تكملة سعود و دلاخته

سعود: اوكي فامان الله . مشاعل: باي ... لم تعد تلك الليله في نظر مشاعل كسائر الليالي انتشر في مشاعرها شعور البهجه والفرحة فأصبح سعود الشيء الوحيد الذي تفكر فيه طوال ليلها فقد كان سعود ذلك الشاب الذي يكسر الخاطر والذي تكتسيه الطيبه و الحنيه . أعجبت بشفافية اخلاقه وقلبه الرقيق الابيض شخصيته المسالمه عيشته البسيطة القناعه ... و أشياء كثيرة تكتشقها بسعود يوما عن يوم .....
اصبحت مشاعل تكلمه بشكل يومي حتى انها لا تطيق فراقه ليوم واحد واليوم الذي يأخذ أبوه جواله كعقاب تقعد تصيح مشاعل
( احس ان مشاعل بمستودعهم كراتين فاين ... يلعن أم الصياحاللي تعرفه) واستمرت علاقتهم ترما كاملا وهم على حالتهم تلك حتى تجرأت مشاعل بقولها لسعود ... مشاعل: حبيبي سعود ابي اقولك شي.
سعود: تدللي يا عيوني (أخس طلع أسلوب الدلع ما أمدآ) مشاعل: تسلم عيونك ياروحي ... ودي أشوفك .
سعود: تشوفيني؟؟؟؟؟ مشاعل: اييييييه . سعود: أنا فاهم بس أخاف . مشاعل: العن بو داراك انا اللي مفروض اخاف. سعود: يا دوبه ان اخاف من ابوي ولا امي لو يدرون يحطوني بدار الايتام هم يدورون مني الزلة. مشاعل: ما عليك كيف يدرون. سعود: ما ادري بس صعبه .. طيب وين تبين تشوفيني. مشاعل: شرايك بالمملكه او الفيصليه؟ سعود: لا مابي مكان عام أخاف أحد يشوفني ويعرفني. مشاعل: طيب اختار إنت . سعود: شرايك أجي مدرستك بعد الدوام؟ مشاعل: صاحي انت. سعود: لا منب مسوي شي بس بوقف وانتي ناظريني وروحي
مشاعل: اوكي إنت خلك واقف عند زاوية المدرسه وانا بمر جمبك بس ما راح تعرفني . سعود: طيب خلاص بكره بتلقيني أنا والسواق بكامري بوكس. مشاعل: الله يفشلك انت وكامريتكم . سعود : حرام عليك والله سيارتنا قويه ابوي قال دورتلكم احسن سياره يابانيه( مشكلة الابهات اذا مالقوا اللي يوقف بوجههم لما ينصبون) مشاعل: سلملي على ابوك خلاص اشوفك بكره باي. جا بكره وحان وقت خروج الطالبات وسعود مرتز بالزاويه طاق القلابي ومرسم كوبرا بشماغ بدون عقال... طلعوا وفود البنات كلهم اسود باسود وياكثرهم اللي مرو جمبه يبي يشك بوحده فيهم ما امداه كلهم يشبهون بعض شوي ويدق جواله. مشاعل: يا ملححححححححححححححححك تهيل يا سعود. سعود: وينك انتي؟؟ مشاعل: من جدك إنت بقولك انا ويني . سعود: والله ما اناظرك بس قوليلي وينك. مشاعل: أجل وشوله تبي تعرف ويني دامك ما تبي تناظرني ...ياغبااائك سعود: يالله عاد. مشاعل: خلاص انا رحت سعود: تكذبين مشاعل : أي والله سعود: طيب يالله بروح البيت باي. مشاعل: باي.
كبر الموضوع وصارت المقابلات بشكل متكرر لين شكت الهيئه بأمر سعود ومسكوه وجدعوه بالحمس.
