طريق الامل ( خبرات متبادلة حول مراكز العقم فى مصر ) الجزء السادس

وانتي يا اوكسي اهدي كده وتوكلي علي الله وإن شاء الله تبشرينا قريب

توتا الله يطمنك يا حبيبتي
شفتي بقى إن القلق مكنش ليه لازمه ... عموما الحمد لله إنك هتبتدي تنشيط
ياللا شدي حيلك بقى خلاص هانت
ربنا يكرمك ياب ويكملك على خير بإذن الله

أوشي يا قموره مش عارفه ليه بحس إنك زي أختي الصغنونه
بصي يا ستي أنا كنت زيك بالظبط حامل في توأم وكنت عايزه أسافر
وبرده أهلى وخصوصا ماما كانت معترضه تماما وبعيد عنك أنا كنت مخنوقه وهفرقع مش عارفه أعمل أي حاجه براحتي وحاسه إني مسجونه
المهم أنا سألت الدكتور وساعتها قالي مفيش كلام في السفر لحد ما نطمن هنعمل ربط لعنق الرحم ولا لأ وده طبعا مبيبنش غير على الأسبوع التاي عشر تقريبا لأن ماشاء الله تبارك الله ربنا يباركلك فيهم يارب هما كل ما يكبروا هيضغطوا على عنق الرحم وممكن لا قدر الله عضلة عنق الرحم تيجي على الشهر الخامس ومستحملش الوزن الزايد ويحصل ولاده مبكره ، وده أنا شفتها مع كذا واحده ربنا يعافيكي يارب، علشان كده الدكتور ممكن يطلب منك تعملي الربط ده حتى لو كنتي مش محتجاه بس للإحتياط وطبعا تريحي بعديه عشر أيام وبعدها سافري زي ما إنت عايزه
وخصوصا إن الحمد لله السعوديه مش وقت كتير
ياريت يا أوشي تسألي الدكتور على الربط وتفهمي منه كويس
وطبعا مش هقولك أنا لما الدكتور قالي كده قضيت الأيام ده كلها كل يوم أصلي إستخاره وأقرأ سورة ياسين بنية إن ربنا ييسرلي الخير والحمد لله ربنا يسرلي السفر ولما سافرت كنت كملت ثلاث شهور وأسبوع من الرابع
وفيه حاجه كمان السفر ليه تعليمات مهمه :
1- الذهاب للدكتور والمتابعه معاه قبل السفر بيوم أو يومين علشان تتأكدي إن كل حاجه سليمه إن شاء الله
2- مش عايزين إرهاق خالص في لم الشنط واللذي منه كفايه رحلة الطياره
3- روحي المطار قبل معاد الطياره بتلات ساعات أو أكتر علشان تخلصي إجراءات الوزن وبعدها روحي أقعدي في المسجد وريحي جسمك ساعتين كده قبل الرحله
4- إطلعي الطياره بشنطة إيدك بس بلاش تشيلي حاجه تقيله
5- شرب سوائل كتير جدا وبالذات العصائر الطبيعيه
6- تعدي مرتاحه على كرسي الطياره وحطي مخده وراء ظهرك وياريت لو حاجزه درجه أولى تفردي رجلك وتريحيها تماما
7- بعد ساعه قومي إتمشي دقيقتين بس وإرجعي أقعدي تاني
8- طبعا لما توصل مش عايزين مجهود إطلاقا لاتفضي شنط ولا تنظفي شقه يومين كده على الأقل
9- ياريت بلاش جماع نهائييييي وياريت تسألي الدكتور برده على الموضوع ده
10- المتابعه مع دكتور متخصص وثقه أول ما توصلي إن شاء الله
وربنا يا حبيبتي يكتبلك الخير إن شاء الله
بصي أنا عايزاكي كل يوم تستخيري ربنا - وتستودعي أجنتك عند ربنا - وتسألي الدكتور في كل حاجه وتفهميها منه كويس قوي - وتحاولي ترضي والدتك وتطمنيها عليكي وتفهميها إن ده هيكون أحسنلك إنت والبيبيهات خديها بالهداوه كده - وحاولي تخلي زوجك يشوفلك دكتور كويس قبل ما تسافري علشان تبقي مسافره وعارفه هتكملي مع مين .

وربنا يارب يوفقك ويسهلك أمورك ويعملك الخير يا أوشي يارب
ومش هقولك طبعا لو عايزه أي إستفسار أنا تحت أمرك

girls i love all of u fe allah