طريق الامل ( خبرات متبادلة حول مراكز العقم فى مصر ) الجزء السادس

شيمو يا قمر...
مبروك على الشغل....و عقبال ما أباركلك على البيبى...
أيوه كده شدي حيلك...و معلش أهو شوية تعب ..بس أجمل حاجة فيه إنه هيساعدك على الاستمرار فى العلاج وفقد الوزن والأهم من كل ده يشغلك عن التفكير.....و إن شاء الله ربنا يفرح قلبك فى القريب العاجل....

و بعدين تعالى هنا...ده انتى دايما فى بالى و دايما لما بادخل باسأل عليكى....و لا أنتى عاملة نفسك مش واخدة بالك علشان متبعتيليش هدية أنتى كمان......فرفش يا قمر...إحنا منستغناش عنك أبدا...

اشتقت اليك صدقينى انتى غالية عندى جدا والملف كله دانا فيه من صفحة رقم واحد وتجمع رقم واحد وعارفه قد ايه الحب بين التجمع بس مش عارفه عايزة اقول حاجه وخايفه اتفهم غلط بخاف اقولها

بحس انى بعد ما بتعلق باى حد هنا وبعيش معاها حلمها انها تكون ام وادعيلها ليل نهار وربنا يكرمها بالحمل تنشغل عن التجمع وتيجى غيرها وتبدأ الرحلة معاها وبردو تسيبنا فى الاول تبدأ مشاركاتها تقل بالتدريج لحد ماخلاص لا تسأل ولو سألت كل فين وفين انا نفسى كلنا نكون امهات بس بخاف تمشو وتسيبونى لوحدى واحده ورا التانية بجد مش اعوذ بالله منى ولا حاجه لكن انا فعلا بحب التجمع كله باللى فيه بحبكم متأخرات عن الحمل وبحبكم اما بتكونو امهات وبحبكم جدات كمان ان شاء الله لكن على قد مابحبكم على قد مابكره الوحده وانكم بالتدريج تنسحبو من التجمع طبعا هتقولو لأ ومحدش هيسيبه لكن عمليا الظروف بتتغير عالعموم ربنا مايحرمنا من تجمعنا ابدا لانى مرتبطة بيه نفسيا قوى

إيه ده يا شيمو.....
أولا متخافيش و قولى كل اللى فى قلبك....و محدش هيقدر يقربلك.....
و بعدين البنات كانوا بيسيبوا الملف قبل كده علشان الحكاية كانت سايبة و مكانش فيه حضور و انصراف....
لكن دلوقتى اللى هيتورب كده و لا كده هيلاقى اللى يطلعله السيخ المحمى....و لاالفنكة و باقى أدوات التعذيب...
بصى نيجى للجد....أحنا كل واحدة ربنا يكرمها....بنديها فرصة أول كام شهر فى الحمل علشان فعلا بتبقى محتاجة راحة و الناس بتخاف من الكمبيوتر و خلافه.....
و لما تولد نديها مهلة 6 أشهر لحد ما البيبى يبقى محترم ...لان فعلا الالتزام نحوه و قلة النوم و التعب بيبقوا حاجة فعلا صعبة......
و بعد كده كله يرجع يلتزم تانى.....و بصى اللى بيسيبنا ده بيبقى حد مارتبطش بينا من الأول...و بيبقى حد داخل لمصلحة....علشان يلاقى حد يشيله همه و لا يعرف منه معلومة.....و النوع ده بصراحة أنا باعتبره بتاع مصلحة و ميلزمناش......
و احنا هنا بقينا أصدقاء....مش مجرد ناس بتيجى بس علشان تتكلم عن تأخر الإنجاب و تستنى الحمل.....بدليل إن فيه بينا أمهات كتير....و أنا عن نفسى بددأت معاكم و أنا أم و هافضل معاكم لحد ما أجوز العيال كمان إن شاء الله.....و كمان بصى لرمال و كوكر....أهم حبايبى ربنا أكرمهم بالأطفال و مع ذلك مسابوش التجمع.....و كمان مسلمة حبيبتى ....بعدت فى الأول لظروف السفر...لكن أول ما ظروفها سمحت دخلت تانى و بقت معانا على طول....و لما تولد...هتتشغل شوية و برده كمان كام شهر هترجع تانى بأمر الله.....و أنتى نفسك لما ربنا يكرمك بأمر الله برده يا ستى هنديكى نفس الصلاحيات و جدول الأجازات......

و أخيرا.....اللى بغيب المفروض نستناه شوية و نسأل عليه يمكن يكون فى كرب و لا عنده ظروف تمنعه......أما اللى يبيع.....فاحنا كمان مش عايزينه من الأول......