الهيئه: أنت يا هذا ماذا دهاك تجي تلفلف فيذا(يسمعنا بالفصحىأخونا في الله ) سعود: وربي ما دهاني شي بس احتري اختي تطلع. الهيئه: لقد أنك كل يوم توقف هنا ولايركب معك أحد فلماذا يا هذا؟ سعود: شوف انا لقد انني وقفت كل يوم بس اختي تدق علي آخر شي تقول أنها جايه مع سواقنا الثاني عرفت كيف؟( ياناسالولد يعرف يصررررف) الهيئه: تستهبل انت وراسك؟؟ سعود حس انه بمأزق وانه سوف يتصفق شر تصفيقه أراد أن يعترف بكل شيء وحينما هم بالحديث و إذا بفتاة ذات قوام ممشوق وايدي بيضاء كالثلج ذات صوت رقيق دافئ نفس الصوت اللي يغرذ على مسمع سعود كل ليله تقوم ممسكه يده. الفتاة: سعود ليش تأخرت علي؟ سعود: انتي مين الفتاة: أنا اختك وجع. سعود: طيب...اتحداك وش اسمك(يقاله بيحجرها) الفتاة: تعال اقولك بإذنك وشسمي؟قرب أذنه سعود همست الفتاة أنا مشاعل أصصصصصصص يا ويلك تقول شي قل ذي اختي وتعال معي سعود فق أم أم خشته مهوب مصدق آخر شي يتوقعه إن ذي تطلع مشاعل تفاجأ وتكاسلت جميع أطرافه مفجوع وسلهم عيونه في طول مشاعل متخيلا أياها وهي تكلمه على الموبايل والصمت قد ملأ شفاته مذهولا... مرت لحظات فبلع ريقه ونطق. سعود: إي صح ذي أختي وش بلا أمك ما تقول عندك اخت هنا ولا شي؟؟ الهيئه: هداك الله يا فتى رح مع اختك الله يصلحك. سعود: طيب يالله"سي يو".
الهيئه:"سي يو" سعود: ذا بابكم كيف يفتح؟ الهيئه: خربان طب مع الدريشه. سعود: طيب....طب على خشمه وقام ينفض التراب من مناخيره وفز وهو يناظر بإخته قصدي مشاعل.
سعود: الحين انتي مشاعل اللي أكلمها. مشاعل: لا امها سعود: لا والله جد بالله كلميني أتأكد. مشاعل: من زمان محد صفقك على جيهتك اخلص وين سيارتكم الهيئه تناظر تحترينا نركب. سعود: بتركبين معي؟
مشاعل : خلاص تبي تاخذ القيلوله عند الهيئه ترا موب فاضين لامك إخلص. سعود: لا كل شي ولا القيلوله(صفقوني لو يعرفوش هي القيلوله) مشاعل: اركب وأنا بركب ورا وقل لسواقكم يوديني لسيارتنا
سعود: طيب إن قال من ذي. مشاعل: انت شكلك ودك بالقيلوله؟!!! سعود: لاخلاص ...فتح باب السيارة سعود يريد أن يتمطى السيارة.... فخرالدين: إيس في سعود. سعود: هاه هذي لكن قسمن بالله عندهم شغاله شقققققققق. فخرالدين: سعود انت جنجال كبيرة. سعود: قسمن بالله فخرالدين لاخليك تكلمها بس لا تعلم ابوي . مشاعل: قله يوقفني هنا. سعود: نخورتي... يؤ قصدي فخورتي ( مسوي يدلع) وقف هنا يابعد جبدي .
مشاعل: بكلمك بالليل اليوم وان قفلت جوالك بحوسك. رجع سعود بيتهم وهو مو مصدق بهاللي صار كل يوم وده تمسكه الهيئة عشان تجي فارسة أحلامه تنقذه (عكس أم ابو الآيه) طول اليوم وهو سرحان الين دقت عليه مشاعل..........
--------------------------------------------------------------------------------

مشاعل: هلا بالغالي. سعود: هلا والله مشاعل كيفك؟ مشاعل: أنا بخير وانت؟ سعود: أنا والله من يوم تركتك لين الحين وانا افكر فيك.
