اولا بعتذر للبنات انا كتبت لكم مشاركة طويله بس خبر ماما خضنى واعذرونى انا عايزة اكلمها الاول .. سامحونى
ثانيا .. لازم اقول لك الاول يا ماما حمدالله على سلامتك قبل اى حاجه تانيه لان سلامتك وصحتك تهمنى اكتر من اى شئ ولان الاجنة اللى فقدتيها ان شاء الله تتعوض بأمر الله لكن انتى وصحتك ما تتعوضوش ابدا يا ماما ...
بصى يا حبيبتى انا للأسف مبقدرش اواسى الناس اللى بحبهم اوى اوى اوى .. لانى بحس انى معاهم فى نفس القصه .. ودى حاجه صعبه عليا انى اكون بحبك جدا ومش عارفه اقول لك حاجه .. بس انا مبسوطة جداااااااا انك جيتى خرجتى كل اللى جواكى وشاركتينا معاكى فيه وده يقول انك لسه ماما بتاعتنا اللى احنا عارفينها كويس
واسمعينى فى الكلام اللى عايزة اقوله لك ...
اولا محدش فينا يقدر يصادر على حقك فى الحزن والزعل ابدا ابدا .. وان من حقك تطلعى المشاعر السلبية ومشاعر الاحباط اللى جواكى علشان دى هتبقى اول خطوة للتخلص منها ..
ثانيا.. زى ما قلتى الانسان لما بيقع فى مشكله بيتعرى قدام نفسه وقدام ربنا ودى اكتر كلمه قلتيها حكمة .. وفعلا هو ده اللى حصل معاكى .. اول ما عرفتى ان العمليه اتلغت .. اتصدمتى بشكل خلاكى من جواكى تقولى ليه ده حصل .. وازاى حصل وبداتى تقارنى بينك وبين حالات مشابهه ليكى ونسيتى اليقين فى ان ربنا هو الرزاق مش الدكاترة ونسيتى ان الرضا يا حبيبتى بالقلب قبل اللسان .... مفكرتيش يا ماما انه امتحان قوى من ربنا ,, وهى دى النقطه اللى عايزة اكلمك فيها يا ماما
انا مكنتش متوقعه منك رد الفعل ده بجد .. مش هقول لك علشان انتى انسانه مؤمنه بالله ومن اول السكه وانتى راضيه بقضاؤة من ساعه ما عرفتى حقيقه مرضك .. ولا هقول لك علشان غيرك كتير وسطينا عادوا عملياتهم اكتر من مرة ..
لا هقولك انا مكنتش متوقعاه علشان انتى طبيبه وفاهمه كويس الحاله وعارفه انه وارد بنسبه كبيرة جدا انه يحصل لك وكلنا كنا قلقانين عليكى علشان متوقعين ده بنسبه كبيرة ..
بس انتى رفضتى فكرة ان العملية ممكن ما تنجحش وماحطتيش احتمال لده ومكانش عندك احتمالات غير ان العملية تنجح وكنتى شبه متاكدة زى ما قلتى وهى دى الغلطة .. لانك لو كنتى حاطه فى حسابك النجاح والفشل كان زمانك اهدى من دلوقتى يا ماما صح ولا ايه ؟؟ وكان زمانك لما سمعتى الخبر لملمتى نفسك فى يومها زعلتى وادايقتى بس فكرتى فى اللى جاى وخرجتى نفسك من الحالة دى ..
لكن انا مش هلومك على شئ احنا بشر وبنخطئ .. ولو مكناش بنخطى كان ربنا اتى بخلق اخرين يخطئون فيغفر لهم ..
فا دلوقتى علشان نتعلم من التجربة دى ونشتغل صح يا حبيبة قلبى ..
اول حاجة تثبتى لنفسك انك راضيه بقلبك بقضاء الله وعلى قد ما تقدرى يا ماما خديها حتى بتحدى مع نفسك .. انتى مش اول واحده يحصل لها ده ويمكن حتى الابتلاء ده كان فيه رحمه كبيرة اوى ليكى ان ربنا ماارادش الموضوع حتى يكمل وتكونى اتعلقتى بالامل اكتر واكتر ..عشان كده يا حبيبتى المفروض انك تراجعى حساباتك مع ربنا من اول وجديد ..
ثانيا تشوفى ايه الاخطاء اللى حصلت فى العمليه وتراجعيها ومش لازم يكون فى خطأ علشان العملية تفشل كفايه ان ربنا لسه ما اردش المرة دى ..
ثالثا تفكرى وبسرعه وتستخيرى معاد العمليه التانيه هيكون امتى ولو انى عارفه ان التكلفه عاليه .. بس علشان نكسب وقت وانتى طبعا محتاجة الوقت ده اكيد
اخيرا .. انا عارفاكى كويس يا ماما بجد وعارفه انك انسانه متفائله جدا وبتبصى للحياة بنظرة يمكن كتير من البنات بيفتقدوها ودى ميزة بتميزك عننا كلنا .. علشان كده انا عارفه انك بكرة هتيجى تقولى لى انا قررت اعمل كذا .. علشان اتأكد انك رجعتى ماما اللى اعرفها ... وقولى لروحك خلاص زعلنا بما فيه الكفايه وخلاص انتهينا من القصه دى .. مش هنقضى عمرنا نبكى على اللى بيحصل لنا فى حياتنا
شوفى هتعملى ايه وما تغيبيش نفسك بلعب الجيمز .. مخك ده نعمه من ربنا ما تضيعيهاش علشان مرحله وهتمر وهتعدى
الزمن مش هيقف عند هنا ويقول ستوب ..
قربى من ربنا تانى زى ما كنتى بالظبط وارجعى طبيعية تانى وانا مستنياكى يا حبيبتى تكلمينا بكرة ان شاء الله وانا عارفه انى هشوفك بكرة احسن من النهاردة .. وكفايه يا حبيبتى اننا كلنا جمبك .. بجد بجد انتى متعرفيش انتى غاليه علينا يا ماما قد ايه اوىىى ويعز عليا انى اشوفك فى الحالة دى .. وكلامى كان حازم شويه معلش سامحينى انا عارفه انك فى الوقت ده محتاجة اللى يطبطب عليكى زى مسلمة جزاها الله خير على كلامها عملت معاكى بس بردة محتاجة اللى يشدك غصب عنك ..
طريق الامل ( خبرات متبادلة حول مراكز العقم فى مصر ) الجزء السادس
متابعة النقاش، صفحة 370