رضيعك اول ماتحطيه بسريره يصحى ويبكي؟ تعالي عندي الحل

انا ام جديده وكنت اعاني مع مولودي اول ماانومه بسريره على ظهره يبدا يتحرك ويبكي ومن غبائي كنت اشيله وارضعه احسبه جوعان وكل الليل على هالحال ومع مرور الوقت اكتشفت وش فيه وهو انه يصحى يبغى يتجشأ لانه كان ينام وهو يرضع وماالحق اجشأه وحتى احيانا يتجشأ وينام ويصحى مره ثانيه يبغى يتجشأ ثاني

الزبده انصح كل ام بعد ماترضع مولودها انها تخليه يتجشأ مره واثنين وثلاث كل ماشافته يبكي بدون سبب تشيله وتربت على ظهره مع المسح لاعلى خاصة اليسار جهة المعده الى ان يتجشأ وحتى لو بكى مره ثانيه تسوى نفس الشي يكون باقي هوا
واذا جته الحازوقه بعد الرضاعه بفتره برضو شيليه وجشأيه بتشوفين بيطلع الهوا

اما اذا نام وهو يرضع وماقدرتي تجشأيه الشكوى لله ماعليك الا انك تنيميه على جنبه اليسار وحطي مخده او اي شي ورى ظهره لان المعده بالجهه اليسار وبكذا الحليب مايرجع
انا دايما ولدي اذا صار يبكي بدون سبب اخذه واضمه وهو بوضع طولي واجلس بالكنب وابدا اهز فيه ورى وقدام كأني مرجيحه ويبدا ياعمري يطلع هوا فوق وتحت بعدها يرتاح وينام
ودي دايم انومه على اليسار لانه يرتاح ولايصحى كل شوي بس ماودي راسه يخرب شكله وحتى ملابسه تتبلل يطلع البول من جنب
عموما الطفل كل ماكبر ينام احسن
ادري كثرت هذره بس والله ابيكم تستفيدون ولاتخلون اطفالكم يتعذبون وتتعذبون معاهم
اللي تستفيد تدعي لي بأن تجي لي خدامه طيبه وشغلها زين