مشاعل : والله وش الطاري؟ سعود: موب مصدق إنك انتي اليوم اللي مسكتي يدي...... كل اللي اقدر اقوله يلعن يومك على ذا الحلا.
مشاعل: والله تبي الصدق يا سعود انا كنت خايفه اول شي بس حسيت انك من جد تبيني اساعدك ما تهون علي وانت اركب جمس الهيئه.....
سعود: يا بعد عمري يا مشاعل ، انا من جد حسيت معك اني اعيش وقتي صرت اعرف اشياء كثيره بالحياة اكثر شي اخافه ان يجي يوم ونفترق واتندم كتيييييير...
اقتربت ايام الاختبارات النهائيه وقررت مشاعل ان تترك سعود لحين انتهاء الاختبارات طبعا ذا القرار موب بلحظه ولا بنص ساعه مشاعل قعدت كالعاده تصيح وتناشق ..... ومن جهة اخرى ابو سعود مواعد سعود لا خلصت الاختبارات يخلي جواله عمومي....
المهم قعد اخونا في الله سعود يكرف الليل والنهار أكل الكتب من كثر المذاكرة حتى من كثر المذاكره جاه امساك ....لا تسألوني ليه والله علمي علمكم المهم انتهت الاختبارات دخل سعود الحمام(اعزكم الله) يتروش ما تروش من اول الاختبارات الله يقرف امه حتى المغص على حطت يديك المهم يوم طلع من الحمام
(اعزكم الله) وعلى طلعته دقت مشاعل . مشاعل: سعوووووووووووووووود سعود: حيااااااااااااااااااااااااتي مشاااااااااعل يلعن ابو شيطانك وحشتيييييييييييييني . مشاعل: وانا اكثر يا روح روح روح روح روحييييييييي والله من جد فقدتك ياخي. سعود: طيب اتحداك اشتقتيلي كثير ولا لأ؟ مشاعل: والله يا سعود كثــــــــــــــــــــــير حيييييل يالله استحملت ...انتظر الاختبارات تخلص ساعه بساعه. سعود: هاه...... كيف اختباراتك عساك حليتي زين. مشاعل: والله انواع الدجه بيني وبينك ماخذ كل عقلي انت وخشمك. سعود: وانا بيني وبينك ما جيت خبرك كله اذاكر. مشاعل: وتقولها بوجهي ياولد اللي منب قايله . سعود: انا انسان تحتم علي مبادئي بالصراحه المطلقه مهما كانت مؤلمه .
مشاعل: ايه صدقتك. سعود: اتحداك تقولين شي واحد بس كذبت فيه عليك. مشاعل: ما ادري بس لازم فيه شي تكذب علي فيه.......المهم ابو سعود فك جوال سعود وخلاه عمومي كما وعده وجت أول فاتورة وصفقت الالفين ورجعه عايلي وبعد ما نشب لابوه و حلوف ايمان انه ما يعدي الخمسمية ريال للفاتوره الواحده رجعه مرتن ثانيه وطلعت الشهاده وسعود جاب نسبه مهيب شينه "93" خلته يدخل كلية الهندسه ورفع راس امه وابوه ومشاعل. (مشاعل قاطه مع ابو وام سعود) ويشتري ابو سعود لسعود سيارة كورولا .... واستمرت من جهة اخرى علاقته بمشاعل زود لين قضت العطله وبدأ اول يوم كليه والمكموخ سعود يحسبها مدرسة جاب سندويشه معه والسن توب بالشنطه لين تهزأ كم مره وصار رجال.......
