حبيبتى هدى اسمعى كلامى اللى هقوله لك ده كويس ..انا هرد على كام نقطة فى كلامك بوضوح
اولا انتى من النوع اللى بيقرأ كتير ويتوتر من اى حاجه بيقرأها سواء تنطبق عليه اولا .. وللأسف يا حبيبتى الموضوع ده خطر عليكى جداااا يمكن اخطر من قرار انك تعملى العمليه نفسه .. انتى متعرفيش ده ممكن يأثر عليكى ازاى فى المرحلة دى بالذات لان مجرد اى حاجه تسمعيها ممكن تخليكى تتراجعى عن العلاج والعمليه والقصه كلها ولهذا السبب بنصحك وبشدة انك توقفى القراية كام يوم كده علشان تهدى اعصابك وتعملى ستوب لنفسك وتحددى مصادرك اللى هتستفسرى منها عن كل اسئلتك فى المرحلة الجاية
اول مصدر يجب يكون ليكى هو طبيبك المعالج طالما انتى واثقه فيه وطالما هو انسان فاهم شغله .. يبقى لما يكون معانا دكتور كويس ليه ما نستفيدش من وجودة جمبنا مش احسن من اننا نلف حوالين روحنا كده
ثانى مصدر هو .. احم احم .. بلا فخر يعنى .. ملفنا العزيز .. ومش قصدى انه يكون مرجع ليكى لا .. هو هيكون مجرد حلقه نقاش موضوعية تستفيدى منها ومن آراء البنات ونصايحهم اللى أغلى من الذهب مع العلم ان كل حاله مختلفه عن التانيه كتير يعنى اللى ينطبق على واحدة فيهم ممكن ما ينطبقش عليكى
ثانيا يا حبيبتى
طبيعى جدا ان كل ما هتروحى لدكتور هيقللك حقن !!!!! شئ لابد منه فى العمليه بدون شك .. بس انتى ليه مش تعرفى الدكتور موضوع الحساسيه ده وتعرفى منه ايه الرسك اللى ممكن تقابلية لو اخدتى الحقن ولو ينفع يعمل لك اختبار قبل ما تاخدى الحقن علشان تشوفى هتعمل لك حساسية ولا لا .. اصل مش معقول ان كل اللى عندهم حساسية ميقدروش يعملوا عمليات حقن .. اكيد فى حل بس احنا مش عارفينه .. هنعرفه لو اتناقشنا مع الدكتور اكيد
ثالثا .. خايفه من تأثير الهرمونات .. اولا ده هيبقى شهر واحد بس بأمر الله وهيبقى تحت اشراف الدكتور وهو هيبقى عارف مشاكلك الصحيه .. يعنى هيديكى الجرعات حسب ما جسمك يتحمل .. وبعدين يا حبيبتى كلللللنا اخدنا الهرمونات دى بدل المرة اتنين وعشرين .. ومش حصلنا حاجه .. ما تخافيش منها وما تبقيش خوافه زيادة عن اللازم بس المهم تاخديها بنظام وحسب ما يقللك الدكتور .. والحالة اللى بتحكى عنها دى لو حطناها فى بالنا طول الوقت محدش فينا هياخد تنشيط ولا يتعالج وخلينا كده من غير عيال .. لا يا حبيبتى طبعا الواحد لازم يسعى واكيد هى كان عندها حاجه عملت لها المشكله دى مش تقولى لى الهرمونات هى السبب اللى عملت كده .. قد يكون عندها مشكله اساسية ولما اخدت التنشيط ظهرت وحصل لها ده .. بلاش بقى نبص لغيرنا وخلينا فى نفسنا ونشوف ايه المناسب لينا ونعمله وكله تحت اشراف الدكتور ومش هنعمل حاجه الا اللى هو بيقول عليه .. وفى الاول والاخر لازم يبقى عندك توكل على الله اكتر من كده ...
طريق الامل ( خبرات متبادلة حول مراكز العقم فى مصر ) الجزء السادس
متابعة النقاش، صفحة 327