ربنا يوم القيامه تقول فيما معناه ( سبحانك اللهم ما وفيناك حقك) امال احنا نعمل ايه اللى مقصرين فى طاعة ربنا ؟؟؟؟؟ ده بالاضافه للذنوب ؟؟؟؟
المهم ان تنظيمى لوقتى ده بينجح كام يوم وبعدين يرجع يتلخبط وارجع تانى ومش بيأس بس دايما بحس انى فى صراع مع الوقت ومع نفسى بس انا حابه اتكلم فى جزئيه صغيره من يومياتى يمكن افيد او حد يفيدنى اكتر ويشاركنى
يومى بيبداء بالفجر وصلاة الفجر والاذكار اللى الحمد لله مواظبه عليهاالفجر وبعد صلاة العشا قبل ما انام بالنسبه لقراءة القران بتكون قبل ما انام برضه وده اللى مضايقنى يعنى مقتصر على بعض السور زى الواقعه وتبارك واواخر سورة الحشر واخر سورة البقره دول دايما مواظبه عليهم وطبعا يوم الجمعه الصبح قراءة سورة الكهف والدخان ويس. عارفين سا عات بحس ان الواحد المفروض مش يقول هو بيعمل ايه لان الحاجه دى بينه وبين ربنا بس انا بقولها كاتائنيب للضمير لانى حاسه انى مقصره بس بجد مش قادره ربنا عالم ان ده للى ممكن اقدر اعمله فى ظل مشغولياتى اليوميه انا عارفه ان دى مش حجه وان فى ناس بتعمل اكتر من كده وبرضه بتبقى مشغوله بس انا بقولكم بصراحه حاولت فى الاجازه اواظب واحفظ قران بس لمده و رجعت تانى وانشغلت وبقى دلوقتى اكبرهمى ولادى الحمد لله بيصلو الفرض بفرضه حاضر وابنى بعلمه الصلاه فى المسجد وباحاول ازرع فيه حب الصلاه فى وقتها فى المسجد تعبت معاه فى الموضوع ده الاول بس الحمد لله النتيجه كانت حلوه اوى
بنات انا بحكيلكم الحاجات دى علشان الاستفاده يمكن بعضكم ولادهم لسه فى سن صغيره او اللى ربنا يكرمها فى المستقبل بس صدقونى تعليم الصلاه لولادنا زى ما قال رسولنا الكريم بتفرق جامد وبتخلى العيل يواظب عليها ويتعود وتبقى حاجه فى دمه وها تريحكم بعد كده واكيد احنا ها نسأل عنها يوم القيامه
انا النهارده كترت الكلام بس معليش فرصه النهارده علشان مش بقدر اواظب معاكم دايما بسلم عليكم كلكم وبحبكم فى الله