مشاعل: سعود ابي اقولك شي بس لا تزعل؟؟؟؟؟ سعود: قولي يا مشاعل وش عندك.... مشاعل: بس اوعدني ما تزعل. سعود: وش صاير. مشاعل: أنا انخطبت من ولد خالتي.... سعود: قولي والله!!! مشاعل: ابمزح معك يعني يا سعود؟؟ أطبقت شفاه سعود وهو يحقن القهر والالم في قلبه ويكتم عبرته.... ودمعته تنتظر العين ترمش لكي تنزل... تغيرت ملامح وجه سعود... فكان هذا الشي الذي لم يحسب له حساب حان الوقت لكي يؤمن بأن لكل شي بدايه ونهايه فلا شيء يدوووم.. كم مسكين انت ياسعود مشاعل لم تكن الشي الذي يعشقه بل كانت الانسانه التي دلته على الطريق الصحيح في حياته واوضحت له اشياء لا يفقهها كان يحبها بمعنى الحب والتقدير
كانت مشاعل تحيط سعود بالحنان والدفئ وكانت تتفنن بامتصاص حزنه كانت بمثابة الام لسعود ... حان لسعود أن يلوح بكفيه ليودع ايام السعادة... مرت ذكريات حبه كلها بلحظات.... قاطعته مشاعل باكيه بدموع حاره وبشعور يلتهب .... مشاعل: سعود ساعدني انا مابيه بس شسوي امي وابوي ما اقدر احرجهم مع خالي بس صدقني ماراح اتزوجه لو ايش ... سعود: ما تدرين يمكن بيسعدك أكثر مني
--------------------------------------------------------------------------------

مشاعل: سعود لا تقول كذا انا احبك اكثر منه والله العظيم ومابي اتزوجه اصلا لو شيسون اهلي مابيه ابيك انت وبس.
سعود: لا الله يخليك مشاعل اذا كنتي تحبيني وافقي. مشاعل: سعود انا محتاجتلك ابيك تساعدني لا تصير معهم ضدي . سعود: مشاعل حاولي تفهميني انا معك طريقنا مسدود آخر شي كل واحد فينا بضيع .
مشاعل: انا ابيك سعود ما اقدر اتصور اعيش بدونك وانا اللي اذا ما كلمتك يوم احس اني بموت....
سعود: تكفين مشاعل علشاني وصدقيني بفرحك كثييير ........يقول سعود تلك الكلمات وهو يحس بعكسها تكاد تكون كطعنا تمزق قلبه أشلاء احس انه فاق من حلم .... حلم جميل نهايته مبكيه....
مشاعل: أكـــــــرهك ..... اقفلت مشاعل السماعه بوجه سعود ومازال سعود يحتقن تلك الآلام وشفتاه ترتعشان وكل اطرافه ترتجف وفي لحظات استجمع ما تبقى من قواه واتصل بمشاعل ولم ترد ورجع اتصل مرة اخرى واخرى إلى ان ردت وصوتها المبحوح الحزين الغارق بالبكاء. مشاعل: نعم؟ سعود: بقولك شي.
مشاعل: وشتبي؟ سعود: مشاعل بجي اخطبك من اهلك شرايك؟ مشاعل: نعم؟؟؟؟؟؟ سعود: شوفي انا لسه ما قلت لامي وداري بتقول لا بس بحاول معها يمكن توافق. مشاعل: سعود إنت من جدك؟
سعود: إي مشاعل انا من جدي انا مو مستعد أعيش طول عمري اتعذب..... مشاعل: طيب.
سعود: حاولي تماطلين بالخطبه لين اشوفلي حل اوكي؟ مشاعل: بس سعود بليز بسرعه الله يخليك !
سعود: اوكي من عيوني بس انتي ساعديني بعد ما اقدر اسوي كل شي لحالي. مشاعل: طيب خلاص يلا باي.
سعود: باي.... نهض سعود من سريره والظلام يتعثر في غرفته وأخذ يمشي ويرجع على نفس خطواته محاولا ان يجد طريقه ليفاتح أمه بالموضوع فلم يجد أي جدوى من تفكيره فأخذ قراره بأن يفاتحها بموضوع الزواج وانه قد عين الفتاة التي طالما ارادها وحلم بها وان يضعها امام الامر الواقع وذهب إلى فراشه ونام واصبح على اشعة الشمس المنبعثه من نافذة الغرفه نهض من فراشه متجها إلى المطبخ حيث امه كانت تجهز الفطور...
