ياليت كل وحده تشتكي من اهل زوجها تشوف قناة بدايه

انتى صادقه باالكلام اللي تقولينه بس بعد مهما كان
الزوجه تحب تملك زوجها اذا بكل طلعه اخذ امه متى تاخذ راحتها ويقعدون مع بعض ؟
باالعكس انا مع انه ياخذ امه لكن بحدود
الف شكر ياالغاليه

اول شي احب اوضحه ان ام ازواجنا على عينا وعلى راسنا
كلامك اعجبني الله يعطيك العافيه عليه واول وتالي ان على الزوج بر والديه مهما كلف الامر الى فيما يغضب الله
وعلى الزوجه ان تساعده على الموضوع لان كما تدين تدان
بس القهر ان في بعض الامهات وخصوصا امهات الازواج يكونو ن قاسين على حريم عيالهم بالحييييييييييل
ومافي احد يقدر يتحمل فوق طاقته لايكلف الله نفس الا وسعها

انا معكم ان بعض اهل الزوج صعبين لكن مثل ما قال الشيخ هذا ابتلاء من الله اصبري عليه وإن شاء الله انك مأجوره يعني انا اشوف في القسم اغليهم تشتكي من اهل الزوج وبصراحه على اشياء تافهه مره يعنى وحده تقول امي زوجي تسألني وش لبسك وبكم طيب يا اختي وشفيها لو جاو بتيها خايفه تقول لك جيبي لي مثلها والا ايش بالضبط ووحده تقول خالتي تزعل لما ياكلني زوجي والله يختي اني ضحكت ما تبينها تزعل وهي الام اللي ربت وكبرت وتعبت ويجي زوجك ما يراعي شعورها ولا يمد ايده لامه وياكله مثل ما أكلك
يعني اسمع عن نماذج غريبه انا متأكده انها مع اهلها غير ولوتسوي زوجة اخوها اي تصرف مو حلو مع اهلها تتضايق
وينا عن امهات اول كانوا يعاملون ام الزوج بحب وهيبه وخوف والله انب اعرف حرمه كبيره تدخل ام زوجها الحمام وتغسلها وتلبسها الحفائظ وان بناتها كل وحده مع زوجها وماهي داريه عن امها سألتها ما تجيبين شغاله لها احسن قالت مدام فيني حيل خليني اخدمها باخذ الاجر وهي مسكينه اخاف الشغاله تعورها مع اني كنت اسمع ان ام الزوج هذي كانت قويه على زوجة ولدها بس يوم مرضت العجوز ما رضت تروح الا لزوجة ولدها من طيبها والله ما في هالزمن وهالجيل حريم مثل هالحرمه الا تتشتكي وتتذمر وتتعب
انا مره اول زواجي ناقشني زوجي في امور قال بحطها لك نقاط اساسيه مهما صار من امي لا يمكن اوقف معك او اغلطها والحمدلله امه حبيبه وانا مهما اشوف واسمع منها او من خواته لو بقصد او من غير قصد عمري ما اقوله شي بعدها عرفوني زين وعرفوا ماني نقاله لزوجي كل شي صار بينا احترام كبير وحتى لو فيه وحده تبي تجرحني بكلمه سكوتي وتطنيشي يخليها تحترمني اكثر مو على قولة البعض يستضعفوني ابدا بالعكس تحترمك لانك مارديتي
والله اني اسمع عن بنات ودي اكفخهم لما يتكلمون عن علاقتهم باهل زوجها وحده تقول تصدقين انا ساكنه عند اهل زوجي في الدور الثاني من اجي من الدوام وانا في غرفتي او اطلع ولا انزل عند خالتي وجابت شغاله تقول ما انزل شغالتي تشتغل هذي بس لولدي واذا جا رمضان تنزل وقت الفطور وترجع غرفتها والا تروح ترسل الشغاله تجيب فطورها وتفطر في غرفتها وزوجها عاااااااااااادي راضي قلت لها كلمه زعلت مني قلت لها الحمدلله انك مو زوجة اخوي والله كنت قبل زواجك بخطبك لاخوي لكن ربي يحب اهلي وما صرتي من نصيب اخوي

طبيعي الوحدة تتحمل اهلها لانهم اهلها واهل زوجها لا بس السؤال ليه الرجل ما يتحمل اهل زوجته وليه مطلوب منها تصبر وتهان وما تتكلم وما تشتكي زوجها وهو لا 000والعذر انها ليه تتحمل اهلها يا ناس اهلها ايش فيكم ؟؟
والله الزوج يبر اهله بس الحرمه ماتبر اهلها واعتقد مو ضروري بمجتمعنا اهم شىء الزووووج وامه واهله وحبيبتي في امهات ازواج ما شغلتها الا زوجة ولدها يعني هي تعيش شبابها وتنبسط وانا الي اتحمل وبعدين من منع الزوج يبر اهله ؟؟؟ بس برضوا الزوجة ليست مطالبة تبرهم تتعامل معهم بطيب وعدل بس اذا غلطوا تاخذ حقها ولا ترموا كل شىء على الحرمه عشان كذا احنا الخليجيات ما عندنا حقوق اذا تحسسونا بذنب واحنا ما اخطئنا في النهايه العدل مطلوب بس مو ضياع الحقوق من حق الحرمه يكون لها بيت مستقل تمارس انوثتها فيه ولها قرارت ببيتها ما احد يتدخل ام اظلم واسكت لا والف لا 00000والرجل اذا قدر اهلي بقدر اهله ولو اجي للرجال واقولهم لو اباء زوجاتكم يغلطون عليكم ايش بتسوون اتحدى واحد بيقول اصبر احتسب الزم الصمت ابرهم بيقول 0000بخذ حقي هذا اذا ما رمى بنته بوجهه 000000هذا راي خاص فيني حبيت اوضحه رجاء خليكم موضوعيين بالرد00000