ويلااااااه ..ضاق الصدر .. وربي مليت .. ادخلوا الله يرزقكم الجنة
آااااااه ....
مشكلتي مشكلة أي وحدة فيكم .. لكن تختلف باختلاف الزمان والمكان .. والنهاية طبعاً ...
مشكلتي بدت من لما كنت صغيرة .. والكل يعرف شو يعني الصغر .. يعني الدلع ولدلع والدلع ..
ومن هني بدت مشكلتي ..
كنت من أنا صغيرة دايماً هالشيبس والبيبسي ما يفارقني ..
كنت لمن أجووع وحتى لو كنت ماكلة قبلها بفترة قصيرة أرجع وآكل ثاني .. ومحدن كان يقول لي شي ..
كانوا مخليييني أملي هالبطن .. وفي النهاية طبعاً .. صرت هذيك الطفلة الدبدوبة اللي كل طفل بسنها يشوفها يسبها
ويشمت فيها .. كنت صغيرة .. ومستحيل هذاك الوقت انه يخطر ببالي فكرة الدايت والريجيم ..
لكن مع الوقت صرت اشوف كل اللي بسني يطلعوا ويلعبوا ويسووا اللي خاطرهم فيه ..
أما أنا .. !!!! .. ما كنت أقدر .. ببساطة لأني مب بنشاطهم ..
كنت كل ما اقول لأمي ابغي أطلع واتمشى بالفريج تمنعني .. لأنها كانت تخاف عليي من اليهال .. لأنها كانت متأكدة
انهم بيقعدوا يضايقوني ..
رغم ذلك .. كنت أركض .. وألعب في الفريج .. وأسبح في البحر .. ونلعب الغميضة وغيرها ... بس طبعاً كل هذا كان
في أحلااااااااااااااااامي ... ويمكن اذا فكرت أستانس .. أستانس مع ألعابي ...
مرت السنين وكبرت .. وهني بدأت مشكلة الملابس ...
لما كنت صغيرة ما كانت الملابس تأثر فيني .. لأن أهلي باختصار كانوا يلبسوني ملابس لأعمار أكبر من
عمري أصلاً .. لكن الحييين بدأت المشكلة وهي اني أحصل ملابس على قياسي ..
طااال عمركم .. وزني ما كان بالدرجة اللي تتخيلوها .. بس لبنوتة في عمري فأكييييد بيكون في خاطرها انها تلبس
بدلات وتيشيرتات مثل باقي البنات .. لكن للأسف مثل هالأشكال ما كانت تليق عليي .. كنت دايماً حبيسة الجلابيات .. وفي خاطري مرة وحدة بس ألبس تيشيرت أو بديهات مثل هالبنات والناس .. لكني كنت أكتمها في نفسي وأسكت ..
بديت مشوار الريجييييمات من أنا وعمري 13 سنة ... ما ادري اذا تعتبروه عمر مبكر ولا لا .. بس كان متعب وممل هذيك الفترة لكني حاولت قد ما اقدر .. وبديت أخسر وزن وطبعاً بديت أستانس .. كانت امي كل ما تشوفني انقص تروح تشتريلي تيشيرت كيوت على أساس انه بيي اليوم اللي بقدر البس فيه هالتيشيرت .. وكنت أنا متحمسة أكثر منها .. كنت كل ما انقص كيلو .. اركض واقيسه .. عل وعسى ييجي على مقاسي .. لكن في النهاية يتم التيشيرت في الدولاب وما اقدر ألبسه .. وأتم أتحسر على نفسي وعلى هالجسم اللي ابتليت فيه ...
كنت أحاول وأحاول وأحاول بهالريجيمات .. وكنت أنقص .. لكن كان فيه شي واحد ما يخف فيني وهو الكررررش ....
بديت أسوي تمرينات لتخفيفه ... في البداية الصراااحة عطت هالتمرينات مفعول .. وكنت أحس بتقلصات في الكرش .. وسمعت ان هالتقلصات اشارة إلى انه التمارين تسوي مفعولها .. لكنني بديت أبالغ بشكل كبير في هالتمارين بهالمنطقة ..
مع الوقت ما عدت أحس بالتقلصات في البطن .. ومهما سويت من تمارين ما يتحرك هالكرش من مكانه .. وبعدها قريت في المنتديات ان كثرة التمارين والضغط على الكرش يعطل عضلاته ويبطل ينشد ...
قلت لا .. مستحيل .. وكل مرة والثانية أحاول ومافي فايدة ..
ولليوم بعدني أحاول يمكن أستفييد وافتك من هذا الكرش .. لو تعرفون بس .. بامكاني اني البس الملابس البناتية واستانس مثل الخلق والعالم بس لو قدرت اشل هذا الكرش .. لأن الصرااااحة بدون مبالغة .. شكله فظيييييع ...
حرام والله .. كل مرة أشوف اختي تلبس وتكشخ وتطلع بأحلى حلة .. وأنا أتم بجلابيتي العادية .. أرثي لحالي .. وأتمنى تصير معجزة تنحفني ... للعلم بس .. الحين عمري صار 19 .. ولسه أحاول بهالريجيمات وماشي فايدة ..
الفايدة الوحيدة من هالريجيمات .. اني تعلمت ما آكل وايد .. بس حتى قلة الأكل ماعادت تأثر بوزني ..
وللعلم .. كل اللي يشوفني وأنا آكل يستغرب من أكلي ويعتبره شووووووي .. بس كيف أسمن ؟؟ .. الله أعلم ...
أدري بعضكم إذا مب معظمكم بيقول شو هالبنت ؟؟ مشكلتها سخيفة وكبرتنها عالفاضي !!! .. بس فعلاً فعلاً لو ما كانت مأثرة فيني ما كتبتها لكم ...
السموحة منكم عالإزعاااج ..
أشكر كل وحدة فيكم قدرت توصل لنهاية موضوعي .. أنا ما كتبته إلا من القهر اللي فيني ..
يمكن هذي أول وآخر مشاركة لي في المنتدى لأني كنت أبغي حد يسمعني ..
والحين بس بغيت دعوة حلوة منكم اني أنحف .. ويخف كرشي ..
والله يجزااااها الخيييير اللي توصفلي طريقة أتخلص فيهاا من هالكرش ...
طلبتكم .. يمكن هذا هوا الطلب الأول والأخير .. لاتردووووني ....