تعرفي أكلات مطعم(تشيليز)؟اليوم أناراح أسويها لك بطريقة خراااافية(وبالصور)

صاحبة الموضوع 10 يناير 2005

السلام عليكم ورحمة الله وبركاته
ماشاء الله تبارك الله
هاه ياحلوات شخباركم مع مطبخ تشيليز..للآن ماضبط معاكم..؟؟؟
اليوم جبتلكم المكمل الرئيسي لأي وجبة ..وهي أروع سلطة في العالم

سلطة قيصر أو السيزر سلط

شوفوا حشرحلكم طريقتي إللي لو مشيتوا عليها تماااام ماراح تذوقوا بديل لطعمها الرائع
طبعا السلطة فيها 3 حاجات رئيسية وكل وحده راح أكتب لكم كل شي مقاديره وطريقته على حده عشان لاتلخبطوا طيب ويسهل عليكم الموضوع..

أولا الخضار..
نحتاج كمية كبيرة من الخس((ممكن تستخدمي أي خس بس ألذ خس هو الأمريكي))بس مع المقاطعه أفضل إنكم ماتستخدموه كثير..+ كمية كبيرة من الملفوف الأحمر

طريقتها:
نغسل الخس والملفوف جيدا ..ثم نمزع أوراق الخس بطريقة عشوائية ونضعها في طبق التقديم..
والملفوف بالسكين نقطعه شرائح عريضة..
نضع الكل في طبق التقديم..ويوضع على جنب..

ثانيا: بالنسبة للصوص المستخدم للسلطة..فيه حاجتين مهمه
أولا ياإنك تشتري صوص السيزر سلط الجاهز موجود في السوبر ماركتات الكبيرة فقط
وفيه نوعين منها
واحد منهم كريمي ولونه أبيض كريمي ومكتوب عليه
CAESAR SALAD CREAMY SOUS

والنوع الثاني شفاف لون أصفر شفاف ومكتوب عليه
CAESAR SALAD SOUS
لكن لو مالقيتي هذي الصوصات وماقدرتي تحصلي عليها فراح أعطيكي طريقة الصوص تعمليه في البيت..
وهي كالآتي..

صلصلة سلطة سيزر
ملعقتين كببيرة(ملعقة طعام) مايونيز
ملعقة كبيرة من الخل الأبيض
ملعقه صغيره من سمك الانشوجه ( وهذي تلقيها في صف معلبات التونه في السوبر ماركت ولها طعم قوي و حاذق ) وتراها أهم شي في السيزر سلط وطعمها يجنن معاها لاتنفجعوا عشانوا سمك..تراه سمك صغير جدا مثل الأصابع وخالي من العظم ومجرد إنه يعطي نكهه للصوص ومافيه طعم زفارة ولا شي وعلى ضمانتي..
ملعقتين من زيت الزيتون
ملعقتين كبيرة من عصير ليمون
ملعقه صغيره بذور الكابرز المخلله ( وهذي تلقينها بسهوله مع المخللات في السوبر ماركت وسعرها رخيص والعلبه تكفيك عدة مرات )

حطيهم سوا في الخلاط ماعدا زيت الزيتون وأخلطي لحد ما يتجانس الخليط بعد كذه وإنتي بتخلطي الخليط(بعد ماتجنس طبعا وإختلطت المكونات تمام)) إبدأي بالتدريج بإضافة زيت الزيتون حتى يبدأ يغلظ الخليط معاكي..وبكذه صار عندنا الصوص وتقدري تحتفظي فيه في الثلاجة..

ثالثا؛ الدجاج المشوي المتبل..
نحتاج إلى صدور دجاج شرائح مخليه من العظم+ثوم مهروس+ زبدة+أوريغانوا أو زعتر بري+ قليل من عصير الليمون الطازج..

طريقتها:
نقطع صدور الدجاج إلى شرائح رفيعه طويلة..ثم نضع في مقلاة الشوي((المخططة)) التي تحدثت عنها سابقا في الخضار أو ممكن إستبدالها بمقلاة البيض العادية
نضع في المقلاة القليل من الزبدة لتذوب..ثم نضع عليها الثوم حتى يصفر فقط بدون أن يحمر أو يتكشن إنتبهوا.. ثم نضع شرائح الدجاج المقطعه وتشوى وكل شوي نقلبها على الوجه الثاني حتى تحمر من كلتا الجهتين..ثم نخلط الأوريغانو أو الزعتر البري مع عصير الليمون ونضعه فوق الدجاج المشوي في ال مقلاه ونقلب قليلا علا النار ثم نشيل الدجاج على جنب..

رابعا:الخبز المحمص..
نحتاج إلى خبز فرنسي(الطويل) أو يستبدل بـ(التوست)+صوص (السلطانه) بالأعشاب والثوم والليمون..أو يمكن إذا مالقيتي هذا الصوص تعملي بداله هالصوص البيتي((زبدة سايحة+ ثوم مهروس +زعتر بري+ملعقة كبيرة زيت زيتون +قليل من عصير الليمون))
تسيحي الزبدة على النار وتحطي عليها الثوم المهروس لثواني وإطفي النار وأضيفي له عصير الليمون والزعتر البري وزيت الزيتون وأخلطيه جيدا..
طريقته:
يقطع الخبز مكعبات صغيرة ويدهن بالصوص ونخله الفرن ونولع عليه الشواية حتى يجمر قليلا..ونتركه على جنب..

خامسا:جبن بارميزان مبشور((موجود في جهة الألبان والأجبان في السوبر ماركتات))

طريقة عملهم مع بعض هي كالتالي..
نخلط قليل من صوص السيزر+الجبن البارميزان مع الخس والملفوف جيدا ثم نضعهم في طبق التقديم..
ثم نرص شرائح الخبز ثم شرائح الدجاج المشوي.. ثم نصب قليل من الصوص على الوجه وترش بالجبنه البارميزان وتقدم..
هذه السلطة تؤكل بارده..

وبالهنا والعافيه وأتمنى تكون طريقتي عجبتكم ياغاليات..
ويالله وين التشجيعات عشان أكملكم..

وهذي صورتها

تعرفي أكلات مطعم(تشيليز)؟اليوم أناراح أسويها لك بطريقة خراااافية(وبالصور)

التعليقات

من تعرف تضبط كيكه الليمون ؟

مين تعرف الصوص

مين تعرف ذي الاكله طحت بغرامها😭

كيف تعرف أن الأسماك طازجة

كيف تعرف أن الاسماك طازجة!!