السلام عليكم ورحمة الله وبركاته
دكتورتي العزيزة بغيت اخذ رايج في موضوعي
أنا في حملتي الاولى قالو لي الرحم قصير ومفتوح وهذا كان في أول الشهر الرابع وسويت عملية ربط عنق الرحم
وكان كل شي أوكي لما وصلت الاسبوع التاسع عشر وانا نايمه حسيت بماي ينزل علي بكمية كبيرة على طول رحت الطوارى قالو لي كيس البيبي أنفتح ومابقي من الماي الا نسبة بسيطة ولازم نفتح الربط بس أنا رفضت على أمل ان الطفل يبقى ودخلت المستشفى وقالو لي انحط لج مضاد بس في حالة ارتفعت درجت حرارتج نفتح الربط على طول ووافقت بس بعد ثلاث ايام جاني الطلق ولما فتحو الربط انجرح عندي عنق الرحم وبعد ماولدت سوو لي غسيل وخيطو عنق الرحم بغرزتين .
بعد الولاده سألت الدكتورة عن سبب فتحت الكيس قالت لي العادة الالتهاب هو اللي يفتح الكيس بس أنا كنت أسوي تحاليل كل شهر ومافيني
شي قالت بنشوف نتيجة عينة المشيمه ولما اظهرت كانت التهاب .
وقالو لي عنق الرحم طوله 2,5 ولازم تسوين ربط في الاسبوع 12 اذا حملتي مره ثانية .
حملت بعدها بثلاث شهور وكنت أراجع عند دكتور خاص كنت رايحة له لأن نزل علي شوية دم ولما كشف علي من تحت لقى أن الخياطه اللي في عنق الرحم نصها التحم ونصها مالتحم وقال لي انتي بتسوين ربط فيكشفون عليج وانتي تحت التخدير أفضل.
ولما دخلت المستشفى لعملية الربط بلغت الدكتورة باللي شافة الدكتور .
وسويت الربط وطلعت البيت والحمدالله الحمل كان مستقر وماكنت أحس بأي شي .بس مره الله يعزج كنت في الحمام كنت حاسة بأمساك خفيف ولما عصرت بشويش يادوب عصرت حسيت كأن بيطلع مني شي من فتحت المهبل على طول وقفت وماسويت شي واليوم الثاني نفس الشي بس حسيت كأن شي بطلع مني نفس لما حسيت بطلعت راس البيبي ولما حطيت يدي حسيت بمثل الكوره نصها طالع ودزيتها بالخفيف على داخل ودخلت ورحت على طول الطوارئ قالو لازم نكشف من تحت وانا رفضت وثاني يوم رحت لدكتورتي وكشقت علي من تحت وسوت لي التراساوند وقالت ان الربط انفتح والكوره اللي حسيتي فيها كانت كيس البيبي ورجعت مكانها وسوت لي ربط مرة ثانية وكيس البيبي كان ظاهر من الجرح اللي في عنق الرحم اللي مالتحم هو صاير مثل الفتحه وقالت لي بتمين في المستشفى لين تولدين وانت شكلج ماتوصلين التاسع أحتمال كبير تولدين فالسابع وتميت فالمستشفى على أساس اني بقعد لين أولد ولكن بعد ثلاث أسابيع جاني الطلق ونزلوني الولادة وكنت في أول أسبوع من الشهر الخامس وكنت خايفة ينجرح عندي الرحم بس الحمدالله فتحو الربط وولدت وسوو لي غسيل لأن المشيمة مانزلت نفس الولاده الاولى ولما سألت الدكتورة عن سبب الولادة قالت لي ماعرف شاقول مافي سبب واضح ممكن التهاب مع العلم مافيني التهاب وانا تحت رعايتهم في المستشفى وممكن من الربط ممكن هو اللي يهيج الكيس كانت الاسباب كلها ممكن وممكن وممكن وقالت لي أنصحج تروحين لشيخ يقرا عليج ممكن تكون عين .ولما طلعت نتيجة عينه من المشيمه طلع التهاب والدكتورة تقل هذي النتيجة على طول تجينا على كل عينه ومش مقتنعه بها النتيجه .
أنا مش معترضة على كتبة الله وأنا راضية بالقضاء والقدر بس لما اجيني الولادة فجأه من حقي أعرف الاسباب نفسيتي تعبت واااايد
أنا تاريخ 5من شهر أبريل كانت ولادتي الثانية وقالو لي على الاقل اتم 9شهور ماأحمل وطالبة تقرير على أساس أني برسله لندن أو أمريكا والمفروض اعمل فحوصات واشعه زيتية واعمل خياطه للجرح اللي في عنق الرحم اللي مالتحم . لكن للأسف أنا حامل في الاسبوع الثامن أنصدمت ماتتخيلين شكثر تضايقت وحولت انزله لأن مافيني أعيد التجربة للمرة الثالثة لكن ماقدرت سلمت أمري لله دكتورتي العزيزه أنا من قبل مقررة أني خلاص مراح أسوي ربط لو تنطبق السما على الارض لأن ماستفدت منه ولا شي بدل المره مرتين الهدف منه انه يمنع الولاده أنا على العكس تجيني الولادة . دكتورة الشي اللي انا مستغربة منه أني عملت التراساوند من 3ايام قالت لي الدكتورة أن طول عنق الرحم طبيعي 3 قلت لها تأكدي مستحيل قالت واضح مقاسة عندي انه 3سم .أنا ماصدقتها من الصدمه خذيت موعد في عياده ثانية يوم الاحد الجاي .
دكتورة سؤالي هل من المعقول ان الرحم ممكن يطول بهالطريقة .وأيش تعليقج على اللي حصلي مع العلم انا متزوجه 19-1-2008
ولادتي الاولى كانت 8-8-2008 وولادتي الثانية 5-4-2009 وانا الحين حامل في الاسبوع 8 .
ياليت تفيديني وتوجهيني تعبت نفسيتي خايفة ينعاد الموضوع نفسه .
موضوع جديد لتلقى الاسئلة للدكتورة راندة فخر الدين
متابعة النقاش، صفحة 145