عطر الشموع
كلامك فيه جزء كبير من الحقيقة
لكن مش هو الحقيقة كلها
معظم الرجالة دلوقت (إلا من رحم ربي) متعرفش يعني إيه مسئولية
لأنه متعودش يشيل المسئولية
يعني ببساطة ما اترباش على الرجولة أساسا
لأن أ ب الرجولة هي المسئولية
لكن مش معنى اني أدلع الزوج اني أشيل مسئولياته بداله
لكن في نفس الوقت ده ميمنعش اني أقوم بيها بداله أحيانا
فيه معنى انا تقريبا مش عارفة أوصله
فيه شعرة فاصلة بين رأيي ورأيك
يعني المثالين اللي ذكرتيهم
(التمسك بحقك من اول ربع ساعه )
يعني من اول ليله الدخله و عامليه عادي يعني تعبانه يبقى تعبانه
ساعدني في كذا بليز عشان مش هلحق اخلص اللي ورايا
ياريت بقى تتعود يا حبيبي تعلق هدومك عشان انا ورايا تجهيز الغدا
ياريت لو هتتاخر تتصل بيا تقوللي عشان انام
بص يا حبيبي انا محتاجه يوم لنفسي عشان اخرج اروح للكوافير و اقابل اصحابي و افرفش شويه
الخ.................
ولو من اول يوم عودتيه على كدا هيفهم ان فعلا الزواج ده شركه ولازم كلنا نتعاون عشان نكبرها
انما للاسف احنا نتجوز من هنا ....
و انا هجيبلك المياه يا حبيبي متقومش
انا هاكلك في بقك و اوعى تتعب نفسك يا روحي و تشيل الطبق
انا يا عيوني هخلص كل المشاوير بكره و هقوم من الفجر عشان اجهزلك الغدا قبل ما انزل
الو يا حياتي اوعى تتعب نفسك و تجيب حاجه معاك انا هنزل كارفور اجيب كله ياروحي
يا حياتي عايز تسهر اوك نسهر مش مشكله انام هروح الشغل صاحيه المهم اعد معاك يا حياتي
انا باعملهم الاتنين
ده مش تناقض ولا شيزوفرينيا
انما انا لو تعبانة هاقوله يساعدني وهو هيقدر تعبي ويساعدني
لو قاعدين في لحظة روقان ومحدش مننا تعبان مفيش مانع اني أجيبله المية لحد عنده
المشاوير وطلبات البيت هو اللي بيعملها
لكن مفيش مانع اني أعملها لوحدي من باب الجدعنة لو هو مشغول
باروح أجيب طلبات البيت وادفع فاتورة التليفون والكلام ده كله
باقوله انا عايزة أخرج اشوف اصحابي كل فترة عادي جدا
لكن في نفس الوقت بابقى تحت أمره في أيام تانية وباستناه لما يتأخر بره وكل حاجة
زي ما قلت امبارح
إن أنت أكرمت الكريم ملكته
وإن أنت أكرمت اللئيم تمردا
الزوج لو إنسان كريم الدلع هيملك قلبه ويخليه يخجل من نفسه فيدلع زوجته زيادة
الكلام اللي باقوله ده مش من الخيال
انما دي أمثلة واقعية بتحصل في حياتي وحياة ناس غيري باشوفها قدام عينيا
وبرغم كده
مش معنى اللي باقوله ده ان احنا ملايكة
برضه جوزي أحيانا بييجي على حقي وبيتدلع عليا
وأحيانا انا باظلمه معايا وباحمله مصاريف زيادة
لكن بشكل عام الحياة ماشية بيننا كويسة
لأننا بنصارح بعض بكل حاجة
ولو حد عمل حاجة زعلت التاني بيقوله على طول
وهو ده سر الحياة الناجحة
اما بقى الحاجة اللي مش فاهماها
انك كنتي زيي في أول الجواز لأنك فضلتي 7 شهور مأجلة الحمل؟!
زيي في إيه بالظبط؟ وإيه علاقة كل اللي قلناه ده بالحمل؟
تعالى نظمى حياتك من الأول معانا فى قعدة الستات!!
متابعة النقاش، صفحة 62