سعود: يمه. أم سعود: هلا وليدي. سعود: ابي اقولك شي... أم سعود: وش فيك؟ سعود: يمه ابي اتزوج..
أم سعود: هذي الساعه المباركه يا سعود ابشر من بكره ادور لك على اللي تفرحك. سعود: لا ... انا ابي وحده يمه؟ أم سعود: مين؟ سعود: يمه ابي اتزوج وحده تعرفت عليها بالتيلفون. أم سعود: منت صاحي يا سعود وش هالكلام.؟؟. سعود: يمه انا ابيها وما ابي غيرها واذا ما تزوجتها منب متزوج طول العمر.....
(هذول الناس اللي يحبون من جد )
أم سعود: سعود انت تفهم انه من التلفون؟ سعود: هذي البنت هي اللي خلتني رجال قدام عيونك محد غيرني إلا هي هي البنت اللي حبتني وكنتوا وقتها محد يطيقني ولاحد معطيني وجه يمه هي مو ملزومه تاخذ واحد زيي وغيري تقدملها احسن مني وما تبي إلا انا وانا مابي إلا هي يمه تكفين حسي فيني ولا تحرميني من البنت اللي احبها وصديقيني لو بتزوج غيرها ما راح احب زوجتي زي ما احبها يمه الله يرضى عليك ويعفيك اذا كنتي تدورين سعادتي ترا انا سعادتي مع هالبنت وصديقيني البنت بنت عايله وطبايعهم زي طبايعنا...... لم تعجب ام سعود بهذه الطريقه ولكن تيقنت ان سعود ان لم يتزوجها سوف يحدث شي لايحمد عقباه ..... وقررت انا تفكر في تروي وعلى مهل فستأذنت سعود بان يمهلها تفكر بالموضوع فوافق بان لا تطيل وشرح لها ظروف خطوبة مشاعل مر يومان وسعود ومشاعل قد سجنتهم قضبان الحيره ويحسبون الدقائق لكي تقرر ام سعود بعد ذلك وافقت ام سعود شرط ان تقابل مشاعل في احد الاماكن العامه لكي تبحث فيها مدى اخلاقها وسنعها... المهم
صارت المقابله واعجبت ام سعود بشخصية مشاعل ولكن تبقى الطريقه التي سوف يتزوج بها خطيرة وافقت ام سعود مبدئيا على الزواج وبقى الامر سريا بين الثلاثه ولكن هناك مشكله وهي............
مشاعل: سعود امك عسسسسسسسسسل. سعود: أي انا طالع عليها...... اسمعي انتي الحين كيف بتفكين خطبة ولد خالة ابوك مدري مين ذا....... مشاعل: ما عليك انا مدبره كل شي.. سعود: نشوف......
مشاعل فكرت بطريقه قد تكون جريئه للغايه وهي ان تتصل بابن خالها(محمد) وتوضح له بعض الامور ولم تفكر في كل العواقب مهما كانت . مشاعل: السلام عليكم. محمد: هلا وغلا وشخبارك مشاعل؟
مشاعل: بخير انت كيفك؟ محمد: أنا الحمدلله مشاعل: محمد أنا بقلك شي يخص الخطوبه بس بليز لا تفهم غلط. محمد: اوكي تفضلي. مشاعل: محمد انا صراحة تهمني سعادتك انا فكرت بموضوع الزواج وحسيت اني ما راح اسعدك وبتلقى اللي احسن مني انا ما حبيت اردك حبيت انها تجي منك خوفي تنحرج وصدقني بتبقى الاخ الصديق القريب واللي احتاجه بوقت ضيقتي وارجوك ما تزعل مني................ محمد: بس انا أحبــــك.....
