مواقف اهل الزوج الطيبه

بسم الله الرحمن الرحيم

السلام عليكم ورحمة الله وبركاته

والله يابنات في مواقف طيبة كثيرة كلمة الحق تنقال مانبي نصير جاحدات جميل مانقول الا الموا قف الشينة والزينة مانقولها

انا الحمد لله رب العالمين ام زوجي تهدي لي الذهب الله يسكنها الجنة واخته والله ماتقصر تهدي لي الهدايا الثمينة والخواتم الفخمة اسأل الله يشفيها

والحمد الله ماجاني منهم الا كل خير

والله ان ام زوجي في يوم من الأيام شافتني تعبانة وتقوم تدعي وتقول جعلني ما اعيش في بيت ام سعود مو موجودة فيه

وانا الحمد لله ادعي لأهل زوجي واهل زوجي يدعون لي

اسأل كما جمعنا في هذه الدنيا الفانية على خير

ان يجمعنا في دار الكرامة في مقعد صدقٍ عند مليكٍ مقتدر

مانبي منهم فزعات خليهم يكفون شرهم ويمسكون السنتهم ويحسون اننا بنات ناس
لحد يقول معقوله
انا لاشفتهم كافين شرهم بالنسبه لي فزعه الله يجزاهم خير
طبعا فيه ناس ونعم بس للاسف اني اسمع عنهم وماشوفهم

مو مسألة جحود يا بنات..

بس اهل الزوج سبحان الله خيرهم دايم ناقص و جميلهم ما يكمل و تحسين وقفتهم معاج فيها منية..

يمكن لو كان الموضوع عن زوجات الاخوان كنت قلت و قلت في مواقف زوجات اخواني الطيبة و لا نكرت خيرهم.. برغم انه فيهم الشينات.. بس الطيبات تحسين الخير طالع من قلبهم لانه يوصل لقلبج و تحسين فيه..

يمكن لو الموضوع عن الصديقات كان لقيت الف وقفة و وقفة لهم برغم انه طلعت لي كم صديقة مثل الزفت.. بس الصديقات المخلصات لو اكتب فيهم من اليوم لالف سنة قدام ما وفيتهم حقهم...

حتى الاهل و الاقارب .. فيهم الزين و فيهم الشين.. بس يوم يطلع الخير منهم تحسين فيه لهفة و نية صافية ما تتمنى لج الا الخير..

بس اهل الزوج تحسين في خيرهم منية.. مهما كانوا عدلين و طيبين و زينين.. تحسين خيرهم مثل الواجب يبون يسوونه و يفتكون.. و معظمه للاسف واجهه قدام الناس عشان الناس تقول يا طيب اخلاقهم مع زوجة ولدهم.. هذا اللي لاحظته..

مو مسألة جحود يا حبايبي..

بس الوقفة و الفزعة اللي طالعة من القلب و فيها نية صافية 100% تدش على طول في قلب المتلقي .. يحس فيها و يتقبلها و يظل دايم الدوم شايلها جميل على راسه لهم..

هذا رأيي..

اتمنى تتقبلونه بصدر رحب..

:26: