طريق الامل ( خبرات متبادلة حول مراكز العقم فى مصر ) الجزء السادس

السلام عليكم ورحمة الله وكل عام وانتن بالف خير يا اغلى اخوات
وحشتوني جدا جدا فوق ما تتصورو
انا حاقلكم اخباري باختصار لاني لاول مرة اقدر ادخل النت
انا بحمدالله وصلت مصر اول يوم رمضان بس المشكلة ما فيش نت ولا حتى كافية قريب عشان اطمنكم عليا
انارحت على طول لمستشفى ادم وخدت معايا تحاليل الهرمونات اللي عملتها في السودان وزيادة عليها عملوا لي فحوصات للتجلط وسونار وبعدها ظهر عندي لحمية صغيرة خالص تقريبا 1سم ونص بس الدكتور قال احسن تتشال والاسبوع اللي فات عملت منظار وشلتها والحمدلله عدى على خير بس تعبت خالص من البنج المهم قبلها بيوم خدت حقنة ليبرون والبيريود جات امبارح وبكرة ان شاء الله ميعادي عشان ابتدي التنشيط
دعواتكم يا احلى اخوات وربنا ببركة الشهر الكريم يجبر خاطرنا كلنا
معليش انا مش حاقدر اكتب لكل واحدة باسمها ومش عارفة اراجع كل اللي فاتني
بس ربنا يوفقكم كلكم وحاحاول ادخل على قد ما اقدر اطمنكم
استودعكم من لا تضيع ودائعه

سارة ربنا يجبر بخاطرك وحشتيني موووووت ولسة كنت بكلم عليك مع شوشو
وحشتيييييييييييييني يا قمرة

زينب....
سلامتك من الحزن و الزعل يا قلبى....
و بعدين لما فيه حاجة مضايقاكى ليه يا حبيبتى مجيتيش فى الأول و فضفصتى معانا....
المشاعر ديه يا حبيبتى عادية و طبيعية و مفيهاش خجل و كلنا بنمر بيها....
وارد انك تتضايقى لما تسمعى خبر زي ده....و ده مش معناه انك كرهتى الخير لصاحبتك...
لا انا واثقة تماما ان كل واحدة من حبايبى هنا قلبها نقى و مليان بالخير...
بس طبيعى ان الواحد يحزن ان حلمه لسه ماتحققش...بس اهم حاجة اننا منستسلمش للحالة ديه...
و منخليش الشيطان يستفرد بينا و يخلينا نعترض على قضاء ربنا....لا ..عايزين نثبت...و نفضل دايما نؤكد جوانا ان اللى ربنا كتبهولنا هو الأفضل....و ان ربنا مقسم الأرزاق...

و أخيرا يا زوزو....انا ليا عندك طلب....زي ما قالولك حبايبى....الزوج غير مسئول عن الإجهاض....فيبقى الشغل الفترة ديه المفروض يكون عليكى يا قمر علشان ربنا يعوضنا عن اللى فات...و نفرح معاكى كلنا...

انتى كانت مشكلتك تكيس....يبقى نرجع ناخد الميتفورمين.....و نستمر فى فقد الوزن...عايزين نوصل للوزن المثالى....انا مثلا فاضلى 2 كيلو و ان شاء الله على آخر رمضان اجيبهم....يلا تعالى اتسابقى معايا...لان انتى كمان اعتقد انالحكاية كلها 2 ولا 3 كيلو...
و ان شاء الله لما جسمك يستريح كمان شهر كده ...يبقى لو محصلش حمل طبيعى ممكن تسالى الدكتورة بتاعتك و تبداي تنشيط كويس...و ان شاء الله ربنا يكرمك آخر كرم.....اتفقنا يا قمر...

و على فكرة...انا بدأت تنشيط الشهر ده.....لان كانت عندي مظاهر كتير بتقول ان فيه ضعف فى التبويض و الدكتور قالى يفضل اننا نبدأ فى التنشيط.....يلا بقى ادعيلى كتير...و شدي حيلك و تعالى امشى معايا فى مشوار العلاج...