سكتت مشاعل ولم تتفاجأ بقدر ما تريد ان تنهي الموضوع بأسرع ما يمكن ... مشاعل: محمد صدقني لو تزوجتني بتكره اليوم اللي حبيتني فيه محمد أنا ما احس بشي اتجاهك إلا انك أخ عزيز وبس.
محمد: إنتي تحبين واحد صح؟! مشاعل: محمد عن الكلام اللي ماله داعي ..... محمد: اوكي مشاعل شكرا على كل ذا انا بكره بقول للوالده تفك كل شي علشان ترتاحين وبرضوا انا تهمني راحتك باي.
مشاعل: باي...... جا من بكره ...... محمد: يمه انا مابي مشاعل أم محمد: وش هالكلام ؟؟؟
محمد: خلاص يمه كنسلي كل شي . ام محمد: جالسين نلعب حنا الله يهديك مره تقول اخطبيها لي ومره تقول ما بيها...... محمد: يمه ارجوك لا تضغطي علي أنا خلاص ما عاد ابي اتزوج مشاعل ولا غيرها .
أم محمد: حسبي الله عليك. كانك تبي تحرجني مع اهل البنت . محمد: يالله معليش......
انفكت الخطبه في غضون يمومين واصبح لكل منهم طريقه واهالي المخطوبين في ذهول فلم تتفاجأ مشاعل وقد بدا عليها وكأن شيئا لم يحدث ...... خمدت فرحة الخطوبه وسط تعجب الناس...... سوى ان فرحت مشاعل التي كبرت في قلبها بسريه تامه بعد اسبوع اتصلت ام سعود بام مشاعل وبدات تتعرف وهي اول مره تكلمها وطرحت موضوعها فبدت ام مشاعل مستغربه كيف انه لم ينتهي أسبوع حتى اتو خطابين جدد..... قالت أم سعود نريد ان نراكم فوافقت أم مشاعل وكان الموعد يوم الاربعاء أتت ام سعود ونزلت مشاعل في فستان متواضع بجمالها الشرس و ملامحها الحدة وبياضها الثلجي الذي نثرت فيه عقود الالماس وشعرها الاسود الناعم وبطولها الغريب سلمت على ام سعود..... أم سعود: ماشاء الله تبارك الله ما غلطت يو اخترتك لولدي.....
مشاعل(بإستحياء) : الله يسلمك يا خاله...... انتهت العزيمه وسعود قاعد ينتظر برا داق لطمه علشان ما يقولون مطقوق وجاي .... سعود: ها بشررررررررررررري وافقوا؟
أم سعود: إلى متى وانا اعلم فيك للحين ما طلبناها رسمي انتظر وجع..... سعود: طيب يالله اطلبوها رسمي .....
ثاني شي وشو يعني رسمي؟؟؟!!!!! ام سعود: رسمي يعني انك تسكت وتثقل وخل كل شي علي.
سعود: طيب.... وصلوا البيت دق سعود على مشاعل.... سعود: وش ذا يا مشاعل تقول امي نور القمر ماشاء الله.
مشاعل: حرا عليك عاااااااد والله استحي ..... سعود: والله ان قلبي حاس ان ربي ما راح يجمعني فيك ليش؟؟؟؟؟ مدري....... مشاعل: لا تقول كذا ترى ابكي الحين..... سعود: لا خلاص كل شي ولا صياحك..... ترى امي مهيب صاحيه تقول رح اكتشف لا يكون فيك امراض خبيثه تبهذل البنت معنا.....
مشاعل: بسم الله علييييييييييييييييييييك . سعود: أشوف الموت ولا اشوفك بليلة العرس
(أخس يستحي مرررررررره)مشاعل: انا شكلي بصيح.... سعود: والله أرجع انام بيتنا واخليك تنامين لحالك..... راح سعود لأمه لقاها ضايق خلقها...... سعود: شفيك يمه؟؟؟ أم سعود: ما فيني شي..
سعود: إلا والله فيك قوليلي يمه .
أم سعود: يا سعود يا وليدي منب قادره افارقك وانت وحيد عيالي..... سعود: لا تخافين يا يمه بسكن جنبك ولا مشاعل ولا غيرها تقر تآخذني منك انتي امي جنتي تحت رجليك وصدقيني كل ما تذكرتيني بتلقيني بوجهك...
بكت ام سعود و لأول مره يرى سعود امه تبكي وحاولت أن تخفي دموعها وما ان اجهشت بالبكاء حتى حضنت سعود بشده وبدأ كلاهما بالبكاء ..... خطبوا أهل سعود مشاعل بشكل رسمي ووافقوا أهل مشاعل .....
استمروا على الخطبه إلى ان تخرج سعود والتحقت مشاعل بكلية الحاسب فكتبوا الكتاب حتى ازدحمت زغاريط الحريم وقام سعود يزغرط معهم وحمل مشاعل على كفيه و أخذ يركض بها وشفاهم تملأهها الضحكات والفرحه تكاد أن تخترق صدورهم من شدتها فلم يتوقع كلا منهم ان يأتي ذلك اليوم ولكن مشيئة الله فوق كل شي....
مشاعل: سعوووووووووووووووووووووود........
سعود: عيوووووووووووووووني وكله تدللللللللللللللللللللللللللللللللللي
مشاعل: أحبببببببببببببببببببببببببببببببببببببك يا سعو.ووووووووود .
سعود: وانا امووووووووووووووووووت فيك يادوبه.
مشاعل: عسى ربي ما يحرمني من شوفتك قل آمين. سعود: آمين....
مشت الايام والحب في قلوبهم يكبر يوما بيوم صاروا يطلعون ليل نهار مع بعض ما يملون من بعض ابد....قرب وقت الزفاف وبدت الناس تفصل وتعدل في الفساتين والكل مجهزين وينتظرون الزفه بفارغ الصبر ولا سيما العروسين متحمسين لذلك اليوم وما يحويه هذا اليوم من افراح العمر بعد قصة حب دامت أكثر من 4 سنين صمدوا وتجرأوا على اشياء لم يستطع غيرهم ان يفعلها وفاء للحب الذي بينهم وقفت الظروف في اوجههم وقهروا تلك الظروف الصعبه في سبيل ذلك اليوم يوم العرس الذي طالما كان حلمهم الوردي.......
بدأت الايام تقل وازداد حماس العشيقين حتى تبقى يومين لتلك الحفله وبركان الصبر يكاد أن ينفجر من صدوروهم.... مشاعل: سعود هانت بقى يومين بسسسسسسس. سعود: عسى يارب...... مشاعل: مجهزتلك مفاجأه بيوم العرس بعد روحي انت. سعود: وشهي؟؟؟؟ مشاعل: مصدق انت بقولك......
سعود: لاااا قولي... مشاعل: ما فيه...... سعود: طييييييييييييب أصلن حتى أنا مسويلك مفاجأه بس منب قايلك وشهي
( خرطي ماوراه إلا الدجه)مشاعل: أحسن أصلا عادي حبيبي بكره بتشوفني بفستاني الابيض وش بتحس فيه.
سعود: امممممممممممممم بشيلك قدام الناس وبرقص وبسوي كل شي لين تصدق الناس إني مجنووووووون. مشاعل: منت صاحي.
سعود: ايووووووووووووه ذكرتيني بجيب ثوبي من الخياط عساني الحق باي. مشاعل: باي انتبه شوي شوي لا تسرع لاشنقك........ ركب سعود سيارته وقاد بسرعه جنونيه وشتائم الناس تترامى عليه ولم يأبه لأحد إلى ان وجد امامه شاحنه كبيره كانت واقفه على جانب الطريق لعطل كان فيها حاول أن يوقف السياره لكن لم يفلت من قدر الله سبحانه فارتطم بها فأصبحت سيارته كالعجين تراكم حوله جموع البشر والجماهير والدماء تكتسيه من جبينه وحتى اطراف قدمه حمله أحد الاشخاص إلى المستشفى وعلمت ام سعود بالخبر ذهبت مع والد سعود إلى المستشفى باقصى سرعه ممكنه والاجهزه و الاسلاك تنتشر على جسده ورنين جهاز القلب لم يكن انينه ولم تستطع أمه ان تسيطر على نفسها فاجهشت بالبكاء وما ان علمت مشاعل بالخبر حتى خرجت خارج المنزل من غير عبايه لتصل الى المستشفى وهي تركض وكثر البكاء قد اتعبها وارهقها وجمعت قوتها حتى وصلت إلى غرفته فوجدت أم سعود وابوه والدكتور يقول لهم انتظروا بالخارج ولكن لم يتمكن من مشاعل.... ذهبت الى سعود وهي تمسك يده وتهمس باذنه تكفى سعود كلمني رد علي لا تخليني يا سعود فتح عينه والتعب قد وضح عليه ففرحت مشاعل ومسحت بعضا من دموعها الكثيره وابتسامة الامل والتفاؤل قد رسمت على ثغرها الصغير.........
سعود: مشاعل..... مشاعل: يا عيون مشاعل... سعود : احبك موت يا مشاعل..... مشاعل: وانا بعد أموووت فيك يا بعد عمري..... سعود: قربي خدك..... اقتربت منه بعد أن ردت خصائل شعرها وراء رأسها وحاول قدر الامكان ان يقترب منها فقبل سعود وجنتها المورده وما زالت شفاه سعود ملتصقه ترتعش بخد مشاعل وعدد نبضات قلبه بدأت بالعد التنازلي لكي يودع هذه الدنيا ومشاعل وسط ابتسامتها نزلت دمعه ذابت على جبين سعود وما تزال شفاه سعود ترتعش وحاول سعود ان يطيل القبله ولكن شاء الله ان تخرج روحه في تلك اللحظه أحست مشاعل بدفئ قبلته وما ان التفتت إلى سعود رأته قد ودع الحياة وقد اغلق اجفانه الناعسه وابتسامته لرؤية مشاعل آخر لحظات حياته هي التي تبقت من سعود فبكت وهي تضحك من قهرها واخذت تصرخ بشده تهتف لا يا سعود بكره ابيك جنبي تجلس جنببببببي تكفى لا تموووووت سعود الله يخليك انت ما مت تكلم وبكاؤها يبعثر كلامها فسقطت مغميا عليها على صدره ويدها لا تزال تمسك بيده ودخلت ام سعود على اثر تلك الصرخه وضعت يدها على فمها مذهوله مصعوقه من المنظر حتى ارتمت وبكت هي الاخرى في فقدان ضناها الوحيد فأتى زوجها ليهدئ من روعها واجلسها في الخارج ومشاعل لا تزال في غيبوبتها وعلم ما تبقى من الاهل بذلك الحادث المروووووووووع فقد مات سعود وسبق قدر الموت قدر الزواج بيوم واحد مات سعود الذي احبه الجميع مات سعود وحيد امه وابيه مات سعود الذي احب مشاعل واحبته مات سعود صاحب القلب الابيض الطيب الرقيق مات سعود وقد بكى عليه جميع البشر ومشاعل ما ان فاقت من غيبوبتها حتى بدأت تبكي باليوم الواحد ساعات طوال حتى عميت عيناها وبعد"6" شهور من موت سعود وبعد ان نفذ صبرها ولم تعد تتحمل هول الصدمه جاء اجلها بين اهلها في فراشها ولحقت بحبيبها فقد انهى الموت بطغيانه على قصة حب جميله بريئه وكان ظرف الموت اقوى من حبهــــــــــــــــــــــم
*النهــــــــــايه*

3 تعليق 767 مشاهدة

شاركي في النقاش

سجلي الدخول لإضافة تعليق.

التعليقات

3

تابعي تجارب أخرى من هذا القسم.